Read Tedim Chin ESTHER 4 Bible Online

ESTHER 4 - Tedim Chin bible

ESTHER 4

¹Mordekai in hih thupiang teng a theih ciangin a puan balkekin puanhampi silhin vut kibuak a, nakpitakin a kap kawmin khua sungah vak kawikawi hi.

²Puanhampi silh kawmpi-in kongpi-ah kuamah kilutsak lo ahih manin kumpi inn kongpi panin a kimuhna mun ciangah pai hi.

³Kumpipa’ thupiakna a tunna gam Jew mite’ omna khempeuhah nakpi taka thumna le tauna, antanna, kahna, le dip-humna om hi. Mi a tamzaw in puanhampi silhin vut lakah lum uh hi.

⁴Esther’ nasem numeite le a innsungmangte hong pai-in ama kiangah tua thu a gen ciangun kumpinu in lamdangsa mahmah hi. A puanhampi a laih nadingin amah in Mordekai a’ ding puante khak a, ahih hangin Mordekai in tuate na sang lo hi.

⁵Tua ciangin Esther in ama na a sem dingin a kiseh, kumpipa innsungmangte lak panin Hathak a kici mipa samin hih thu pen bang hi a, bang a cihnopna ahi hiam, ci-in Mordekai tung panin thu a va kan dingin a sawl hi.

⁶Kumpi inn kongpi mai-a om khuapi kongzing tualpi a om Mordekai kiangah Hathak va pai a,

⁷Mordekai in ama tunga thupiangte khempeuh le Jew mite sukmang nadingin kumpipa’ sumkholna-ah Haman in piak dinga a sum ciamzah thute khempeuh ama kiangah na gen hi.

⁸Amaute a kisukmang nadingin Susa khua panin a kihawmkhia lai dal khat zong Mordekai in ama tungah pia a, amah in Esther tungah tua lai na pia-in a thu a na gentelna ding le, kumpipa kiangah Esther na pai-in ama mipihte a dingin a na thumsak ding zong a sawl hi.

⁹Hathak zong ciahin Mordekai’ thugen teng Esther kiangah va gen hi.

¹⁰Tua ciangin Esther in Hathak mah sawlkikin Mordekai’ tungah thu zasak a,

¹¹“Numei ahi a, pasal ahi zongin sap lohpi-in mi khat peuhpeuh kumpipa’ omna inn sungah a va lut leh upadi khat bek om a, tua pen, thah ding ahi hi; kumpipa in ama lamah a kham kumpi ciangkhut a na zan leh tua mipa suakta bek ding ahihna thu kumpipa’ nasemte le ama ukna gam mi khempeuh in a theih ciat uh ahi hi. Tu-in kumpipa kiangah a pai dingin hong kisap loh zawh ni sawmthum bang pha ta hi,” a ci hi.

¹²Tua hi a, Esther’ thugen teng Mordekai tungah kigen hi.

¹³Tua ciangin Mordekai in Esther a dawnkikna thu amahmah puasakkik a, “Kumpi inn sungah na omna hangin Jew mi khempeuh lak panin nang a suakta tuan dingin kingaihsun kei in.

¹⁴Hih bang hunin bangmah hih loin na omcip leh, Jew mite’ suahtakna ding le noptuamna ding thu mundang khat pan hong piang veve ding a, nangmah le na innkuanpihte na simang ding uh hi. Hih kumpi inn na tunna pen hih bang huna mah dinga a tung na hih mel zong kua in thei ahi hiam?” a ci hi.

¹⁵Tua ciangin Esther in Mordekai a dawnna lai amah puasak leuleu a,

¹⁶“Pai-in Susa khua sunga om Jew mi khempeuh khawm inla, keimah ngaihsutna-in an na tang un. A sun a zan ci loin ni thum sung an ne lo, tui dawn loin na om un. Na tan’ uh mah bangin kei le ka nasem numeite in zong ka na tang ding uh hi. Tua khit ciangin ngeina ahihloh hangin kumpipa kiangah ka va pai ding hi,” a ci hi.

¹⁷Tua ahih ciangin Mordekai pai-in Esther’ sawl bang teekteekin a gamta hi.