Read Tedim Chin 1 KHANG TANGTHU MASATE 29 Bible Online

1 KHANG TANGTHU MASATE 29 - Tedim Chin bible

1 KHANG TANGTHU MASATE 29

¹Tua ciangin Kumpi David in a kikhawm khempeuhte kiangah, “Pasian in amah bek a teelsa ka tapa Solomon pen khangno-in pumpi tawh sinna om nai lo a, nasep ding pen lian mahmah hi. Bang hang hiam cih leh hih biakinn lianpi pen mihing a’ ding hi lo a, TOPA Pasian a’ ding ahi hi.

²Tua ahih ciangin ka Pasian’ biakinn dingin ka hih theihzah ciang, phuh dingin onik suang, suangpak, mel tuamtuam a nei suang, suangkang, le suangmanpha nam khempeuh tampi takte banah kham zatna ding nate-ah kham, ngun zatna ding nate-ah ngun, sumngo zatna ding nate-ah sumngo, sik zatna ding nate-ah sik, le sing zatna ding nate-ah sing ka koih khinzo hi.

³Tua tham loin, a siangtho biakinn a dingin ka koihte khempeuh banah, ngun le kham keima-a’ mahmah zong om a, ka Pasian’ biakinn ka ngaihsutna hangin ka Pasian’ inn-ah ka piakte:

⁴Kawm zut nadingin Ofir gam kham ahi kham talen tulthum, le a kisiangsaksa ngun talen tulsagih,

⁵le siamneelte in a hih ding nasepna khempeuh a dingin kham zatna ding nate-ah kham, le ngun zatna ding nate-ah ngun ahi hi. Kua teng utna lungsim tawh TOPA’ tungah tuni-in amahmah kipia-in ki-ap ding na hi uh hiam?” a ci hi.

⁶Tua ciangin beh lutangte in utthu-a piakna bawl uh a, minam makaite, a tul tul-a a ukte le a za za-a a ukte, le kumpipa’ nasepna-ah a uk uliante in zong hih uh hi.

⁷Amaute in Pasian’ biakinn nasep nadingin kham talen tulnga le kham darik tul sawm, ngun talen tul sawm, sumngo talen tul sawm le tulgiat, le sik talen tul zakhat a pia uh hi.

⁸Suangmanpha a nei peuhmah in Gershon mi Jehiel’ kepna sung, TOPA’ biakinn sung vanmanpha koihna-ah a pia uh hi.

⁹Tua ciangin hih mite in utna lungsim tawh pia uh ahih manin mite lungdam uh hi; bang hang hiam cih leh amaute in a lungsim khempeuh uh tawh TOPA’ tungah pia ziahziah uh a, kumpi David zong nakpitakin a lungdam hi.

¹⁰Tua ahih ciangin a kikhawmte khempeuh’ omna-ah David in TOPA phat hi. David in, “Nang, TOPA, ka pu uh Israel Pasian aw, a tawntungin thupha ngah ta in.

¹¹TOPA aw, liatna, vangliatna, minthanna, gualzawhna, le min liatnate nangma a’ ahi hi; bang hang hiam cih leh vantung le leitungah a om khempeuh zong nangma a’ ahi hi. TOPA aw, kumpi gam nangma a’ hi a, tuate khempeuh tungah nang a lutangin hong kisangsak hi.

¹²Hauhna le minphatna nangma kiang pan hong pai a, nangmah in na khempeuh tungah na uk hi. Na khut sungah vangliatna le minthanna om a, liatsakna ding le thakhauhsakna ding na khut sungah om hi.

¹³Tu-in nangma tungah ka nuam uh hi, kote’ Pasian aw, a minthang na min ka phat uh hi.

¹⁴“Ahih hangin kote in hih bangin utna tawh kong piak nadingun kei kua hi a, ka mite bang ahi hiam? Bang hang hiam cih leh na khempeuh nang kiang pan hong pai hi a, nangma a’ mah nang tungah a hong pia ka hi uh hi.

¹⁵Bang hang hiam cih leh ka pu ka pate khempeuh uh mah bangin kote pen nangma mai-ah khualmite le pemtate ka hi uh hi. Ka hunte uh leitungah niliim bang hi a, sih ding ka pelh thei kei uh hi.

¹⁶TOPA kote’ Pasian aw, na min siangtho pahtawi nadingin nang a’ ding biakinn lam nadingin ka piaksa uh hih a tampite zong nangma khutsung panin hong pai hi a, a vekpi-in nangma a’ mah ahi hi.

¹⁷Nangmah in lungsim entelin thumanna-ah na lungkimna ka thei hi, ka Pasian aw. Lungsim thumanna le citna tawh hih nate khempeuh kong pia khin a, tu-in nang tungah citna le lungdamna tawh a hong pia, hih lai-ah a om na mite ka muzo hi.

¹⁸Ka pute uh Abraham, Isaac, le Israel Pasian, TOPA aw, na mite’ lungsim sungah tua bang ngimnate le ngaihsutnate omsak tawntung inla, amaute’ lungsim nangma lamah kai in.

¹⁹Amah in a lungsim khempeuh tawh na thupiaknate, na teci pannate, le na thukhamte kemin a vekpi-in sem a, keimah in ka vaihawmsa biakinn lianpi amah in a lam theih nadingin ka tapa Solomon tungah utna lungsim guan in,” a ci hi.

²⁰Tua ciangin David in a kikhawmte khempeuh tungah, “TOPA na Pasian uh phat un,” a ci hi. Tua ciangin a kikhawmte khempeuh in a pute a pate uh Pasian TOPA phatin a lu uh kun uh a, TOPA bia-in kumpipa tungah zahtakna a bawl uh hi.

²¹Tua ciangin amaute in TOPA tungah biakpiakna bawl uh a, a zing ciangin TOPA tungah meihal biakna bawngtal tulkhat, tuutal tulkhat, le tuuno tulkhat, a leenggahzu tawh a biakna teng tawh, le Israel khempeuh a dingin biakpiakna tampi a pia uh hi.

²²Tua ciangin amaute in tua ni-in lungdamna lianpi tawh TOPA’ mai-ah pawi khamin a om uh hi. Tua ciangin amaute in David’ tapa Solomon kumpi-in a nihveina bawl uh a, amaute in TOPA a dingin amah kumpi-in sathau nilhin, siampi dingin Zadok sathau a nilh uh hi.

²³Tua ciangin a pa David tangin TOPA’ phuhsa kumpi tokhom tungah kumpi-in Solomon a tu hi. Amah a dau pai a, Israel mi khempeuh in ama thu a mang uh hi.

²⁴Makaite khempeuh le a thahat mite, le Kumpi David’ tapate khempeuh in zong Kumpi Solomon tungah a thuman ding uh thu ciam uh hi.

²⁵Tua ciangin TOPA in Israel mi khempeuh muhna-ah Solomon tungah minthanna lianpi pia a, Israel sungah ama ma-in kumpi khat peuhpeuh tungah a kipia ngei nai lo kumpi minliatna a guan hi.

²⁶Tua hi a, Jessi’ tapa David in Israel khempeuh tungah a uk hi.

²⁷Israel tungah ama uk hun kum sawmli sung hi a, amah in Hebron-ah kum sagih sung, Jerusalem-ah kum sawmthum le thum sung a uk hi.

²⁸Tua ciangin a khangham, a ni cing, hauhna le minthanna tawh a si hi. Tua ciangin a tapa Solomon in ama tangin uk hi.

²⁹Tu-in Kumpi David’ gamtatna a patna pan a tawpna dongin thumu pa Samuel’ Khang Tangthu sung, kamsang Nathan’ Khang Tangthu sung, le thumu pa Gad’ Khang Tangthu sungah

³⁰ama ukna le ama vangliatnate khempeuh le ama tung le Israel tung, gam sung kumpi gamte khempeuh tungah a tung thute a kiciamtehna tawh kigelh khawm hi.