Read Tedim Chin 2 KHANG TANGTHU NIHNATE 20 Bible Online

2 KHANG TANGTHU NIHNATE 20 - Tedim Chin bible

2 KHANG TANGTHU NIHNATE 20

¹Hih thu khit ciangin Moab mite le Ammon mite, le Meunim mite pawlkhat, Jehoshafat a sim dingin hong kuan uh hi.

²Mi pawlkhat hong pai-in Jehoshafat kiangah, “Tuipi galkhat, Edom gam panin mihon tampi khat nangmah a sim dingin hong kuan uh hi. Amaute Hazazontamar (Engedi a kici)-ah om uh hi,” ci-in a gen uh hi.

³Tua ciangin Jehoshafat lau a, amahmah in TOPA’ lamlahna ding zong a, Judah gam khempeuhah an tan’ ding thu a zasak hi.

⁴Tua ciangin TOPA’ tung pan huhna a ngen dingin Judah mite hong kikhawm uh hi. Judah khuapi khempeuh panin TOPA thu a dong dingin amaute hong pai uh hi.

⁵Tua ciangin TOPA’ biakinn huangsung, inntual thak mai, Judah le Jerusalem-te’ kikhopna sungah Jehoshafat ding a,

⁶“TOPA, ka pu ka pate uh Pasian aw, nang, vantungah Pasian hi lo na hi hiam? Minamte’ kumpi gam khempeuh tungah nang a uk hi lo na hi hiam? Na khut sungah vangliatna le thahatna om a, kuamah in nang hong nang zo lo hi.

⁷Kote’ Pasian aw, hih gamah a teng mite na mi Israel-te’ mai-ah hawlkhia-in, na lawmpa Abraham’ suanlekhakte tungah a tawntung dingin pia hi lo na hi hiam?

⁸Hih gamah amaute tengin, nangma min dingin hih lai-ah biakinn khat lam uh a,

⁹‘Eite tungah siatna, namsau, thukhenna, ahih kei leh natna, ahih kei leh kialpi hong tun leh, hih biakinn sungah ama min om ahih manin hih biakinn mai-ah dingin i gimna hunah ama tungah i kiko ding a, amah in hong za-in hong hon ding hi,’ ci uh hi.

¹⁰“Tu-in en in, Egypt gam panin Israel-te hong paikhiat lai-in na simsak loh, amaute in a suksiat loh uh Ammon mite le Moab mite le Seir Mual gam mite,

¹¹ka luah dingun kote tungah nong piaksa nangma neihsa panin kote a hong hawlkhia dingin hong paina tawh amaute in kote hong lehthuk zawsop uh hi.

¹²Kote’ Pasian aw, amaute tungah thu khen lo ding na hi hiam? Bang hang hiam cih leh kote a sim dingin a hong pai hih mihon tampite a do dingin thahatna ka nei kei uh hi. Ka cih nading uh ka thei kei uh a, nangmah bek kong mitsuan uh hi,” a ci hi.

¹³Tua laitakin TOPA’ mai-ah Judah mi khempeuh a taneute, a zite, le a naupangte uh tawh a ding uh hi.

¹⁴Tua ciangin a kikhawmte’ lak, Levi mi Asaf’ suante sung pan Mattaniah, a tapa Jeiel, a tapa Benaiah, a tapa Zekhariah, a tapa Jahaziel tungah TOPA’ kha hong tung hi.

¹⁵Tua ciangin amah in, “Judah gam khempeuh le Jerusalem-a teng khempeuh, le Kumpi Jehoshafat aw, ngai un. TOPA in hih bangin note’ tungah hong gen hi: ‘Kihta kei unla, hih a tam mi honpi hangin lungkia kei un; bang hang hiam cih leh galdona pen note a’ hi loin Pasian-a’ ahi hi.

¹⁶Zing ciangin amaute a do-in paisuk un. Ziz kahtohna lampi tawnin amaute hong kuanto ding uh a, Jeruel gamlak nisuahna lam kuam mongah amaute na mu ding uh hi.

¹⁷Note in hih kidona-ah na do ding uh kisam lo hi. Judah gam mite le Jerusalem khuamite aw, na panmun uh la-in taang loin ding unla, note’ tangin TOPA’ gualzawhna mu un,’ ci hi. Kihta kei unla, lungkia kei un. Zing ciangin amaute a do-in pai un. TOPA in note hong ompih ding hi,” a ci hi.

¹⁸Tua ciangin Jehoshafat in a maitang leilam ngatin kun a, Judah gam le Jerusalem-a a teng mite khempeuh zong TOPA’ mai-ah pukin TOPA a bia uh hi.

¹⁹Tua ciangin Levi mite sung pan Kohath mite le Korah mite, awging pha mahmah tawh Israel Pasian, TOPA a phat dingin a dingto uh hi.

²⁰Tua ciangin zingsangin amaute tho baihin Tekoa gamlakah a paikhia uh hi. Amaute a paikhiat laitakin Jehoshafat dingin, “Judah gam le Jerusalem-a a tengte aw, ka thugen za un! TOPA na Pasian uh um un; tua hileh note na kip ding uh hi. Ama kamsangte um un; tua hileh na maavang ding uh hi,” a ci hi.

²¹Amah in mite tawh thu kikupna a neih khit ciangin, galkapte mai-ah amaute a paikawmin, “TOPA tungah lungdamna ko un; bang hang hiam cih leh ama itna kip tawntung hi,” ci-in biakna puan silhin TOPA tungah la sa-in amah a phat dingte a seh hi.

²²Amaute inla sa-in phat ding a kipat uh ciangin, Judah mite a sim dingin a hong pai Ammon mite, Moab mite, le Seir Mual gam mite a pangsim ding TOPA in koih a, amaute kizo hi.

²³Bang hang hiam cih leh Ammon mite le Moab mite in Seir Mual a, a tengte a do dingin kipanin amaute susia mang uh a, Seir-a a tengte a beisak khit uh ciangin amaute khatlekhat kisusia uh hi.

²⁴Gamlak a galvilna tausangah Judah-te hong tun ciangin mihonpite’ omna lam en uh hi. Amaute pen leilakah a puk misi luanghawm vive na hi a, a suakta kuamah om lo hi.

²⁵Van kinusiate a tawm dingin Jehoshafat le a mite hong pai ciangin bawngte, vante, puante, le na manphate tampi tak mu uh a, a puakzawh nawn loh ciang dong uh amau a dingin a la uh hi. Van kinusiate tam mahmah ahih manin ni thum sung tawm uh hi.

²⁶A ni li ni-in Berakah Kuam-ah amaute kikhawm uh hi; bang hang hiam cih leh amaute in tua lai-ah TOPA phat uh hi. Tua ahih ciangin tuni dongin tua lai mun pen Berakah Kuam kici hi.

²⁷Tua ciangin Judah mi le Jerusalem mi khempeuh ciah uh a, Jehoshafat makai-in lungdamna tawh Jerusalem-ah a pai uh hi; bang hang hiam cih leh a galte uh hangin TOPA in amaute lungdamsak hi.

²⁸Amaute, harp lasaknate le laiza lasaknate tawh Jerusalem-a TOPA’ biakinn-ah tung uh hi.

²⁹TOPA in Israel-te’ galte a dosakna thu a zak uh ciangin kumpi gamte khempeuh in TOPA a kihta uh hi.

³⁰Tua ahih ciangin Jehoshafat’ ukna gam sung gamdai hi; bang hang hiam cih leh a Pasian in ama kiimah galdaihna a pia hi.

³¹Tua bangin Jehoshafat in Judah tungah uk hi. Amah in uk ding a kipatin kum sawmthum le nga pha a, Jerusalem-ah kum sawmnih le nga sung uk hi. Ama nu’ min Azubah hi a, Shilhi’ tanu ahi hi.

³²Amah in a pa Asa’ gamtat bangmahin TOPA’ muhna-ah a man na sem hi.

³³Ahi zongin mual dawna biakpiaknate kilakhia lo hi. Mite in a lungsim uhah a pu a pate uh’ Pasian ngaihsun nai lo uh hi.

³⁴Tu-in Jehoshafat’ gamtatna a omlaite, a patna pan a tawp dongin, Israel Kumpite’ Tangthu sunga a kiciamteh, Hanani’ Tapa Jehu’ Khang Tangthu sungah kigelh hi.

³⁵Hih thu khit ciangin Judah kumpi Jehoshafat in a gilo a a gamta Israel kumpipa Ahaziah tawh kipawlna a bawl hi.

³⁶Tarshish a pai ding teembawte bawlna-ah amah pawl a, amaute in Eziongebar-ah teembawte a bawl uh hi.

³⁷Tua ciangin Mareshah khuami Dodavahu’ tapa Eliezer in Jehoshafat langpangin thu genin, “Nangmah in Ahaziah tawh kipawlna bawl na hih manin TOPA in na bawlsa uh nate susia ding hi,” a ci hi. Tua ciangin teembawte kisia a Tarshish-ah pai thei lo hi.