Read Tedim Chin ESTHER 9 Bible Online

ESTHER 9 - Tedim Chin bible

ESTHER 9

¹A kha sawm le nihna ahi Adar kha a ni sawm le thum ni-in kumpipa’ thupiakna bangin sepkhiatna ding hun hong tung hi. Jew mite’ galte in gualzo dinga a ki-up ni teek pen amau a mudah mite’ tungah Jew mite a gualzawh ni ding hong hizaw hi.

²Tua ni-in amaute’ siatna ding a geelte a sugawp dingin Kumpipa Ahasueras’ ukna gam khempeuha amau’ khuapite sungah Jew mite kikhawm uh hi. Mi khempeuh in Jew mite kihta uh ahih manin kuamah in Jew mite nang ngam lo uh hi.

³Mordekai kihta uh ahih manin gam tampi a ukte le gam khat a ukte le gam sunga ulian tuamtuamte le kumpi ulian khempeuh in Jew mite panpih uh hi.

⁴Bang hang hiam cih leh kumpi inn sungah Mordekai ulianpi khat suak a, a vangliatna a khan semsem mah bangin gam khempeuhah ama minthanna kizel hi.

⁵Tua ahih ciangin Jew mite in namsau tawh a galte uh tampi tak thatlum uh a, amau a mudahte a ut utun hihgawp uh hi.

⁶Kumpi khua Susa khuapi sung mahmahah Jew mite in mi zanga thatin susia uh hi.

⁷Tua hi a, amaute in Jew mite’ gal ahi Hammedatha’ tapa Haman’ tapa sawmte Parshandatha, Dalfon, Aspatha, Poratha, Adalia, Aridatha, Parmashta, Arisai, Aridai, le Vaizatha-te zong a that uh hi. Ahi zongin amau’ neihsate suksak lo uh hi.

¹¹Kumpi khua Susa khuapi sunga a kithat zah tua ni mahmahin kumpipa kiangah kizasak hi.

¹²Tua ciangin kumpipa in Kumpinu Esther kiangah, “Kumpi khua Susa khuapi sungah Jew mite in mi zanga that uh a, Haman’ tapa sawmte zong that uh hi. Ka ukna gamdangte sungah zong bangzah that ding kithei lo hi. Tu-in bang deih lai na hi hiam? Nong nget peuhpeuh hong kipia lai ding hi,” a ci hi.

¹³Tua ciangin Esther in, “Kumpipa in hoih na sak leh, tuni-a mah bangin zing ciangin zong Susa khuapi sunga om Jew mite tungah hih theihna thu pia inla, Haman’ tapa sawmte’ luanghawmte khuam tungah khaisak in,” a ci hi.

¹⁴Tua ahih manin tua banga a hih nadingin kumpipa in a sawl hi. Susa khuapi sungah hih thu suakkhiasak a, khuam tungah Haman’ tapa sawmte kikhai hi.

¹⁵Susa khuapi sunga om Jew mite Adar kha a ni sawm le li ni-in kikhawm kikin Susa khua sungah mi zathum that uh hi. Ahi zongin amau’ neihsate suksak lo uh hi.

¹⁶Tua mah bangin kumpipa’ ukna gam tuamtuama om Jew mite zong amau’ kihut nadingin kikhawm uh hi. Amaute in zong amau a mudah mihing tul sawmsagih le tulnga thatin a galte uh tungah phu la uh hi. Ahih hangin a neihsate uh suksak lo uh hi.

¹⁷Hih banga a hih pen Adar kha a ni sawm le thum ni hi a, a ni sawm le li ni-in tawlnga uh a, pawi bawlin lungdamin om uh hi.

¹⁸Ahih hangin Susa khua sunga om Jew mite ahihleh a ni sawm le thum le sawm le li ni-in kikaikhawm uh a, a ni sawm le nga ni tawlnga uh a, pawi bawlin lungdamin om uh hi.

¹⁹Hih thu hangin gam sung khuaneute-a teng Jew mite in Adar kha a ni sawm le li ni pawi bawlna le lungdam ni dingin tawlngak ni-in nei uh a, anlim nono kikholhna ni-in a zang uh hi.

²⁰Tua ciangin Mordekai in hih thupiangte khempeuh lai-in ciamteh a, a nai a gamla a om Kumpi Ahasueras’ ukna gam sung khempeuha om Jew mite tungah lai paisak hi.

²¹A kumkumin Adar kha ni sawm le li ni le sawm le nga ni a tanna dingun thu a pia hi.

²²Tua nite pen Jew mite a galte uh tung panin a suahtak ni, dahna le thumnate lungdamna le lungnopna a suah kha ahi hi. Tua ahih manin amaute in pawi bawl ni le lungdam ni-in nei-in, anlim nono khatlekhat kikholh ni le mizawngte tungah letsong piak ni-in a zat dingun thu a pia hi.

²³Tua ahih ciangin Mordekai’ laigelhna tawh kizui-in Jew mite in a patsa uh hih banga a hihnate uh a zom uh hi.

²⁴Bang hang hiam cih leh Jew mi khempeuh’ gal ahi, Hammedatha’ tapa, Agag-te beh Haman in Jew mite sugawpin a suksiat nadingin Pur kici ai sanin Jew mite suksiat ding sawm hi.

²⁵Ahih hangin kumpipa in hih thu a theih ciangin, Jew mite sukna dingin Haman in a geelsa thu hoih lo pen Haman’ lu tung mah a lehtukna ding, le amah le a tapate khuam tungah a kikhaina ding lai-in gelhin thu a pia hi.

²⁶Tua ahih ciangin Pur min tamin hih hun sung teng Purim ci-in min a phuak uh hi. Tua ahih ciangin hih lai sunga a kigelh thute khempeuh, le hih thute amau’ mit tawh mu-in a pumpi uh tawh a tuahna uh hangin,

²⁷Jew mite amau mahmah, le a suan a khakte uh, le amau a pawlpih khempeuh in lai sunga kigelh bangin a kiseh hunin kum simin hih ni nihte a pel loin a tan’ ding uh kipsak uh a,

²⁸a khangkhangin innkuan sim, gam sim, khuapi simah hih nite phawkin a kitanna ding, le Jew mite lakah hih Purim nite a kitan’ ngitngetna ding ahi a, a suanlekhakte un zong hih thu a mangngilh hetloh nading uh ahi zongin khotakin a len uh hi.

²⁹Tua ciangin Abihail’ tanu Kumpinu Esther in Purim thu tawh kisai hih laikhak nihna a kipsak nadingin Jew mi Mordekai tungah aana a kicingin a piakna lai-in a gelh hi.

³⁰Kumpi Ahasueras’ ukna gam za le sawmnih le sagih sungah a om Jew mite khempeuh tungah kilemna le nopna a omna ding deihsakna laite kikhak a,

³¹Jew mi Mordekai in a gelhsa bangin a kisehsa tawh kizui-in hih Purim nite a tan nadingun thu kipia hi. Tua mah bangin amaute le a suanlekhakte uh a dingin antanna ding le thumna bawlna ding ngeinate a gelh uh hi.

³²Kumpinu Esther’ thupiakna in hih Purim bawlna ding ngeinate kipsak a, lai thupite sungah hih thu kiciamteh hi.