Read Tedim Chin 1 KHANG TANGTHU MASATE 5 Bible Online

1 KHANG TANGTHU MASATE 5 - Tedim Chin bible

1 KHANG TANGTHU MASATE 5

¹Israel’ tate sung panin Reuben a tacil ahi hi. (Amah in a pa’ zineute khat luppih ahih manin tacil hi napi-in ama innluahza pen Josef’ tungah kipia hi. Tua ahih ciangin innluahza tawh kizui-in khangsimna-ah amah kiciamteh lo hi.

²A sanggamte lakah Judah a thahat suakin ama sung panin ulian khat a om hangin innluahza pen Josef a’ ahi hi.)

³Israel’ tacil Reuben’ tapate: Hanok, Pallu, Hezron, le Karmi ahi uh hi.

⁴Joel’ suante: A tapa Shemaiah, a tapa Gog, a tapa Shimei,

⁵a tapa Mikah, a tapa Reaiah, a tapa Baal,

⁶le a tapa Beerah hi a, Assiria kumpipa Tiglathpileser in amau’ minam makai Beerah manin salin a puakkhiat pa ahi hi. Amah pen Reuben mite a ukpipa ahi hi.

⁷Tua ciangin amau’ khangsimna a kiciamteh ciangin a innkuankuanin ama behte: Ukpi Jeiel, Zekhariah,

⁸le Joel mite beh sung panin Shema’ tapa Azaz, a tapa Bela ahi hi. Aroer le tua panin Nebo le Baalmeon ciang dongah a teng uh hi.

⁹Gilead gam sungah amau’ bawngte khangin tampi pha ahih manin Eufratis gun hih lampang sehnel gam lutna ciang dong nisuahna lamah zong a teng uh hi.

¹⁰Tua ciangin Saul’ hun lai-in amaute in Hagri mite simin zo uh a, Gilead nisuahna lam gam khempeuh a amau’ puanbukte luahin tuate sungah a teng uh hi.

¹¹Bashan gam Salekah dongah Reuben-te’ galkhatah a teng Gad minamte:

¹²Ukpi Joel hi-in, a zom Shafam hi a, Janai le Shafat, Bashan-ah beh makai ahi uh hi.

¹³Tua ciangin amau’ beh makai dangte: Mikhael, Meshullam, Sheba, Jorai, Jakan, Zia, le Eber, sagih pha uh hi.

¹⁴Hihte pen Buz’ tapa Jahdo, a tapa Jeshishai, a tapa Mikhael, a tapa Gilead, a tapa Jaroah, a tapa Huri’ tapa Abihail’ suante ahi uh hi.

¹⁵Guni’ tapa Abdiel’ tapa Ahi pen amau’ behte sungah ukpi ahi hi.

¹⁶Amaute Gilead gam sung, Bashan gam le a khuapite sung, le Sharon gam sung lonona a kiten theihna ciang dongah a teng uh hi.

¹⁷Hihte khempeuh Judah kumpi Jotham’ hun sung, le Israel kumpi Jeroboam’ hun sungin khangsimna-ah kiciamteh hi.

¹⁸Reuben mite, Gad mite, le Manasseh minam a langte in mi thahat, lum le namsau kuahin thal a tawi, gal a siam, nasem dingin a baihsa-in a om mi tul sawmli le tulli le zasagih le sawmguk nei hi.

¹⁹Amaute in Hagri mite, Jetur mite, Nafish mite, le Nodab mite zo uh hi.

²⁰Amaute a sim nadingin huhna a ngah uh ciangin Hagri mite le amau tawh a kipawl khempeuhte amaute’ khut sungah kipia hi; bang hang hiam cih leh gal kidona sungah amaute in Pasian’ tungah ko uh a, amaute in Pasian muang uh ahih manin amah in amaute’ thumna a pia hi.

²¹Amaute in amau’ ganhingte matsak uh hi. A kalaoh uh tul sawmnga, tuu tul zanih le tul sawmnga, la tulnih, le mi tul zakhat hingmat uh hi.

²²Tua gal pen Pasian’ gal ahih manin mi tampi tak kithatin puk hi. Tua ciangin amaute sal a suah hun dong uh tua munah teng uh hi.

²³Manasseh minam a langte pen Bashan panin Baalhermon, Senir, le Hermon Mual tungah tengin tam pha mahmah uh hi.

²⁴Amau’ beh lutangte: Efer, Ishi, Eliel, Azriel, Jeremiah, Hodaviah, le Jahdiel hi a, a thahat galhangte, mi minthangte, a beh lutangte ahi uh hi.

²⁵Ahih hangin amaute in a pate uh Pasian’ thu palsat uh a, Pasian in amaute’ mai-ah a suksiat tua gam mite’ pasian-te bia uh hi.

²⁶Tua ahih ciangin Israel Pasian in Assiria kumpipa Pul (Tiglathpileser zong a kici) Assiria kumpipa hansuah a, amah in Reuben mite, Gad mite, le Manasseh minam alangte puakhia-in, Halah, Habor, Hara khuate, le Gozan gun dungah paipihin tuni dongin tua gamte-ah om uh hi.