Read Tedim Chin 2 KHANG TANGTHU NIHNATE 26 Bible Online

2 KHANG TANGTHU NIHNATE 26 - Tedim Chin bible

2 KHANG TANGTHU NIHNATE 26

¹Tua ciangin Judah mi khempeuh in kum sawm le guk a pha Uzziah la-in a pa Amaziah’ tangin kumpi-in a koih uh hi.

²Kumpi ahi ama pa a sih khit ciangin amah in Eloth khua la kikin Judah gam dingin a ngahkik hi.

³Uzziah in uk ding a kipatin kum sawm le guk pha a, amah in Jerusalem-ah kum sawmnga le nih sung uk hi. Ama nu’ min Jekoliah hi a, Jerusalem khuami ahi hi.

⁴A pa Amaziah’ hihsa khempeuh bangin amah in TOPA’ mitah a man sem hi.

⁵Pasian zahtak ding ama tungah a hilh Zekhariah’ hun sungteng amah in Pasian zong hi. Amah in TOPA a zon laiteng, Pasian in amah daupaisak hi.

⁶Amah kuankhia-in Filistia mite va sim a, Gath khuapi kulh, Jabneh khuapi kulh, le Ashdod khuapi kulh sucim hi. Tua ciangin amah in Ashdod gam sung le Filistia-te’ gam sung mun dangte-ah khuapite a lam hi.

⁷Filistia mite, Gurbaal-ah a teng Arab mite, le Meunim mite a dona-ah Pasian in amah huh hi.

⁸Ammon mite in Uzziah tungah siah puak uh a, amah a thahat mahmah suak ahih manin a minthanna in Egypt gam ciang dong nangawn zel hi.

⁹Tua tham loin Uzziah in Jerusalem a Kiu Kongpi le a Kuam Kongpi, le Kulh Keen sanah tausangte lam a, tuate kulh tawh a um hi.

¹⁰Tua ciangin amah in gamlakah tausangte lam a, Shefelah le zanglei-ah ganhon tampi nei ahih manin tuikhuk tampi to a, lei nasep uuk ahih manin mualtung le lei hoihna gamte-ah lokhote le leenggui puahte a nei hi.

¹¹Tua tham loin Uzziah in kumpipa’ khutnuai-ah galkap ukte khat ahi Hananiah’ ukna nuai-ah, lai-at Jeiel le ulian Maaseiah in mi a khop lai-in a khen khenin a koih a mi phazah mah bangin, galsim dingin a hoih galkap tampi a nei hi.

¹²A thahat galkapmang a vekpi-in tulnih le zaguk ahi hi.

¹³Amaute’ ukna nuai-ah galdona-ah kumpipa a huh dingin thahatna tawh gal a do thei ding galkap tul zanga om hi.

¹⁴Uzziah in galkap khempeuh a dingin lumte, teipite, sik lukhute, thalte, lot ding suangtangte a bawl hi.

¹⁵Amah in thaltangte le suang liante lot nadingin tausang omna munte le a kiute-ah koih ding, mi a siamte in a bawltawm sette, Jerusalem-ah a bawl hi. Amah a thahat dong a lamdangpi khatin kihuh ahih manin ama minthanna in gamlapi a zel hi.

¹⁶Ahih hangin amah a thahat ciangin a siat nadingin a kiphatsakna hong khang hi. Bang hang hiam cih leh TOPA a Pasian tungah amah khial a, paknamtui biakna tau tungah paknamtui hal dingin TOPA’ biakinn sungah a lut hi.

¹⁷Ahih hangin TOPA’ siampi Azariah, a thahat mihing sawmgiat tawh ama nungah pai hi.

¹⁸Tua ciangin amaute in Kumpi Uzziah nialin ama kiangah, “Uzziah aw, TOPA’ tungah paknamtui hal ding nangma hih ding hi lo hi. Paknamtui hal dingin a ki-ap, Aaron’ suan siampite’ hih ding ahi hi. Biakinn sung panin paikhia in; bang hang hiam cih leh na gamta khial a, hih bang hihna in TOPA Pasian tung panin nang’ tungah pahtawina hong tun lo ding hi,” a ci uh hi.

¹⁹Tua ciangin Uzziah a heh suak hi. Tu-in amah in paknamtui a hal dingin a khut sungah paknamtui beel tawi a, siampite tungah a hehna hangin paknamtui biakna tau gei TOPA’ biakinn sung siampite’ muhin ama taltangah phaknatna hong suakkhia hi.

²⁰Tua ciangin siampi lian Azariah le siampi khempeuh in amah a et uh ciangin a taltangah phaknatna na nei hi. Tua ciangin amaute in manlang takin amah sawnkhia uh a, TOPA in amah vat khin ahih manin amahmah zong a paikhia dingin nawhtat hi.

²¹Tua ahih ciangin a sih ni dong Kumpi Uzziah a phak hi a, amah miphak ahih manin inn tuam khatah a teng hi; bang hang hiam cih leh TOPA’ biakinn panin amah kipuaseh hi. Tua ciangin a tapa Jotham in tua gam mite a uk hi.

²²Tu-in Uzziah’ gamtatna a omlaite, a patna panin a tawp dong, Amoz’ tapa kamsang Isaiah in gelh hi.

²³Uzziah si a, amaute in kumpite’ neihsa hanah vui loin a huang sungah a vui uh hi; bang hang hiam cih leh amaute in, “Amah a phak ahi hi,” a ci uh hi. Tua ciangin a tapa Jotham in ama tangin a uk hi.