Read Tedim Chin 2 KHANG TANGTHU NIHNATE 15 Bible Online

2 KHANG TANGTHU NIHNATE 15 - Tedim Chin bible

2 KHANG TANGTHU NIHNATE 15

¹Oded’ tapa Azariah’ tungah Pasian’ kha hong tung hi.

²Tua ciangin Asa a dawntuah dingin amah pai-in ama kiangah, “Asa, le Judah mite le Benjamin mite aw, ka thu ngai un. Note amah tawh na om laiteng uh note tawh TOPA hong om hi. Amah na zon uhleh amah na mu ding uh a, ahih hangin amah na nusiat uhleh amah in note hong nusia ding hi.

³Hun saupi sung Israel mite, Pasian man tawh om lo, thu a hilh siampi tawh om lo, thukham tawh om lo uh hi.

⁴Ahih hangin a lungkham uh ciangin Israel Pasian, TOPA’ lamah kihei uh a, amah zongin amaute in amah a mu uh hi.

⁵Tua hun lai-in nasemin mite a zinsuk a zintohna uhah lungmuanna om lo a, gam khempeuhah buaina om hi.

⁶Pasian in lungkhamna nam khempeuh tawh buaisak ahih manin minam khat le minam khat, khuapi khat le khuapi khat kido-in amaute kitamkham uh hi.

⁷Ahih hangin nang, hang in! Na nasepna thaman hong kipia ding ahih manin na khut zawsak kei in,” a ci hi.

⁸Asa in Oded’ tapa Azariah’ thugenkholh, hih thute a zak ciangin amah a lungsim hong hangin, Judah gam khempeuh le Benjamin le Efraim mualtung gam panin a laksa khuapite panin a kihhuai milimte lakhia a, TOPA’ biakinn mai-a om TOPA’ biakna tau a puah hi.

⁹Tua ciangin amah in Judah le Benjamin mi khempeuh, le Efraim, Manasseh, le Simeon sung panin amaute kiangah a peemte zong a khawm hi; bang hang hiam cih leh TOPA a Pasian in amah a ompihna thu amaute in a muh uh ciangin Israel-te kiang panin mi tampi tak ama kiangah tai uh hi.

¹⁰Asa’ uk kum sawm le ngana a kha thumna sungin Jerusalem-ah amaute kikhawm uh hi.

¹¹Tua ni-in amaute in galsung panin a ciahpih uh nate sung panin bawngtal zasagih le tuu tulsagih tawh TOPA’ tungah biakna a pia uh hi.

¹²Tua ciangin a lungsim khempeuh uh le a nuntakna khempeuh uh tawh a pu a pate uh’ Pasian, TOPA a zon ding uh,

¹³le Israel Pasian, TOPA a zong lo peuhmah, a moi ahi a, a ham ahi a, numei ahi a, pasal ahi zongin a kithahna ding uh thuciamna khat a bawl uh hi.

¹⁴Amaute in awging pha, otna, peengkulte, le sakite tawh TOPA’ tungah kiciamna a bawl uh hi.

¹⁵Tua ciangin Judah mi khempeuh tua kiciamna-ah lungdam uh hi; bang hang hiam cih leh amaute in a lungsim khempeuh uh tawh kiciamin deihna taktak tawh amah zong uh hi. Tua ciangin amaute in amah mu uh a, TOPA in a kiim uhah amaute galdaihna a pia hi.

¹⁶Ama nu Maakah in Asherah milim dingin a kihhuai milim khat a bawlna hangin kumpipa’ nu hihna za panin kumpi Asa in a nu a lakhia hi. Asa in a nu’ milim phuksakin satnen a, Kidron lui-ah a hal hi.

¹⁷Ahih hangin Israel gam sung panin mual dawna biakpiaknate kilakhia lo hi. Ahi zongin ama hunsung tawntung Asa’ lungsim paubaang lo hi.

¹⁸Tua ciangin amah in a pa’ apsa letsongte le ama apsa letsongte, ngun le kham, le nazatte, TOPA’ biakinn-ah paipih hi.

¹⁹Asa’ uk kum sawmthum le nga ciang dong galkidona om nawn lo hi.