Read Tedim Chin NEHEMIAH 4 Bible Online

NEHEMIAH 4 - Tedim Chin bible

NEHEMIAH 4

¹Sanballat in kote’ kulh cianna thu a zak ciangin lungkim loin heh mahmah a, ko Jew mite hong zahko hi.

²Amah in a kikholhpihte le Samaria galkapte’ kiangah, “Hih Jew mi niangnuangte in bang hih ding a kipan ahi uh hiam? Hih mun a bawlpha dinga kingaihsun ahi uh hiam? Biakpiakna hangin a nasep uh ni khat sungin zo dingin kilamen ahi uh hiam? Amaute in a kangtumsa ninbulomtang panin suangtum bawlkik thei ding ahi uh hiam?” ci hi.

³Ama kiangah a om Ammon mi Tobiah in, “Amaute in bangbang ciang ta le amau’ kulh cian’ tungah ngia khat kah leh kicim lel ding hi,” ci hi.

⁴Tua ciangin keimah Nehemiah in thu ka ngen a, “Hong za in, kote’ Pasian aw; kote hong kisimmawh hi. Kote hong zahkona amau’ lu tungah lehtuksak inla, gamdang khatah sal suakin mi’ bawlsiatin amaute omsak in.

⁵Amaute in a langtangin kulh ciangte’ mai-ah nang hong hehsak uh ahih manin amau’ mawhna maisak kei inla, na ciaptehna panin zong a mawhna uh sumit kei in,” ka ci hi.

⁶Tua ahih ciangin kulh ka ciang uh a, nasep a kimciang bang kizo hi. Mite in utna lungsim tawh sem uh hi.

⁷Ahi zongin Sanballat, Tobiah, Arab mite, Ammon mite, le Ashdod mite in Jerusalem kulh cian’ nasep kizom suakin, kulh vang teng huk ding a kipat khitna thu a zak uh ciangin heh mahmah uh hi.

⁸Tua hi a, Jerusalem hong simin buaina a piangsak dingin amaute kipawlin vaihawmna khat nei uh hi.

⁹Tua ahih ciangin ka Pasian uh tungah thu ka ngen uh a, amaute a en dingin sun le zanin galvil ka koih uh hi.

¹⁰Tua ciangin Judah gam mite in, “Nasemte a tha uh zaw ta a, ahi zong nin tampi omlai hi. Eima tha tawh kulh cian’ i zo ngei kei ding hi,” hong ci uh hi.

¹¹Tua ciangin ka galte un, “Amau’ phawk loh kalun amaute lakah pai-in i that ding a, a nasep uh i beisak ding hi,” hong ci uh hi.

¹²Amaute lakah a teng Jew mite khuapi sungah hong pai ciangin, ka galte uh a omna khempeuh ciat panun hong pai-in kote hong simna ding thu, sawmvei tak hong hilhkhol uh hi.

¹³Tua ahih ciangin kulh nunglam mun niam penna mun awng tengah a namsau uh, a teipi uh, le a thal uh tawh, a innkuan kuanun ka mite ka pangsak hi.

¹⁴Mite’ launa ka muh ciangin, uliante, mi ukte, le mi khempeuh tungah, “Amaute kihta kei un. Na sanggamte, na tapate, na tanute, na zite uh, le na inn na lote uh a dingin hong dosak, a lian a kihtakhuai TOPA phawk un,” ka ci hi.

¹⁵Amau’ hong sawmna thu kote in ka phawkna uh le Pasian in amau’ geelna a suksiatna thu ka galte un thei uh hi. Tua ahih ciangin ka nasepna ciat uh kulh tungah ka vekpi-un ka kuankik uh hi.

¹⁶Tua hun a kipanin ka khutnuai-a om mite kimkhat in na sem a, a kimkhat in a teipite, a lumte, le a thalte uh tawi-in sik puan silhin ding uh a, uliante in kulh a ciang Judah mi khempeuh uk uh hi.

¹⁷Kulh-a cian’ ding na a nawn mite in a khut langkhat uh tawh a van puak uh lenin a khut langkhat uhah galhiam tawi uh hi.

¹⁸Kulh ciangte in na a sep kawmun a kawng ciat uhah a namsau uh kuah uh hi. Peengkul tum pa ahihleh keima kiangah om hi.

¹⁹Tua ciangin mi liante, mi ukte, le mi khempeuh tungah, “I nasepna lian a, zaipi tak huam hi; eite kulh tungah kikhenin khatlekhat i kigamla hi.

²⁰Peengkul kitum na zakna peuhpeuh panun ko kiangah hong kikhawm un. I Pasian in eite a dingin hong dosak ding hi,” ka ci hi.

²¹Tua hi a, nisimin khuavak a kipan nitak aksi suah dong, mi kimkhat in teipi tawi-in, mi kimkhat in na ka sem uh hi.

²²Tua hun mahin mite kiangah, “Zanin galvil, sunin nasemin hong om theih nadingun mi khempeuh na nasemte ciat uh tawh Jerusalem khua sungah hong giak un,” ka ci hi.

²³Tua ahih ciangin keimah a kipan ka behte, ka nasemte, le kei hong cingte, a kuamah peuh puan suah man om loin, mi khempeuh in ka khut uhah galhiam ka tawi den uh hi.