Read Tedim Chin 2 KHANG TANGTHU NIHNATE 24 Bible Online

2 KHANG TANGTHU NIHNATE 24 - Tedim Chin bible

2 KHANG TANGTHU NIHNATE 24

¹Joash in uk ding a kipatin kum sagih pha a, Jerusalem-ah kum sawmli sung uk hi. Ama nu’ min Zibiah hi a, Beersheba khuami ahi hi.

²Siampi Jehoiada’ hunsung khempeuh TOPA’ mitah Joash a manin gamta hi.

³Jehoiada in ama a dingin zi nih laksak a, amah in tapate le tanute a nei hi.

⁴Hih hun khit ciangin Joash in TOPA’ biakinn a ngei batsakkik ding ngaihsun hi.

⁵Amah in siampite le Levi mite khempeuh khawmin amaute kiangah, “Judah khuapite-ah pai unla, Pasian’ biakinn a kum kumin puah nadingin Israel khempeuh tung panin sum khawm un; hih thu na nawh hih ding uh thei un,” a ci hi. Ahih hangin Levi mite kinawh lo uh hi.

⁶Tua ahih ciangin kumpipa in amau’ ukpi Jehoiada samin ama kiangah, “TOPA’ nasem Moses in TOPA’ ompihna puanbuk-a dingin Israel mihonte tung panin a khon mangmu bang hangin Judah le Jerusalem panin Levi mite khawmsak lo na hi hiam?” a ci hi.

⁷Bang hang hiam cih leh tua a gilo numei Athaliah le a pawlte in Pasian’ biakinn luh uh a, TOPA’ biakinn sunga om a ki-ap nate khempeuh zong Baal-te a dingin zang uh hi.

⁸Tua ahih ciangin kumpipa in thu pia a, amaute in singkuang khat bawlin TOPA’ biakinn kulhkongpi pualamah a koih uh hi.

⁹Gamlakah a omlai-un Pasian’ nasem Moses in Israel mite a piaksak mangmu TOPA a dingin hong puak nadingun Judah le Jerusalem sung khempeuhah thu zaksakna kibawl hi.

¹⁰Tua ciangin ulian khempeuh le mi khempeuh lungdamin a mangmu uh hong sung uh a, a man khit mateng uh singkuang sungah khia uh hi.

¹¹Levi mite in kumpipa’ uliante kiangah a singkuang paipih uh a, a sungah sum tampi a omlam a muh peuhpeuh uh ciangin, kumpipa’ lai-at pa le siampi lianpen pa’ sawltak pa hong pai-in singkuang sunga sum teng bungkhia-in la uh a, tua ciangin a omna ngei-ah a singkuang koihkik uh hi. Tua bangin a ni ni-in amaute in hih uh a, sum tampi a khawm uh hi.

¹²Tua ciangin kumpipa le Jehoiada in TOPA’ biakinn nasep a ukte tungah tua sumte pia uh a, amaute in TOPA’ biakinn a ngei a bangsakkik dingin leilesuang nasep a siamte le khutsiamte, le TOPA’ biakinn a puahkik dingin sik le sumngo nasep a siamte zong a cial uh hi.

¹³Tua ahih ciangin tua nasepna-ah a kisehte in na semin amau’ khut sungah puahkikna nasep in mai nawt a, amaute in a ngei bangin TOPA’ biakinn bawlkikin kipsak uh hi.

¹⁴Amaute in a zawh khit uh ciangin, kumpipa le Jehoiada kiangah sum a omlaite hong paipih uh a, amaute in tuate tawh TOPA’ biakinn-ah nasepna ding le meihal biak nadingin nazatte, le paknamtui a dingin pakante, le kham le ngun beelte a bawl uh hi. Tua ahih ciangin amaute in Jehoiada’ nuntak sung khempeuh a tawntungin TOPA’ biakinn sungah meihal biaknate a pia uh hi.

¹⁵Ahih hangin Jehoiada teekin a hun kicing ta a, tua ciangin a si hi. A sihin kum za le kum sawmthum pha hi.

¹⁶Amah in Israel sung, le Pasian’ na le Pasian’ biakinn-ah nasep hoih sem ahih manin amaute in David khuapi sung kumpite’ lakah amah a vui uh hi.

¹⁷Jehoiada a sih khit ciangin Judah uliante hong pai-in amau’ thu a zuih nadingin kumpipa tungah thu va gen uh a, kumpipa in zong amaute’ thu a ngai hi.

¹⁸Tua ahih ciangin amaute in a pu a pate uh Pasian, TOPA’ biakinn nusia uh a, Asherah milimte le milim dangte’ na sem uh hi. Hih amau’ mawhna hangin Judah le Jerusalem tungah hehna hong tung hi.

¹⁹Ahi zongin TOPA’ lamah amaute a paipih kik dingin amah in amaute lakah kamsangte a puak hi. Hihte in amau’ langkhatah teci pang a, ahih hangin amaute in don lo uh hi.

²⁰Tua ciangin siampi Jehoiada’ tapa Zekhariah’ sungah Pasian’ kha hong lut hi. Tua ciangin amah dingin mite en sukin mite kiangah, “Pasian in hih bangin ci hi: ‘Bang hangin na mavan’ theih loh nadingun TOPA’ thupiaknate palsat na hi uh hiam? Note in TOPA nusia na hih manun amah in note hong nusia hi,’ ci hi,” a ci hi.

²¹Ahih hangin amaute in amah sawmsim uh a, kumpipa’ thupiakna tawh amaute in TOPA’ biakinn tualah suang tawh amah denglum uh hi.

²²Tua bangin kumpipa Joash in Zekhariah’ pa Jehoiada in ama tungah a lah dikna phawk nawn loin ama tapa thahsak mawk hi. Amah in a sih ding ciangin, “TOPA in mu hen la thuk ta hen!” a ci hi.

²³Kum bei ciangin Joash a simin Syria galkapte hong kuanto hi. Judah le Jerusalem-ah amaute hong pai-in mite lak panin ulian khempeuh that uh a, a van ngahte khempeuh uh Damaskas kumpipa kiangah puak uh hi.

²⁴Syria galkapte mi tawmno hong pai hi napi-in, amaute in a pu a pate uh Pasian, TOPA nusia uh ahih manin TOPA in amaute’ khut sungah galkap tampi ahi mite a pia hi. Tua bangin amaute in Joash’ tungah thukhenna a pia uh hi.

²⁵Amah nakpi tak a liamsa-in nusia-in, ama kiang panin Syria mite a kihepkhiat khit uh ciangin, siampi Jehoiada’ tapa a thahna hangin a nasemte in amah sawmsim uh a, a lupna tungah amah that uh hi. Tua ahih ciangin amah si hi. David khuapi sungah amah vui uh a, ahih hangin amaute in kumpite’ hanah amah vui lo uh hi.

²⁶Amah a sawmsim mite pen Ammon numei Shimeath’ tapa Zabad, le Moab numei Shimrith’ tapa Jehozabad ahi uh hi.

²⁷Ama tapate’ thute, le amah a kigensiatna thute, le Pasian’ biakinn a kilamkikna thute, Kumpite’ Khang Tangthu Laibu sungah kigelh hi. Tua ciangin a tapa Amaziah in ama tangin a uk hi.