Read Tedim Chin NEHEMIAH 2 Bible Online

NEHEMIAH 2 - Tedim Chin bible

NEHEMIAH 2

¹Kumpi Artakzaksis’ kum sawmnihna Nisan kha sungin khatvei, a leenggahzu a baihsa-in a om khit ciangin la-in kumpipa ka pia a, ama mai-ah ka om laitakin ka mai a khing hi.

²Amah in, “Cina lopi-in bang hangin na mai khing ahi hiam? Na dahna khat om hi ding hi,” hong ci hi. Tua ciangin lau mahmahna tawh

³kumpipa ka dawng a, “Kumpipa nungta tawntung in. Ka pute ka pate a kivuina khuapi siagawp a, a kongpite kangtum ahih ciangin maikhing loin bangci om theih ding ka hi hiam?” ka ci hi.

⁴Tua ciangin kumpipa in, “Kei tungah bang hong ngen nuam na hi hiam?” hong ci hi. Kei zong ka lungsim tawngah vantung Pasian kiangah thu ka ngen a,

⁵tua khit ciangin kumpipa dawngin, “Kumpipa na lung a kim a, dik na sak leh, ka puahphatkik theih nadingin Judah gam sung ka pute ka pate a kivuina khuapi-ah nong paisakna ding kong thum hi, topa,” ka ci hi.

⁶Tua ciangin kumpipa in (kumpinu a gei-ah tukawmin), “Bang tanvei sawt ding a, cik ciangin hong ciahkik thei ding na hi hiam?” ci-in hong dong hi. Tua ahih ciangin kumpipa in ka ngetna hong thukimpih a, kei zong ka ciahkik ding hun ka gen hi.

⁷Tua ciangin kumpipa kiangah, “Kumpipa na thukim leh, Judah gam ka tun dong amaute in hong paisuaksak theih nadingun Eufratis Gungal gam sung a uksawn mite ka piak ding laikhakte,

⁸le biakinn hutna ding munmuanhuai kongpi ding, khuapi kulh ding, le ka omna ding inn lam nadingin sing hong piaktheih nadingin kumpipa’ tulak a kem Asaf’ tungah piak ding laikhak zong, kei tungah hong pia in,” ka ci hi. A dik ka Pasian in kei hong ompih ahih manin kumpipa in ka ngette hong pia hi.

⁹Tua ahih ciangin Eufratis Gungal gam a uksawn mite kiang ka tung a, kumpipa’ laikhakte amaute tungah ka pia hi. Kumpipa in galkapmangte le sakol galkapte kei hong khasak hi.

¹⁰Ahi zongin Israel mite’ phattuamna ding a sem dingin mi khat a paina thu Horonaim khuami Sanballat le Ammon mi sal ahi Tobiah in a zak uh ciangin nakpitakin lungkim lo uh hi.

¹¹Jerusalem khua ka tun ciangin ni thum sung ka tawlnga hi.

¹²Tua ciangin zanin vakkhia-in mi tawmkhat ka tonpih hi. Ahi zongin Jerusalem a dingin ka bawlsak ding ka Pasian in ka lungsimah hong suahsak thu kuama kiangah ka gen kei hi. Keima tuanna simloh ganhing dang ka kizuisak kei hi.

¹³Kuam Kongpi tawnin Gulpi Tuikhuk le Nin Kongpi lamah ka pai a, a kicimsa Jerusalem kulhpi le mei in a kattumsa a kongpite ka en hi.

¹⁴Tua ciangin Tuinak Kongpi le Kumpipa’ Bual-ah ka paisuak hi. Ahi zongin ka tuanna ganhing a paisuak theih nading mun om lo hi.

¹⁵Tua hi a, a zanpi mahin kuam lampi-ah pai-in khuapi kulh ka vel hi. Tua ciangin Kuam Kongpi mah tawnin khuapi sungah ka lutkik hi.

¹⁶Tua hi a, khuasung upate in ka paina mun ahi a, ka sep ahi zongin thei lo uh hi; bang hang hiam cih leh hih nasep tavuan a la ding Judah mite, siampite, uliante, khuasung upate, le a dangte tungah ka gen nai kei hi.

¹⁷Tua ciangin amaute kiangah, “I lungkhamna thu na thei uh hi. Jerusalem a siasa-in omin, a kongpite mei in kangtum hi. Hong pai un, zahkona i ngah nawn loh nadingin Jerusalem kulh ciangpha ni,” ka ci hi.

¹⁸Tua ciangin a dik ka Pasian in kei hong ompihna le kumpipa in kei tungah hong gen thute zong amaute tungah ka gen hi. Tua ciangin amaute in, “Tu-in nasep kipan pah ni,” hong ci uh hi. Tua ahih ciangin lawp mahmahna le ngimna hoih tawh nasep a kipan uh hi.

¹⁹Ahi zongin Horonaim khuami Sanballat, Ammon mi sal ahi Tobiah, le Arab gammi ahi Geshem in tua thu a zak uh ciangin, kote zahpihna le simmawhna tawh, “Hih na sep uh bang ahi hiam? Kumpipa lehpan’ na hi uh hiam?” hong ci uh hi.

²⁰Tua ciangin amaute dawngin, “Vantung Pasian in ka maa uh hong telhsak ding a, ko ama nasemte in nasep a kipan ta ka hi uh hi; note in ahihleh Jerusalem tawh kisai-in thu na neih theih nadingun bangmah kimematna na nei kei uh hi,” ka ci hi.