Read Tedim Chin 1 KHANG TANGTHU MASATE 28 Bible Online

1 KHANG TANGTHU MASATE 28 - Tedim Chin bible

1 KHANG TANGTHU MASATE 28

¹David in Jerusalem-a Israel-te lakah zaneite, minamte sungah zaneite, kumpipa’ na a sem a khente sungah uliante, a tultul a a ukte, a zaza-a a ukte, neihsa khempeuh le kumpipa’ ganhingte le a tapate a kemte pen, kumpi inn-a zaneite, a thahat mite, le gal a hang tawntungte khempeuh tawh a khawm hi.

²Tua ciangin Kumpi David a khe-in dingto-in, “Ka sanggamte le ka mite aw, ka thugen hong za un. TOPA’ Thuciamna Singkuang a’ ding le i Pasian’ khengak nadingin tawlngakna biakinn khat lam ding ka lungsim sungah om a, a lamna ding ka kiging hi.

³Ahih hangin Pasian in kei kiangah, ‘Nang pen galhang khat hi-in sisan tampi luangsak na hih manin keima min dingin biakinn na lam thei kei ding hi,’ hong ci hi.

⁴Ahi zongin Israel TOPA Pasian in Israel tungah kumpi ahi tawntung dingin ka pa’ innkuan khempeuh panin kei hong teel hi; bang hang hiam cih leh amah in makai-in Judah teel a, tua ciangin Judah innkuan panin ka pa’ innkuan teel a, tua ciangin ka pa’ tate lak panin Israel khempeuh tungah kumpi-in kei hong bawl ding kei tungah amah lungkim hi.

⁵Tua ciangin ka tapate khempeuh lak panin (bang hang hiam cih leh TOPA in kei tungah tapa tampi hong pia hi) Israel-te a ukin TOPA’ kumpi tokhom tungah a tu dingin amah in ka tapa Solomon teel khin hi.

⁶Amah in kei kiangah, ‘Ka biakinn le a inntualte a bawl ding pa pen na tapa Solomon ahi hi; bang hang hiam cih leh ka tapa dingin amah ka teel khin a, kei pen ama pa ka hi ding hi.

⁷Amah in ka thupiaknate le ka biakna ngeina kipte tuni-a mah bangin zuih ding a ngaihsut paisuak nakleh ama kumpi gam ka kipsak tawntung ding hi,’ hong ci hi.

⁸Tua ahih ciangin tu-in note in hih leitang hoih nei-in note’ khit na tate uh tungah gamh-in na nusiat tawntung theih nadingun TOPA’ mai-ah kikhopna ahi Israel khempeuh’ muhna, le i Pasian’ zakna-ah TOPA na Pasian uh thupiaknate khempeuh zui-in zong un.

⁹“Tu-in nang, ka tapa Solomon aw, na pa’ Pasian thei inla, na lungsim khempeuh le utna lungsim tawh ama na sem in; bang hang hiam cih leh TOPA in lungsim sung zong a, ngimna le ngaihsutna khempeuh thei hi. Nangmah in amah na zon le nangmah in amah na mu ding hi. Ahih hangin amah na nusiat leh amah in nang hong paaikhia paisuak ding hi.

¹⁰Biakinn dingin inn khat a lam dingin TOPA in nang hong teel khin ahih manin tu-in kingaihsun in; thahat inla sem in,” a ci hi.

¹¹Tua ciangin David in a tapa Solomon tungah biakinn innliim, a innte, a vanmanpha koihnate, a dawl tungnungte, a dei sungnungte, le hehpihna tokhom a dingin inndei a geelna;

¹²le TOPA’ inn a tualte a dingin a lungsim ah a ngaihsut khempeuh, a kimkot a inndeite khempeuh, Pasian’ biakinn sung van manpha koihnate, le a ki-ap letsongte a’ ding van manpha koihnate;

¹³siampite le Levi mi a khente, le TOPA’ biakinn sungah nasepna khempeuh a ding; TOPA’ biakinn sungah nasepna ding umlebeel khempeuh a’ ding,

¹⁴nasepna-ah zat ding kham tawh kibawl umlebeel khempeuh a gihna, nasepna-ah zat dingin ngun tawh kibawl umlebeelte a gihna,

¹⁵nasepna-ah meivakkhuam a kizat ciatna bangin kham meivakkhuamte le a meivakte a gihna, a meivakkhuam le meivakte a gihna zah ciat, meivakkhuam khat le a meivakte ngun a gihna,

¹⁶Ompihna Anlum a dingin sabuai kham a gihna ciat, ngun sabuaite a dingin ngun a gihna,

¹⁷le sikkeute, kuangte, le haite a dingin kham citak a gihna; kham haipite le a gihna ciat, ngun haipite le a gihna ciat;

¹⁸a kisiangsaksa kham tawh kibawl paknamtui biakna tau ding le a gihna zah ding a geelna; a khate uh zakin TOPA’ Thuciamna Singkuang a khuh kherub-te’ kham leeng ding a geelna zong a pia hi.

¹⁹Nasep ding khempeuh geelsa bangin sep dingin hih thu tawh kizui-in TOPA’ genna bangin lai-in gelhna tawh amah in hihte khempeuh a siangin a hih hi.

²⁰Tua ciangin David in a tapa Solomon kiangah, “Thakhauhin hang inla sem in. Lau kei in; bang hang hiam cih leh TOPA Pasian, keima Pasian nangawn nang tawh hong om hi. TOPA’ biakinn sung nasepna khempeuh a kizawh matengin amah in nang hong tamasak lo ding a, hong nusia lo ding hi.

²¹Tua ciangin Pasian’ biakinn-ah nasep khempeuh a sem dingin siampite le Levi mi a khente om hi. Nasepna khat peuhpeuhah siamna a nei mite in nasepna khempeuhah nang hong huh ding hi. Uliante le mi khempeuh zong nangma thupiakna bangbangin gamta ding uh hi,” a ci hi.