Read Tedim Chin 2 KHANG TANGTHU NIHNATE 17 Bible Online

2 KHANG TANGTHU NIHNATE 17 - Tedim Chin bible

2 KHANG TANGTHU NIHNATE 17

¹Tua ciangin a tapa Jehoshafat in ama tangin uk a, Israel langpangin amahmah kithakhauhsak hi.

²Amah in Judah khuapi kulhneite khempeuhah galkapte koih a, Judah gam sung le a pa Asa in a laksa Efraim khuapite sungah khuacingte a koih hi.

³Amah in a pa’ gamtat masate zui ahih manin Jehoshafat tawh TOPA om hi. Amah in Baal-te bia lo hi.

⁴Israel-te’ gamtat bang hi loin ama pa’ Pasian zongin ama thupiakna a zui hi.

⁵Tua ahih ciangin TOPA in ama khut sungah kumpi gam kipsak a, Judah mi khempeuh in Jehoshafat tungah siah puak uh hi. Amah hau mahmah a, minthang mahmah hi.

⁶TOPA’ na a sepna-ah hang mahmah a, Judah gam sung panin mual dawna biakpiaknate le Asherah milimte a lakhia hi.

⁷Ama uk a kum thumna kumin ama uliante Benhail, Obadiah, Zekhariah, Nethanel, le Mikaiah, Judah khuapite-ah thuhilh dingin a sawl hi.

⁸Amaute tawh Levi mi Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah, le Tobadonijah a paikhawm sak hi. Tua ciangin Levi mite tawh siampi Elishama le Jehoram zong a paisak hi.

⁹Amaute in TOPA’ thukham laibu kengin Judah gam sungah hilh uh hi. Judah khuapi khempeuhah amaute pai kawikawi-in mite lakah a hilh uh hi.

¹⁰Tua ciangin Judah gam kimkotah a om kumpi gam khempeuh tungah TOPA kihtakna om a, amaute in Jehoshafat do ngam nawn lo uh hi.

¹¹Filistia mite pawlkhat in Jehoshafat tungah letsongte, le siah dingin ngun a puak uh hi. Tua ciangin Arab-te in zong ama tungah tuutal tulsagih le zasagih, le keeltal tulsagih le zasagih mah a puak uh hi.

¹²Tua ciangin Jehoshafat hong lianzaw semsem hi. Amah in Judah gam sungah munmuanhuaite le vankoihna khuapite lam a,

¹³amah in Judah khuapite sungah van tampi a nei hi. Amah in a thahat a hang galkapte Jerusalem-ah a nei hi.

¹⁴A beh ciat uh tawh kizui-in amaute a phazah hih bang ahi hi. Judah sung pan a tulin a ukte: Adnah a ukpa hi a, a thahat a galhang mi tul zathum tawh ahi hi.

¹⁵Ama zomah a ukpa Jehohanan hi a, mi tul zanih le tul sawmgiat tawh ahi hi.

¹⁶Ama zomah TOPA’ nasep nadingin a kipia Zikri’ tapa Amasiah hi a, a thahat a galhang mi tul zanih tawh ahi hi.

¹⁷Benjamin sung panin: A thahat a galhang Eliada hi a, thal le lum a tawi mi tul zanih tawh ahi hi.

¹⁸Tua ciangin ama zomah Jehozabad hi a, galdo dingin hiam a tawi mi tul zakhat le tul sawmgiat tawh ahi hi.

¹⁹Hihte pen kumpipa in Judah gam sung khempeuhah kulh a nei khuapite-ah a koihte banah kumpipa’ na a semte ahi hi.