Read Tedim Chin ESTHER 5 Bible Online

ESTHER 5 - Tedim Chin bible

ESTHER 5

¹A ni thum ni-in Esther in a kumpipuan silhin kumpipa’ inntual sungnungah dingin kumpi inn lam a nga hi. Kumpi innsung a kumpi tokhom tungah kumpipa tu-in kongpi lam na nga hi.

²Inntualah Kumpinu Esther dinga a om kumpipa in a muh ciangin Esther in kumpipa’ maipha ngah a, kumpipa in a khuta a tawi kumpi ciangkhut pen Esther’ lamah a zan hi. Tua ciangin Esther in hong naihin tua ciangkhut dawn va lawng hi.

³Tua ciangin kumpipa in ama kiangah, “Kumpinu Esther aw, bang thu ahi hiam? Kei tungah nong nget peuhpeuh, ka kumpi gam phelkhat ciang dong, nang tungah hong kipia ding hi,” a ci hi.

⁴Tua ciangin Esther in, “Nong hehpih zawh leh, kumpipa a’ dinga kong bawlsak nitak an a ne dingin tuni-in Haman tawh hong pai un,” a ci hi.

⁵Tua ciangin kumpipa in, “Esther’ deih bangin i gamtat theih nadingin manlangin Haman va sam un,” a ci hi. Tua ahih manin Esther’ bawlsak nitak an a ne dingin kumpipa le Haman hong pai uh hi.

⁶Amaute in zu a nek laitakun kumpipa in Esther’ kiangah, “Nong nget peuhpeuh hong kipia ding hi. Nong nget peuhpeuh ka kumpi gam phelkhat ciang dong nangawn hong kipia ding hi,” a ci hi.

⁷Esther in dawngin, “Nang tung panin kong ngetnop kong thumnop thu in:

⁸Topa aw, nong hehpih zawh a, na lung a kim a, kong nget thu nong piakzawh ding le, no tegel a dingin ka na bawl an a ne dingin zing ciangin kumpipa le Haman hong pai un. Zing ciangin nong cih bangin ka deihna kong gen ding hi,” a ci hi.

⁹Tua ahih ciangin lungdam kipakin tua ni-in Haman a ciah hi. Ahih hangin kongpi-a om Mordekai in amah zahtakna limin a mai-ah ding lo, kun lo-a om a muh ciangin Mordekai tungah nakpitakin a heh hi.

¹⁰Ahi zongin Haman ki-ip tentanin inn-ah a ciah hi. Tua ciangin a lawmte le a zi Zeresh sam a,

¹¹ama hauhna teng, a tapa neih teng, kumpipa in amah a pahtak manin a za a khansakna teng, le kumpipa’ nasemte le ulian dangte khempeuh sangin a lianzaw-in amah a koihna thute khempeuh amaute tungah genin a lak hi.

¹²Tua ciangin Haman in, “Tua tengbek hi nai lo lai hi. Kumpinu Esther nangawn in ama bawlsa an kumpipa tawh a nekhawm dingin kei simloh midang kuamah paisak lo hi. Zing ciangin zong kumpipa tawh kei hong samkhawm hi.

¹³Ahi zongin kumpipa’ kongpi-a a tu Jew mi Mordekai ka muh laiteng hih thute khempeuh a mawkna suak zel hi,” ci lai hi.

¹⁴Tua ciangin a zi Zeresh le a lawmte khempeuh in ama kiangah, “Pi sawmsagih le nga a sang khuam phutsak inla, tua tungah Mordekai a kikhailup nadingin zingciangin kumpipa kiangah gen in. Tua ciangin nitak an ne dingin lungnuam takin kumpipa tawh pai in,” a ci uh hi. Haman in hih ngaihsutna hoihsa a, a khuam a phutsak hi.