Read Tedim Chin 2 KHANG TANGTHU NIHNATE 7 Bible Online

2 KHANG TANGTHU NIHNATE 7 - Tedim Chin bible

2 KHANG TANGTHU NIHNATE 7

¹Solomon a thunget a tawp ciangin, vantung panin meikuang hong paisukin meihal biakna le biakpiaknate kangtum a, tua ciangin TOPA’ minthanna vang biakinn sung hong dim hi.

²TOPA’ minthanna vang biakinn dim ahih manin TOPA’ biakinn sungah siampite lut thei lo uh hi.

³Israel mite khempeuh in meikuang hong paisukin TOPA’ minthanna vang biakinn tungah a om a muh uh ciangin suangphah tungah leilam maingatin kun uh a, Pasian bia-in TOPA’ tungah lungdamna ko-in, “TOPA’ tungah lungdam koh ding hoih hi; bang hang hiam cih leh ama itna kip tawntung hi,” a ci uh hi.

⁴Tua ciangin kumpipa le mi khempeuh in TOPA’ mai-ah biakna pia uh hi.

⁵Kumpi Solomon in biakna-in bawngtal tul sawmnih le tulnih, le tuu tul zakhat le tul sawmnih pia hi. Tua bangin kumpipa le mi khempeuh in Pasian’ biakinn a ap uh hi.

⁶Siampite amau panmun uhah ding uh hi. Levi mite zong, Kumpi David in TOPA tungah lungdam koh nadingin a bawl TOPA’ tungah lasakna ding lasaknate tawh ding uh hi. Bang hang hiam cih leh ama itna kip tawntung hi. David in amau’ nasepna tawh phatnate a bawl ciangin tua bangin hih uh hi. Amaute tawh a kigalsai-ah siampite in peengkulte tum uh a, Israel mi khempeuh zong a ding uh hi.

⁷Tua ciangin Solomon in TOPA’ biakinn mai-ah a om inntual laizang ap hi; bang hang hiam cih leh Solomon in a bawl sumngo biakna tau-ah meihal biakna le a thaute ta zo lo ahih manin tua lai munah amah in meihal biakna le thunuama biakna thaute a pia hi.

⁸Tua hun laitakin Solomon le amah tawh a om Israel khempeuh mihon tampi in Hamath lutna panin Egypt lui ciang dongah ni sagih sung pawi a kham uh hi.

⁹Tua ciangin a ni giat ni-in amaute in a thukhupna khat nei uh hi; bang hang hiam cih leh amaute in biakinn apna ni sagih sung pawi kham uh a, tua pawi ni sagih sung kibawl hi.

¹⁰A kha sagihna a ni thum ni-in, TOPA in David le Solomon, le ama mi Israel tungah a hoih a bawlna hangin amah in lungdamna le kipakna tawh a inn uhah mite a ciahsak hi.

¹¹Tua bangin Solomon in TOPA’ biakinn le kumpi inn zo hi. Solomon in TOPA’ biakinn le ama inn sungah hih dinga a geel khempeuh nuamtakin zo hi.

¹²Tua ciangin zanin Solomon tungah TOPA kilangin ama kiangah, “Na thungetna ka za khin a, keima-a’ dingin biakpiakna inn dingin hih mun ka teel khin hi.

¹³Keimah in vantungte khakcipin guah a zuk loh ciang ahi a, gam sung a netum dingin kauphe thu ka piak ciang ahi a, ka mite lakah natna ka tunsak ciang ahi zongin,

¹⁴keima minin a kisam ka mite amau mahmah kiniamkhiatin, thu ngenin ka mai hong zong a, amau’ gitlohnate panin a kihei uhleh, keimah in vantung panin ka za ding a, amaute’ khialhna maisakin a leitang uh ka hoihsakkik ding hi.

¹⁵Tu-in ka mitte hakin hih lai munah a kingen thungetna ka bilte in ngai ding hi.

¹⁶Bang hang hiam cih leh a tawntungin ka min a om theih nadingin keimah in hih biakinn teelin ka ap khin a, ka mit tawh enin ka lungsim a tawntungin tua lai-ah om ding hi.

¹⁷Nang a dingin ahihleh, na pa David a gamtat bangin keima mai-ah na gamtat a, nang kong sawl khempeuh bangin semin, ka thukhamte le ka biakna ngeina kipte na zuih leh,

¹⁸na pa David tawh kiciamin, ‘Israel a uk dingin mi khat zong na kitasam kei ding hi,’ ka cih bangin na kumpi tokhom ka kipsak ding hi.

¹⁹Ahih hangin note kihei-in, na mai uhah ka koihsa ka thukhamte leh ka thupiaknate nusia a, pai-in pasian dangte’ na semin tuate na biak uhleh,

²⁰note’ tungah kong piaksa leitang panin note kong botkhia ding hi. Tua ciangin ka min dingin ka apsa hih biakinn ka muhna panin ka lawnkhia ding a, mi khempeuh lakah paunak le gentehna ka suaksak ding hi.

²¹“Tua ciangin a minthangsa hih biakinn a nawkkha khempeuh in lamdangsa-in, ‘Bang hangin hih bangin TOPA in hih gam le hih biakinn bawl ahi hiam?’ ci ding uh hi.

²²Tua ciangin amaute in, ‘Bang hang hiam cih leh Egypt gam panin amaute a paikhiatpih a pu a pate uh Pasian ahi TOPA amaute in nusia uh a, pasian dangte pom uh a, tuate bia-in a na sem uh hi. Tua ahih ciangin amah in hih bang siatna khempeuh amaute tungah tungsak hi,’ ci ding uh hi,” a ci hi.