Read Tedim Chin ESTHER 7 Bible Online

ESTHER 7 - Tedim Chin bible

ESTHER 7

¹Tua ahih ciangin Kumpinu Esther tawh an a ne dingin kumpipa le Haman va pai uh hi.

²A ni nih ni, amaute in zu a nek laitakun kumpipa in Esther kiangah, “Kumpinu Esther aw, nong ngetnop bang ahi hiam? Nong nget khempeuh ka kumpi gam phelkhat dongin hong kipia ding hi,” ci kik leuleu hi.

³Tua ciangin Kumpinu Esther in dawngin, “Kumpipa in nong hehpihzawh a, kumpipa in hoih na sak leh, kong nget kong thumnop thu pen keimah le ka mipihte sihna tawh nong kipelhsakna ding ahi hi.

⁴Bang hang hiam cih leh kei le ka mite suksiat ding, thah ding, beisakmang dingin hong kizuak hi. Kote, numei pasal a kibangin sal dingin hong kizuak hileh bangmah ka pau kei ding hi; tua bang lel tawh kumpipa nawngkaisak taak lo hi,” a ci hi.

⁵Tua ciangin Kumpipa Ahasueras in Kumpinu Esther kiangah, “Hih banga gamtat ding a ngaihsun kua hi a, koi-ah om ahi hiam?” a ci hi.

⁶Tua ciangin Esther in, “Hong langpang ka gal pa! Hih migilo Haman!” a ci hi. Tua laitakin kumpipa le kumpinu’ mai-ah cih nading thei loin Haman a om hi.

⁷Tua ciangin kumpipa a hehsa-in annekna pan dingkhia-in kumpi huan sungah a pai hi. Ahi zongin Haman ahihleh tua lai mahah omin Kumpinu Esther in a nuntakna a suahtaksakna ding a thum hi; bang hang hiam cih le kumpipa in amah thah dingin a ngaihsutna a lungsim a thei hi.

⁸Kumpi huan panin a annekna mun uhah kumpipa hong paikik ciangin Esther’ tutna lamah Haman na awn phei-in a om mu a, kumpipa in, “Ka innsung ka muhna nangawnah hih mipa in kumpinu hih ding ahi hiam?” ci hi. Kumpipa in tua thu a cih phetin amaute in Haman’ mai puan a khuh uh hi.

⁹Tua ciangin kumpipa’ na a sem innsungmangte lakah Harbona in, “Nidangin kumpipa’ na hoihtakin a sem ngei Mordekai thah nadingin Haman mahmah in a phuhsak, pi sawmsagih le nga a sang khuam pen Haman’ inn-ah tumahin om hi,” a ci hi.

¹⁰Tua ciangin kumpipa in, “Tua tungah amah khailum un,” a ci hi. Tua ahih ciangin Mordekai khailup nadingin a phuh khuam tungah Haman a khailum uh hi. Tua ciangin kumpipa’ hehna a dam hi.