Read Tedim Chin NEHEMIAH 8 Bible Online

NEHEMIAH 8 - Tedim Chin bible

NEHEMIAH 8

¹Kha sagihna hong cin ciangin Israel mite amau’ khuapi ciatah teng khin uh hi. Tua ciangin Tui Kongpi mai tualpi-ah mi khempeuh khekhat khai bangin hong kikhawmtuah diam hi. Tua ciangin TOPA in Israel mite tungah a piak ahi Moses thukham laibu pen laithei pa Ezra in hong paipih nadingin a gen uh hi.

²Tua hi a, a kha sagihna a ni khat ni-in numei pasal, le thu theitel thei ding a kikhawm khempeuh mai-ah siampi Ezra in thukham laibu hong paipih hi.

³Tua ciangin amah in Tui Kongpi mai-a om tualpi lam mai ngatin zingsang tung a kipan sun ciang dong, numei pasal le thu a tel thei ding mite’ zakin tua laibu sunga thute sim a, mi khempeuh in tua thukham laibu sunga thu kisimte limtakin a ngai uh hi.

⁴Tua ciangin thugenna dinga sing tawh kibawl tau tungah laithei pa Ezra dingto a, ama taklam pangah Mattithiah, Shema, Anaiah, Uriah, Hilkiah, le Maaseiah ding uh a, a veilam pangah Pedaiah, Mishael, Malkhijah, Hashum, Hashbaddanah, Zekhariah, le Meshullam a ding uh hi.

⁵Mi khempeuh sangin a sangzaw munah amah om ahih manin mi khempeuh’ muh theih dingin Ezra in a laibu a hong hi. A laibu a hon ciangin mi khempeuh a ding uh hi.

⁶Tua ciangin Ezra in a lian Pasian, TOPA thupha pia a, mi khempeuh in a khut uh laamto-in, “Hi tahen. Hi ta hen,” ci-in a dawng uh hi. Tua ciangin a lu uh kunin leilam maingatin TOPA a bia uh hi.

⁷Mite amau’ omna san ciatah a om sungun mite in thukham a tel theih nadingun Levi mi Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan, le Pelaiah-te in a khiatna a gen uh hi.

⁸Amaute in Pasian’ thukham laibu sung panin a kitel takin sim uh a, a cihnopna a kitelin gen uh a, tua a kisim thute a tel nadingun a hilh uh hi.

⁹Tua ciangin a gam ukpa Nehemiah, laithei pa lah hi-in siampi lah ahi Ezra, le mite a hilh Levi mite in amaute khempeuh kiangah, “Tuni pen TOPA note’ Pasian a dingin biakna ni siangtho ahi hi; a kap a mau om kei un,” a ci hi. Bang hang hiam cih leh thukham kammalte a zak uh ciangin mi khempeuh kap uh hi.

¹⁰Tua ciangin amah in amaute kiangah, “Tu-in ciah un. Anlim tuilim ne-in thadim unla, a nei zo lote zong va kholh un; bang hang hiam cih leh i TOPA a dingin tuni pen biakna ni siangtho ni ahi hi; dah kei un, bang hang hiam cih leh TOPA’ hong piak lungdamna in note hong thahatsak ding hi,” a ci hi.

¹¹Tua ahih ciangin Levi mite in mite gamdaisak a, “Daitakin om un; bang hang hiam cih leh tuni pen biakna ni siangtho ni ahi hi; dah kei un,” a ci uh hi.

¹²Tua ahih ciangin mi khempeuh anne tuidawnin midangte a kholh ding le lungdam a om dingin a ciah uh hi; bang hang hiam cih leh amaute tungah a kigen thute amaute in a theitel uh hi.

¹³A ni nih ni-in thukham sin dingin siampite le Levi mite tawh beh lutang khempeuh laithei pa Ezra kiangah hong kikhawm uh hi.

¹⁴Tua ciangin, a kha sagihna pawi hun sungin sawlbuk sungah Israel mite a omna ding thu, le amaute in a khuapi khempeuh uh le Jerusalem-ah taangko-in, “A kigensa bangin sawlbuk lam nadingin gamlakah pai unla oliv hiangte, gamlak oliv hiangte, mui sing hiangte, le a teh tam singhiang dangte va sat un,” ci-in a gen ding uh, Moses tungtawnin TOPA in a thupiakna pen thukham sungah a kigelh lam a mu uh hi.

¹⁶Tua ahih ciangin mite kuankhia-in tua singhiangte hong pua-in amau’ innkhumzang ciat, le a inntual uh le Pasian’ biakinn tual, Tui Kongpi tual, le Efraim Kongpi tualah sawlbuk a lam uh hi.

¹⁷Tua hi a, salsuahna panin a hong ciahkik a kikhawm mite khempeuh in sawlbuk lamin tuate sungah om uh hi; bang hang hiam cih leh Nun’ tapa Joshua’ hun a kipanin tua ni dongin Israel mite in tua bangin hih ngei lo uh hi. Tua hi a, amaute lungdam mahmah uh hi.

¹⁸Tua hi a, a kipat ni a kipan a bei ni dong Ezra in ni simin Pasian’ thukham laibu a simkhia hi. Amaute in ni sagih sung tua pawi kham uh a, a ngeina om bangin a ni giat ni-in pawi khupna thupi kikhopna khat a om hi.