Read Tedim Chin 2 KHANG TANGTHU NIHNATE 4 Bible Online

2 KHANG TANGTHU NIHNATE 4 - Tedim Chin bible

2 KHANG TANGTHU NIHNATE 4

¹Amah in sumngo biakna tau, a dung pi sawmthum, a vai pi sawmthum, a sang pi sawm le nga a pha khat bawl hi.

²Tua ciangin amah in a kisung tuikuangpi khat zong bawl hi. Tua pen a bem hi a, a gei khat pan a gei khat dong pi sawm le nga pha-in, pi sagih le alang sang a, a kimkot pi sawmli le nga a pha hi.

³Tuikuangpi pualam kimkot pi sawmlinga sungah umgah limte om hi. Tua um gahte gual nihin om a, tuikuangpi a kisunin kisungkhawm pah hi.

⁴Bawngtal sawm le nihte tungah tua tuikuangpi kinga a, thum leilu lam nga a, thum nitumna lam nga-in, thum leitaw lam nga a, thum nisuahna lam nga hi. Tuate tungah a tuikuangpi kinga a, a nunglam uh a sunglamah om hi.

⁵A sahna pen khutpeek mai cia ahi hi; a geivial pen unok tawh a kibang hai geivial bangin kibawl a, tua sungah tui tambong tulguk val ta hi.

⁶Amah in kisilna ding tuikuang dang sawm zong bawl a, leitaw lamah nga, leilu lamah nga a koih hi. Amaute in meihal biakna-a a zatte uh hihte sungah silsiang ding uh a, tuikuangpi pen siampite’ kisilna ding ahi hi.

⁷Tua ciangin amah in a kigelhsa bangin kham meivakkhuam sawm bawl a, biakinn sung leitaw lamah nga, leilu lamah nga a koih hi.

⁸Amah in sabuai sawm zong bawl a, biakinn sung leitaw lampangah nga, leilu lampangah nga koih hi. Tua ciangin amah in kham kuang zakhat bawl hi.

⁹Amah in siampite’ inntual, le inntual lian, le inntual kongkhakte bawl a, a kongkhakte sumngo tawh a zut hi.

¹⁰Tua ciangin amah in inn khang nisuahna lam kiu-ah tuikuangpi koih hi.

¹¹Huram in beelte, kawbiate, le kuangte zong bawl hi. Tua ahih ciangin Huram in Kumpi Solomon a dingin Pasian’ biakinn a bawl nasep a zawhte:

¹²Khuampi nihte, kuang-ukte, le a khuampite lu dawnah a om khuamluzepna nihte, khuampite lu dawnah a om khuamluzepna, kuang-uk nihte a tuam dingin ngen bangin a kibawl nihte,

¹³khuampite tungah a om khuamluzepna kuang-uk nihte a tuam dingin ngen banga kibawl khat a dingin mang kawlsing gual nih ahi ngen banga kibawl nihte a dingin mang kawlsing za lite,

¹⁴tuikuang a kingaknate le tuate tungah a kikoih tuikuangte,

¹⁵tuikuangpi khat, le tua nuai-a a om bawngtal sawm le nihte,

¹⁶TOPA’ biakinn dingin Kumpi Solomon a dingin siapa Huram in a kihal sumngo tawh a bawl beelte, kawbiate, sikkeukate, le hihte a dingin nazat khempeuh ahi hi.

¹⁷Jordan zanglei sung Sukkoth le Zeredah kikal beel lei-ah kumpipa in hihte sungsak hi.

¹⁸Solomon in hih nate tampi tak bawlsak a, sumngo a gikzah kithei zo lo hi.

¹⁹Tua ahih ciangin Solomon in Pasian’ biakinn sunga na khempeuh a bawl sakte: Kham biakna tau, Ompihna Anlum a dingin sabuaite,

²⁰a kigelhsa bangin biakinn sungnung mai-ah vak dingin kham citak meivakkhuamte le a meivakte;

²¹kham hoih pen tawh a kibawl a paakte, a meivakte, le a tehte;

²²kham citak tawh a kibawl a taitehte, kuangte, paknamtui a dingin pakante, le vutluahna ahi hi. Siangtho pen mun pai nading kongkhak sungnungte a’ ding le biakinnpi sung kongkhakte a dingin biakinn kongkhak bilte zong kham tawh a kibawl ahi hi.