Read Tedim Chin ESTHER 8 Bible Online

ESTHER 8 - Tedim Chin bible

ESTHER 8

¹Tua ni mahin Kumpipa Ahasueras in Jew mite’ gal ahi Haman’ neihsa khempeuh Kumpinu Esther tungah pia hi. Tua ciangin kumpipa’ omna-ah Mordekai hong tung hi; bang hang hiam cih leh amah tawh a kinaina zia, kumpipa kiangah Esther in gen hi.

²Tua ciangin kumpipa in Haman’ tung panin a lakkiksa minthuhna zungbuh pen suahkhia-in Mordekai a pia hi. Tua hi a, Haman’ neihsa khempeuh a uk dingin Esther in Mordekai a koih hi.

³Kumpipa’ mai-ah Esther khatvei va paikikin khitui naptui tawh a khe mai-ah va puk a, Agag mi Haman’ vaihawm siatna lianpi le Jew mite a sawmna thu a kipelhkik theih nadingin va thum hi.

⁴Kumpipa in Esther’ lamah a kham ciangkhut na zan a,

⁵tua ciangin Esther thoto-in kumpipa mai-ah dingin, “Kei nong hehpihzawh a, hih ka ngaihsutna man na sak a, hoih na sak le, na ukna gam sung khempeuhah a om Jew mite thahna ding a sawmna-in Agag-te beh Hammedatha’ tapa Haman in a laigelhte dawhkik nadingin lai khat gelhsak in.

⁶Ka mipihte tungah hih siatna lianpi a tung ka muh ding bangci thuakzawh ding ka hi hiam? Ahih kei le ka innkuanpih tungah a tung hih siatna ka muh ding bangci thuakzawh ding ka hi hiam?” a ci hi.

⁷Tua ciangin Kumpipa Ahasueras in Kumpinu Esther le Jew mi Mordekai tungah, “Haman in Jew mite thah hong sawm ahih manin sing tungah amah kikhailum khin a, Haman’ neihsa khempeuh Esther’ tungah kong pia khin hi.

⁸Kumpipa’ min tawh kigelhin, kumpipa’ minthuhna tawh a kithuh khinsa lai pen kidokkik thei nawn lo ahih manin, tu-in Jew mite tawh kisai-in hoih dinga na up bangin kumpipa’ min tawh gelh inla, tua khit ciangin kumpipa’ minthuhna zungbuh tawh thuh in,” a ci hi.

⁹Tua ahih ciangin a kha thumna ahi Sivan kha a ni sawm le thum ni-in kumpipa’ lai-atte kisam a, Mordekai’ gen bang teekteekin Jew mite tung le India panin Ethiopia dong gam zakhat le sawmnih le sagih a uk ahi gam tampi a ukte, gam khat a ukte le tua gam sunga uliante tungah lai kihawmkik a, amau’ lai ciat le amau’ pau ciatin kigelh a, Jew mite a’ ding zong amau’ lai le amau’ pau mahin kigelh hi.

¹⁰Tua lai pen Kumpipa Ahasueras’ minin kigelhin kumpipa’ min thuhna zungbuh mah tawh kithuh a, kumpi sakol bukah a kikhawi kumpipa’ sakolte tungah laitaite kituangsakin lai kihawmsak hi.

¹¹Kha sawm le nihna ahi Adar kha a ni sawm le thumna ni khat sungin Kumpi Ahasueras’ ukna gam sung khempeuhah Jew mite in amau a sim ding mi ahih kei leh a gamte’ hihna ding panin khua khempeuhah amau na kipawlin na kihu-in, tua banga amaute a hih dingte pen a numei a naupangin susia-in, thatin a beisakna ding uh le a neihsate uh a laksak theihna dingun hih banga lai piakna tawh kumpipa in Jew mite tungah hih theihna ding thu a pia hi.

¹³Tua thupiakna lai pen gam khempeuhah kihawmin mi khempeuh kitheisakin, amau’ galte a thukkikna ding ahi tua ni tawh kisai-in Jew mite a kiginkholh ding uh ahi hi.

¹⁴Tua ahih ciangin kumpipa’ sakolte tungah laitaite tuangin kumpipa’ thu-kin sawl mah bangin nawhtai uh hi. Tua ciangin kumpi khua Susa khuapi sungah zong tua thupiakna lai a kihawm hi.

¹⁵Tua ciangin kumpi puan a san le a kang silhin, kham tawh kibawl kumpi lukhu lianpi khu-in, saihadial puanneel le puansan silhsa-in kumpipa’ omna panin Mordekai paikhia hi. Tua ciangin Susa khuapi sung mi khempeuh lungdamin awng uh hi.

¹⁶Tua hi a, Jew mite in suahtakna, lungdamna, le pahtawina ngah uh hi.

¹⁷Kumpipa’ thupiakna a tunna gam le khua khempeuhah Jew mite a dingin lungdamna le kipahna, pawi bawlna le nasep khawlin zum khakna a om hi. Tua hi a, midangte in Jew mite kihta uh ahih manin tua gam a om mi tampi tak in Jew mi ka hi uh hi, a ci uh hi.