Read Tedim Chin NEHEMIAH 3 Bible Online

NEHEMIAH 3 - Tedim Chin bible

NEHEMIAH 3

¹Tua ciangin siampi lianpen pa Eliashib le a siampipihte in nasep kipanin Tuu Kongpi a bawl uh hi. Amaute in a khuamte le a zawlte bawlin a kongkhakte bulh uh hi. Amaute in Za Khat Tausang ciang banah Hananel Tausang dong sem uh a, tua ciangin Pasian’ tungah ap uh hi.

²A zomah Jerikho khua mite in sem uh hi. Amaute’ zomah Imri’ tapa Zakkur in sem hi.

³Tua ciangin Hassenaah’ tapate in Ngasa Kongpi bawl uh hi. Amaute in a zawlte khungin a kongkhakte a kalhna bulh uh hi.

⁴Amaute’ zomah Hakkoz’ tapa Uriah, a tapa Meremoth in ama khawk sung puah hi. Tua zomah Meshezabel’ tapa Berekhiah, a tapa Meshullam hi a, tua zomah Baana’ tapa Zadok in puah hi.

⁵A zom kikah Tekoa khua mite in puah uh a, ahi zongin amau’ uliante in a tote uh sawl bangin sem nuam lo uh hi.

⁶Tua ciangin Paseah’ tapa Joiada le Besodeiah’ tapa Meshullam in Jeshanah Kongpi puah uh a, a zawlte khungin a kongkhakte a kalhna bulh uh hi.

⁷Amaute’ zomah Gibeon le Mizpah khuami ahi, Gibeon mi Melatiah le Meronoth khuami Jadon in Eufratis Gungal gam a uksawn pa’ zum dong puah uh hi.

⁸Tua zomah khamseek pa Harhaiah’ tapa Uzziel in puah a, a zomah paknamtui bawlpa Hananiah in puah hi. Amaute in Kulh Zai ciang dong a ngeina bangin Jerusalem bawlkik uh hi.

⁹Amaute’ zomah Jerusalem gam phelkhat a uk, Hur’ tapa Refaiah in puah hi.

¹⁰A zomah Harumaf’ tapa Jedaiah in ama inn mai san teng puah hi. Tua ciangin a zomah Hashabneiah’ tapa Hattush in puah hi.

¹¹Harim’ tapa Malkhijah le Pahathmoab’ tapa Hasshub in Meikhuk Tausang a huam khawk dang khat sung puah uh hi.

¹²Amaute’ zomah Jerusalem gam a phelkhat a uk, Hallohesh’ tapa Shallum in a tanute tawh a puah uh hi.

¹³Hanun le Zanoah khua-a teng mite in Kuam Kongpi puah uh hi. Amaute in tua kongpi bawlpha-in a kongkhakte a kalhna bulh uh a, Nin Kongpi ciang dong pi tul le pi zanga sung kulh a puah uh hi.

¹⁴Bethhakkherem gam a uk, Rekhab’ tapa Malkhijah in Nin Kongpi puah a, tua kongpi bawlpha-in a kongkhakte a kalhna a bulh hi.

¹⁵Mizpah gam a uk, Kolhozeh’ tapa Shallum in Tuinak Kongpi puah a, tua kongpi bawlpha-in a kongkhakte a kalhna bulh hi. Tua ciangin amah in kumpipa’ huan gei-a kulh ciang a, David khuapi pana hong paisuk kahlei ciang dong a sem hi.

¹⁶Ama zomah Bethzur gam phelkhat a uk, Azbuk’ tapa Nehemiah in David’ han san ciang, a kibawl tawm bual le Galkap Inn ciang dong puah hi.

¹⁷Ama zomah a puah Levi mite: Bani’ tapa Rehum hi a, ama zomah Keilah gam phelkhat a uk Hashabiah in ama gam tangin puah hi.

¹⁸Ama zomah a puah a behte: Keilah gam phelkhat a uk, Henadad’ tapa Bavvai in puah hi.

¹⁹A zomah Mizpah gam a uk, Jeshua’ tapa Ezer in a Kiu-a galvan koihna kahtohna san khawk khat puah hi.

²⁰Ama zomah Zabbai’ tapa Baruk in a Kiu panin siampi lianpen pa Eliashib’ inn kongkhak ciang dong khawk khat sung puah hi.

²¹Ama zomah Hakkoz’ tapa Uriah, a tapa Meremoth in Eliashib’ inn kongkhak panin Eliashib’ innmong ciang dong khawk khat sung puah hi.

²²Ama zomah Jerusalem kiimnai-a om siampite in puah uh hi.

²³A zomah Benjamin le Hasshub in amau’ inn mai san puah uh hi. A zomah Ananiah’ tapa Maaseiah, a tapa Azariah in ama inn gei san teng puah hi.

²⁴Ama zomah Henadad’ tapa Binnui in Azariah’ inn panin a Kiu,

²⁵le kulh kiu ciang khawk khat sung puah hi. Uzai’ tapa Palal in a Kiu gal san teng le kumpipa’ inn panin hong dawkkhia, zumcingte’ omna ahi tausang tungnung teng puah hi.

²⁶Ama zomah Parosh’ tapa Pedaiah in nisuahna lam manawhin Tui Kongpi gal san ciang le tausang dawk puah hi.

²⁷Ama zomah Tekoa khuamite in a lian tausang dawk panin Ofel mualbo kulh ciang, khawk dang khat sung puah uh hi.

²⁸Sakol Kongpi tung san teng ahihleh siampite in amau’ inn mai san ciat puah uh hi.

²⁹Amaute’ zomah Immer’ tapa Zadok in ama inn mai san puah hi. Ama zomah Nisuahna Kongpi a cing, Shekaniah’ tapa Shemaiah in puah hi.

³⁰Ama zomah Shemaiah’ tapa Hananiah le Zalaf’ tapa gukna Hanun in khawk dang khat sung puah uh hi. Amau zomah Berekhiah’ tapa Meshullam in ama inndei mai san teng puah hi.

³¹Ama zomah khamseek pa Malkhijah in Kikaihkhopna Kongpi mai sana om biakinn nasemte’ inn le sumbukte’ inn ciang, le a kiu-a inndei tungnung ciang dong puah hi.

³²Tua ciangin khamseekte le sumbukte in a kiu-a inndei tungnung le Tuu Kongpi kikal a puah uh hi.