Read Tedim Chin 2 KHANG TANGTHU NIHNATE 11 Bible Online

2 KHANG TANGTHU NIHNATE 11 - Tedim Chin bible

2 KHANG TANGTHU NIHNATE 11

¹Jerusalem-ah Rehoboam hong tun ciangin a kumpi gam a ngahkikna dingin Israel-te a sim dingin amah in Judah minam le Benjamin minam a kitengkhia galhang mihing tul zakhat le tul sawmgiat kaikhawm hi.

²Ahih hangin Pasian’ mi Shemaiah’ tungah TOPA’ thu hong tung hi:

³“Judah kumpi Solomon’ tapa Rehoboam, le Judah le Benjamin sunga om Israel mi khempeuh tungah gen in,

⁴TOPA in hih bangin ci hi: “Note na kuanto kei ding uh a, na mipihte uh na sim kei ding uh hi. Mi khempeuh na inn uhah ciahkik un; bang hang hiam cih leh hih thu pen keima kiang pan hong pai ahi hi,” ci-in gen in,’” a ci hi. Tua ahih ciangin amaute in TOPA’ thu ngai-in ciahkik uh a, Jeroboam a sim dingin kuan lo uh hi.

⁵Jerusalem-ah Rehoboam teng a, kihut nadingin Judah gam sungah khuapite a lam hi.

⁶Amah in Bethlehem, Etam, Tekoa,

⁷Bethzur, Soko, Adullam,

⁸Gath, Mareshah, Zif,

⁹Adoram, Lakhish, Azekah,

¹⁰Zorah, Aijalon, le Hebron, Judah le Benjamin gam sunga om kulh a nei khuapite a lam hi.

¹¹Amah in munmuanhuaite a muanhuai-in bawlpha-in tuate sungah a ukte, le an, sathau, le leenggahzu a koih hi.

¹²Tua ciangin amah in khuapi khempeuhah lum le tei koih a, a muanhuai mahmahin a bawl hi. Tua ahih ciangin Judah gam le Benjamin gam ama a’ a suak hi.

¹³Tua ciangin Israel sungah a om siampite le Levi mite khempeuh in amau’ tenna mun khempeuh panin amah hong beel uh hi.

¹⁴Bang hang hiam cih leh Jeroboam le a tapate in TOPA’ siampi a sepna panun amaute hawlkhia-in, mual dawna biakpiakna munte, dawi gilote, le ama bawlsa bawngno milimte a dingin ama siampi tuam teel ahih manin Levi mite in amau’ taang gam le amau’ neihsate nusia-in Judah le Jerusalem-ah hong pai uh hi.

¹⁶Tua ciangin Israel TOPA Pasian zon ding a lungsim uhah a khentat khin mite in amau’ pute pate’ Pasian, TOPA tungah biakna a pia dingin Israel minam khempeuh sung panin amau’ nung zui-in Jerusalem-ah hong pai uh hi.

¹⁷Amaute in Judah kumpi gam thakhauhsak uh a, amaute in Solomon’ tapa Rehoboam lungmuangin kum thum sung koih uh hi; bang hang hiam cih le David le Solomon’ thu a zuih bangun kum thum sung ama thu a mang uh hi.

¹⁸Rehoboam in Mahalath tenpih hi. Mahalath’ pa pen David’ tapa Jerimoth hi a, a nu pen Jessi’ tapa Eliab’ tanu Abihail ahi hi.

¹⁹Tua nu in amah tawh tapate Jeush, Shemariah, le Zaham nei hi.

²⁰Tua nu’ khit ciangin amah in Absalom’ tanu Maakah la a, amah tawh Abijah, Attai, Ziza, le Shelomith nei hi.

²¹Rehoboam in a zi dangte le a zineute khempeuh sangin Absalom’ tanu Maakah itzaw hi (amah in zi sawm le giat le zineu sawmguk la a, tapa sawmnih le giat le tanu sawmguk nei hi).

²²Tua ciangin Rehoboam in Maakah’ tapa Abijah, a sanggamte lakah a ulian penin a seh hi; bang hang hiam cih leh kumpi-in amah koih sawm hi.

²³Amah pil gamtat a, Judah le Benjamin gam sung, kulhnei khuapite khempeuhah a tapa pawlkhat a khen hi. Amah in amaute tungah na tampi pia a, amaute a dingin zi zong a zonsak hi.