Read Tedim Chin 2 KHANG TANGTHU NIHNATE 8 Bible Online

2 KHANG TANGTHU NIHNATE 8 - Tedim Chin bible

2 KHANG TANGTHU NIHNATE 8

¹Solomon in TOPA’ biakinn le ama inn a lam khit kum sawmnih a cin ciangin,

²Kumpi Hiram in ama tungah a piaksa khuapite Solomon in lampha-in tuate sungah Israel mite tengsak hi.

³Tua ciangin Hamathzobah-ah Solomon pai-in tua gam a la hi.

⁴Amah in sehnel gam sungah Tadmor khua satin Hamath gam sungah vankoihna khuapite khempeuh a lam hi.

⁵Amah in khuapi kulh, kongpite, le zawlte a nei Bethhoron Tungnung leh Bethhoron Nuainung,

⁶le Baalath, le Solomon’ neih vankoihna khuapite khempeuh, a leengte a’ ding khuapite khempeuh, a sakol tuangte a’ ding khuapite, le Solomon in Jerusalem, Lebanon sung, le ama ukna gam sung khempeuhah a lamnop khempeuh zong a lam hi.

⁷Israel ahi lo Hit mite, Amor mite, Perez mite, Hiv mite, le Jebus mite sung panin a omlai,

⁸Israel mite in a suksiat nai loh amau nungah a suanlekhakte uh tua gam sungah a omlaite, Solomon in aana tawh siah a pia dingin bawl a, tua bangin tuni dongin amaute om uh hi.

⁹Ahih hangin Israel mite ahihleh Solomon in ama na a sem dingin salin bawl lo hi. Amaute pen galkapte, ama nuai-ah uliante, a leengte a ukte, le a sakol tung tuangte ahi uh hi.

¹⁰Kumpi Solomon’ ulian, mite’ tungah aana a zang mihing zanih le sawmnga a om uh hi.

¹¹Solomon in David khuapi panin Faro’ tanu ama zi paipihin ama a’ dingin a lamsak inn-ah tunpih hi; bang hang hiam cih leh amah in, “TOPA’ Thuciamna Singkuang a tunnasa munte a siangtho ahih manin Israel kumpi David’ inn sungah ka zi teng lo ding hi,” a ci hi.

¹²Tua ciangin Sabbath nite, Khadet nite, le kum simin a kinei pawi thum - silngo sawh loh anlum pawi, nipikal pawi, le biakbuk pawite a dingin Moses’ thupiakna tawh kizui-in nisimin piakna nasep ding a kisam ahih mah bangin innliim mai-a a lam TOPA’ biakna tau tungah Solomon in meihal biakna TOPA tungah a pia hi.

¹⁴A pa David’ biakna ngeina kip tawh kizui-in, nasep nadingin siampite a pawlpawlin a kikhennate, le nisim nasepna-ah a kisam bangin siampite’ mai-ah Levi mite phatna lasak panmunte le kongpi tampite-a’ dingin kongcingte amau’ pawl kikhenna ciatah amah in seh hi; bang hang hiam cih leh tua bangin Pasian’ mipa David in thu pia hi.

¹⁵Thu khat peuhpeuh le vanmanpha koihnate tawh kisai-in kumpipa in siampite le Levi mite a thupiakna bang teekteekin amaute in a sem uh hi.

¹⁶Tua bangin TOPA’ biakinnpi a kiphuh ni a kipan a kizawh dongin Solomon’ nasep khempeuh kimansiang hi. Tua ahih ciangin TOPA’ biakinn kizo hi.

¹⁷Tua ahih ciangin Edom gam sung tuipi gei-a om Eziongeber le Eloth khuate-ah Solomon pai hi.

¹⁸Tua ciangin Kumpi Hiram in teembawte le tuipi a thei a nasemte tawh ama nasemte sawl a, Solomon’ nasemte tawh Ofir-ah paikhawmin tua lai panin kham talen zali le sawmnga pua-in Kumpi Solomon kiang a tunpih uh hi.