Read Tedim Chin 2 KHANG TANGTHU NIHNATE 30 Bible Online

2 KHANG TANGTHU NIHNATE 30 - Tedim Chin bible

2 KHANG TANGTHU NIHNATE 30

¹Israel Pasian, TOPA’ Paisan Pawi a bawl dingin Jerusalem-a TOPA’ biakinn-ah hong pai nadingun Hezekiah in Israel mi khempeuh le Judah mite kiangah mi sawl a, Efraim mite le Manasseh mite tungah zong laikhakte a gelh hi.

²Bang hang hiam cih leh kumpipa le a uliante le Jerusalem-a a kikhawm khempeuh in Paisan Pawi a kha nihna sungin bawl ding kikum khin uh hi.

³Siampite mi a kicingzah ding amau kisiansuah nai lo uh a, mite zong Jerusalem-ah kikhawm nai lo uh ahih manin a hunin bawl thei lo uh hi.

⁴Hih geelna pen kumpipa le a kikhawm khempeuh a dingin hoih leh kilawm hi.

⁵Tua ahih ciangin mite hong pai-in Israel Pasian, TOPA a dingin Jerusalem-ah Paisan Pawi a bawl nadingun Beersheba panin Dan ciang dong Israel sung khempeuhah taangkona khat a bawlna ding uh thukhensatna khat bawl uh hi; bang hang hiam cih leh bawl dinga a kigen bangin amaute in a lianpi-in bawl ngei lo uh hi.

⁶Tua ahih ciangin kumpipa le a uliante kiang pana laikhakte tawh Israel khempeuh le Judah sungah laikhakte tawh pai uh a, kumpipa’ thupiakna: “Israel mite aw, Assiria kumpite’ khutsung panin a suakta, a omlai note’ lamah amah hong kiheikik theih nadingin Abraham, Isaac, le Israel Pasian, TOPA’ lamah kiheikik un.

⁷Note in na theih uh bangin, amau’ pute pate’ TOPA Pasian’ tungah a cihtak lohna uh hangin nakpitakin gim a piak na pute na pate uh le na sanggamte uh bang kei un.

⁸Tu-in na pute na pate uh bangin lungkhauh kei unla, note kiang panin a lauhuai ama hehna a kiheikhiat theih nadingin TOPA’ lamah kipia unla, amah in a tawntung dingin a sianthosaksa a biakinn-ah TOPA na Pasian uh bia un.

⁹Bang hang hiam na cih uhleh TOPA’ lamah note na kilehkik uhleh, na sanggamte uh le na tate un amau a mante’ tung panin hehpihna ngahin hih gamah hong ciahkik ding uh hi. Bang hang hiam cih leh TOPA na Pasian uh dikna le hehpihna a nei hi a, ama lamah na kiheikik nak-uhleh note kiang panin a maitang heikhia lo ding hi,” ci-in a gen uh hi.

¹⁰Tua ahih ciangin Efraim le Manasseh gam sung khuapi khat pan khuapi khat, le Zebulun ciang dongah laitaite a pai uh hi. Ahih hangin amaute in na nuihsanin zahpih uh a, na simmawh bawl uh hi.

¹¹Asher mi, Manasseh, le Zebulun mi tawmkhat bek kiniamkhiatin Jerusalem-ah hong pai uh hi.

¹²TOPA’ thupiakna tawh kumpipa le uliante’ sawlna a sem dingin Judah mite tungah Pasian in lungsim kikhatna a guan hi.

¹³Tua ciangin a kha nihna sungin silngo sawh loh anlum pawi a bawl dingin Jerusalem-ah mihon tampi tak hong pai uh hi.

¹⁴Amaute nasem dingin kipanin Jerusalem-a biakna taute hemkhia uh a, paknamtui halna ding biakna taute khempeuh amaute in lakhia-in Kidron kuamah paai uh hi.

¹⁵Tua ciangin amaute in a kha nihna a ni sawm le li ni-in Paisan Pawi tuuno go uh hi. Tua ciangin biakna vai-in a siangtho nai lo siampite le Levi mite nakpitakin maizum uh hi. Tua ahih ciangin amau mah kisiansuahin TOPA’ biakinn sungah meihal biaknate hong paipih uh hi.

¹⁶Pasian’ mipa Moses’ thukham bangin amaute in amau’ panmun ngei hong la uh a, siampite in Levi mite’ khut tung panin a ngah uh sisan theh uh hi.

¹⁷Bang hang hiam cih leh a kikhawm lakah amau mah a kisiansuah nai lo tampi om uh hi. Tua ahih ciangin TOPA’ tungah a siangtho-in a kibawl nadingun a nin khempeuh a dingin Levi mite in Paisan Pawi tuuno a gawh ding uh kisam hi.

¹⁸Bang hang hiam cih leh mi tampi tak, Efraim, Manasseh, Issakhar, le Zebulun sung pan, amau mah kisiansuah nai lo uh a, ahi zongin ngeina lopi-in amaute in Paisan Pawi ne uh hi. Bang hang hiam cih leh Hezekiah in amaute a dingin thu ngenin, “Ka pute ka pate uh’ Pasian a dik TOPA aw,

¹⁹biakinn sianthona ngeina om bangin lungsim tak tawh nang hong biate khempeuh’ mawhna maisak in,” a ci hi.

²⁰Tua ciangin TOPA in Hezekiah’ thungetna pia-in mite’ mawhna maisak a, gimna ngahsak lo hi.

²¹Tua ciangin Jerusalem-ah a om Israel mite in lungdamna lianpi tawh ni sagih sung silngo sawh loh anlum pawi a bawl uh hi. Tua ciangin Levi mite le siampite in a hatna khempeuh uh tawh TOPA la sak uh a, a ni ni-in TOPA phat uh hi.

²²Tua ciangin Hezekiah in TOPA’ nasepna-ah a siamna hoih uh a lak Levi mite khempeuh tungah hanthotna thu a gen hi. Tua ahih ciangin mite in pawi an ni sagih sung ne uh a, thunuama biakna pia-in a pu a pate uh Pasian, TOPA tungah lungdamna a ko uh hi.

²³Tua ciangin adang ni sagih sung mah tua pawi a bawlthuah lai ding uh a kikhawm khempeuh thukim uh hi. Tua ahih ciangin amaute in lungdamna tawh adang ni sagih sung mah bawlthuah uh hi.

²⁴Bang hang hiam cih leh Judah kumpipa Hezekiah in biakpiak nadingin a kikhawmte tungah bawngtal tulkhat le tuu tulsagih pia a, uliante in a kikhawmte tungah bawngtal tulkhat le tuu tul sawm pia uh hi. Siampite tampi tak amau mah kisiansuah uh hi.

²⁵Judah mi a kikhawm khempeuh, le siampite le Levi mite, le Israel panin a hong paikhia a kikhawm khempeuh, le Israel gam panin a hong paikhia peemtate, le Judah gam sungah a teng peemtate, lungdam uh hi.

²⁶Israel kumpi David’ tapa Solomon hun a kipanin Jerusalem-ah hih bang om ngei lo ahih manin Jerusalem-ah lungdamna lianpi a om hi.

²⁷Tua ahih ciangin siampite le Levi mite dingin mite thupha pia uh a, amau’ awging kiza-in, amau’ thungetna in vantung a a siangtho ama tenna a banto hi.