Read Tedim Chin ESTHER 2 Bible Online

ESTHER 2 - Tedim Chin bible

ESTHER 2

¹Hih thu teng a pian’ khit, Kumpipa Ahasueras’ hehna a dam ciangin, amah in Vashti phawkin, Vashti’ gamtatna le amah tawh kisai-in a thupiakna zong thei hi.

²Tua ahih ciangin kumpipa’ nasemte in ama kiangah, “Kumpipa a dingin a melhoih nungak khangnote zongsak in.

³Kumpi khua ahi Susa khuapi-a numeite’ omna-ah a melhoih nungak khangno khempeuh hong paipih nadingun na ukna gam tuamtuam khempeuhah uliante sawl in. Tua numeite pen numeite a uk, kumpipa’ innsungmang Hegai’ kep dingin ki-ap hen. Tua ciangin tua numeite tungah paknamtui tuamtuam kiguan’ hen.

⁴Tua sung panin kumpipa’ deih bel nungak pen Vashti’ tangin kumpinu suak hen,” a ci uh hi. Kumpipa in hih ngaihsutna hoihsa a, tua bangin a gamta hi.

⁵Tu-in kumpi khua Susa khuapi sungah Benjamin minam Kish, a tapa Shimei, a tapa Jair, a tapa Mordekai a kici Jew mi khat om hi.

⁶Amah pen, Babylon kumpipa Nebukhadnezzar in Jerusalem panin Judah kumpipa Jekoniah tawh a lak galmatte lak a kihel khat ahi hi.

⁷Amah in a innlak pate khat’ tanu, a min masa Hadassah, a nung ciangin Esther a kici, a khoi hi; bang hang hiam cih leh a nu le a pa om nawn lo hi. Tua numei melhoihin a ngaihbaang mahmah khat hi a, a nu le a pa a sih ciangin Mordekai in ama tanu dingin a lak ahi hi.

⁸Kumpipa’ thupiakna kithei kimin, Hegai’ kep dingin ap dingin kumpi khua Susa khuapi-ah numei tampi hong kipaipih ciangin, numeite a uk Hegai’ tungah ap dingin kumpipa’ inn-ah Esther zong kipaipih hi.

⁹Amah in tua nungak hoihsa-in pakta mahmah ahih manin paknamtuite le a annek ding pia pah a, kumpipa’ innsung panin a kiteel nasem numei sagih zong guan a, amah le a nasem numeite’ tungah numeite’ omna a hoihpen mun a pia pah hi.

¹⁰Mordekai in kham ahih manin Esther in ama namlephung genkhia lo hi.

¹¹Esther bangci om a, ama tungah bang piang hiam cih a theih nadingin numeite’ omna inntual mai-ah nisimin Mordekai va pai zel hi.

¹²Numeite a kigin’ hun a vekpi-in kha sawm le nih sung hi a, sathau le myrrh paknamtui tawh kha guk sung kipuahin, paknamtui tuamtuamte le kipuahna dangte tawh kha guk sung mah kipuah uh hi.

¹³Kiginkholhna hun cing a, Kumpipa Ahasueras’ kiangah numeite a pai ciangin numeite’ omna panin kumpipa’ inn-ah a deih peuhpeuh uh kikengsak hi.

¹⁴Nitakin kumpipa kiangah va pai a, a zingsang ciangin numeite’ omna a mun dang khatah kiciahsak a, kumpipa’ zineute a uk, kumpipa’ innsungmang Shaashgaz in kem hi. Kumpipa in a deihkik kei leh kumpipa kiangah paikik nawn lo a, kumpipa in a deih leh a minin kisamkik hi.

¹⁵Mordekai in ama tanu dingin a lak a innlak pa Abihail’ tanu Esther pen kumpipa kiangah a pai ding hun a tun ciangin, numeite a uk kumpipa’ innsung mangpa Hegai’ gen teng lobuang kizepna ding puan dang bangmah ngenthuah lo hi. Tu-in Esther a mu mi peuhmah in hoihsa kim uh hi.

¹⁶Ama uk a kum sagihna, kha sawmna ahi Tebeth kha sungin kumpi innsung Kumpi Ahasueras’ kiangah Esther a kipaipih ciangin,

¹⁷kumpipa in ama numei dangte khempeuh sangin itzaw a, a nungak dangte khempeuh sangin limbawl zaw hi. Tua hi a, kumpi lukhu amah khusakin Vashti’ tangin kumpinu a suaksak hi.

¹⁸Tua ciangin kumpipa in Esther pahtawina-in ama uliante le a nasem khempeuh a dingin pawi lianpi khat a bawl hi. Amah in ama ukna gam khempeuhah tua ni nasep khawlin zum a khakna ding uh zong thu zasak kim a, kumpipa min tawh a kilawm a kituak letsongte zong a hawmkhia hi.

¹⁹Tua hun sungin Mordekai in kumpi nasep a ngah hi.

²⁰Ama hilhna tawh kizui-in Esther in ama minam ahi a, a innkuan ahi zongin pulak lo hi. Mordekai’ kep sungin ama thu a man’ mah bangin tu-in zong Mordekai’ gen bangin gamta hi.

²¹Ni khat, kumpi nasemin Mordekai a om hun sungin kongcing ahi kumpipa’ innsungmangte Bigthana le Teresh heh uh a, Kumpipa Ahasueras thah ding a sawm uh hi.

²²Hih thu Mordekai in phawkin Kumpinu Esther kiangah ko a, Esther in Mordekai’ hong thupuak, ci-in kumpipa kiangah a gensawn hi.

²³A thu kikanin a manna a kitheih ciangin khuampite tungah tua mi nih tegel kikhailum hi. Hih thupiangte khempeuh kumpipa’ theihin Kumpi Gam Tangthu Laibu sungah kiciamteh hi.