Read Tedim Chin EZRA 8 Bible Online

EZRA 8 - Tedim Chin bible

EZRA 8

¹Kumpi Artakzaksis’ uk hun sungin Babylon panin kei tawh hong ciahto khawm a behbehin a kiciamteh beh lutangte hih bang ahi hi:

²Gershom: Finehas-te beh pan ahi hi. Daniel: Ithamar-te beh pan ahi hi. Hattush: David-te beh panin Shekaniah’ tapa ahi hi.

³Zekhariah: Parosh-te beh sung pan hi a, amah tawh pasal zakhat le sawmnga kiciamteh hi.

⁴Eliehoenai: Pahathmoab-te beh panin Zerahiah’ tapa hi a, pasal zanih tawh ahi hi.

⁵Shekaniah: Zattu-te beh panin Jahaziel’ tapa hi a, pasal zathum tawh ahi hi.

⁶Ebed: Adin-te beh panin Jonathan’ tapa hi a, pasal sawmnga tawh ahi hi.

⁷Isaiah: Elam-te beh panin Athaliah’ tapa hi a, pasal sawmsagih tawh ahi hi.

⁸Zebadiah: Shefatiah-te beh panin Mikhael’ tapa hi a, pasal sawmgiat tawh ahi hi.

⁹Obadiah: Joab-te beh panin Jehiel’ tapa hi a, pasal zanih le sawm le giat tawh ahi hi.

¹⁰Shelomith: Bani-te beh panin Josifiah’ tapa hi a, pasal za le sawmguk tawh ahi hi.

¹¹Zekhariah: Bebai-te beh panin Bebai’ tapa hi a, pasal sawmnih le giat tawh ahi hi.

¹²Johanan: Azgad-te beh panin Hakkatan’ tapa hi a, pasal za le sawmkhat tawh ahi hi.

¹³Elifelet, Jeiel, le Shemaiah: A hong nungpai Adonikam-te beh zong hi uh a, pasal sawmguk tawh ahi uh hi.

¹⁴Uthai le Zabbud: Bigvai-te beh pan hi uh a, pasal sawmsagih tawh ahi uh hi.

¹⁵Ahava gam lamah a luang lui gei khatah amaute ka khawm a, tua lai-ah ni thum sung ka tam uh hi. Mite le siampite ka etphat ciangin Levi mite khat zong na om lo hi.

¹⁶Tua ahih ciangin a lawmte lakah a makai, Eliezer, Ariel, Shemaiah, Elnathan, Jarib, Elnathan, Nathan, Zekhariah, le Meshullam-te, le thu ngaihsut siam Joiarib le Elnathan-te ka sam a,

¹⁷Kasifia mun a a makai pa Iddo kiangah va pai-in, tua lai-a biakinn nasem amah le a behte in, eite’ Pasian’ biakinn-a na a sem ding mihing hong puak ding uh a ngen dingin ka sawl hi.

¹⁸Tua hi a, hehpihna a nei eite’ Pasian in hong ompih ahih manin Levi mi Mahli-te beh sung panin thu ngaihsutsiam mi ahi Sherebiah, a tapate le a behte tawh pasal sawm le giat,

¹⁹le Merari-te beh panin Isaiah, a behte le amau’ tapate mi sawm le nih le Hashabiah tawh,

²⁰Levi mite’ na a sem dingin David le a uliante in a tuamkoih ahi biakinn nasem zanih le sawmnih hong pia hi. Hih mite khempeuh amau’ min ciat tawh a kisam ahi hi.

²¹Tua ciangin eite’ Pasian’ mai-ah kote kiniamkhiat thei-in, kote le ka naupangte uh le ka neihsa khempeuh uh nuamtakin ka khualzinna uhah ka pai theih nading uh Pasian’ tung pan ka nget theih nadingun Ahava lui-ah an tanna ding thu ka taangko hi.

²²Bang hang hiam cih leh kumpipa kiangah, “Ka Pasian un amah a zong mite khempeuh ompihin amau a dingin a hoih na sem a, amah a nusiate khempeuh tungah amah heh hi,” ci-in gen khin ka hih manun lampi-ah kote hong kha dingin galkapte le sakol tung tuangte kumpipa kiangah ka nget ding ka mai a zum hi.

²³Tua hi a, kote in an ka tang uh hi. Nuamtakin khual ka zin theih nading uh i Pasian’ tungah ka ngen uh a, amah in ka thungetna uh hong pia hi.

²⁴Tua ciangin siampi liante sung panin mi sawm le nih - Sherebiah, Hashabiah, le amau’ behte mi sawm ka tuamkoih hi.

²⁵Tua ciangin i Pasian’ biakinn nasep nadingin kumpipa le a thu lamlakte le a uliante le tua lai-a a om Israel mi khempeuh in a tuam khen ciat uh ngun le kham le umlebeelte, amaute tungah ka ap hi.

²⁶Amaute tungah ka apte: Ngun talen zaguk sawmnga, talen nih a gik ngun tawh a kibawl umlebeel zakhat, kham talen zakhat,

²⁷kham darik tulkhat man tawh a kibawl kuang-uk sawmnih, le kham zahin a manpha sumsan hoih tawh a kibawl beel nih ahi hi.

²⁸Tua ciangin amaute kiangah, “TOPA tungah note hong ki-ap hi. Umlebeelte zong biakna vante ahi hi. Ngun le khamte ahihleh na pu na pate uh Pasian ahi TOPA tungah citna tawh a kipia na ahi hi.

²⁹Siampi liante, Levi mite, le Israel mi beh lutangte’ muhin Jerusalem khua-ah TOPA’ biakinn dei sungah na puak dong mateng uh vilin kem un,” ka ci hi.

³⁰Tua ahih manin siampite le Levi mite in Jerusalem-a i Pasian’ biakinn-ah puak dingin ngun, kham, le umlebeelte a hong sang uh hi.

³¹Tua ciangin Jerusalem a zuan dingin kha masa a ni sawm le nih ni-in Ahava lui panin ka ding khia uh hi. I Pasian in kote hong ompih ahih manin lamkalah galte le pansimna a tuamtuamte tawh hong kipelhsak hi.

³²Jerusalem khua ka tun uh ciangin ni thum sung ka tawlnga uh hi.

³³A ni li ni-in Uriah’ tapa siampi Meremoth’ tavuan lakna tawh i Pasian’ biakinn sungah ngun, kham, le umlebeelte kiseng hi. Finehas’ tapa Eleazar in amah huh a, Levi mi Jeshua’ tapa Jozabad le Binnui’ tapa Noadiah in amau tegel huh uh hi.

³⁴Vante a ki-ap ciangin limtakin kivel a, a ki-ap na khempeuh ciaptehna lai khat kibawl hi.

³⁵Tua ciangin salsuahna panin inn hong zuankik mite in Israel-te khempeuh a dingin Israel Pasian tungah meihal biakna-in bawngtal sawm le nih, tuutal sawmkua le guk, tuuno sawmsagih le nih, le mawhna hanga biakna-in keeltal sawm le nih a pia uh hi. Hihte khempeuh pen TOPA’ tungah meihal biakna ahi hi.

³⁶Amaute in Eufratis Gungal gam sung tenga kumpipa’ nuai-ah a uksawn a lian pente le uliante tungah kumpipa’ thupiaknate zong a va gen uh hi. Tua hi a, amaute in mite le Pasian’ biakinn lam nasep a huh uh hi.