Read Tedim Chin PAIKHIATNA 17 Bible Online

PAIKHIATNA 17 - Tedim Chin bible

PAIKHIATNA 17

¹TOPA’ thupiak bangin Israel mihon khempeuh Sin sehnel gam panin giahphual a ban banin sat uh a, Refidim-ah phual sat uh hi. Ahih hangin mite’ dawn ding tui om lo hi.

²Tua ahih ciangin mite in Moses’ tungah mawhna zong uh a, “Tui dawn ding hong pia in,” ci uh hi. Moses in amaute kiangah, “Bang hangin kei’ tungah mawhna hong zong na hi uh hiam? Bang hangin TOPA ze-et na hi uh hiam?” a ci hi.

³Ahi zongin tua munah tui duhin mite dangtak uh a, Moses’ tungah mite phunin, “Kote le ka tate uh le ka ganhingte uh dangtakin a si dingin bang hangin Egypt panin hong paipih to na hi hiam?” a ci uh hi.

⁴Tua ahih ciangin TOPA’ tungah Moses kiko a, “Hih mite bang cih ding ka hi hiam? Suang tawh kei hong deng dingin amaute kithawi uh hi,” a ci hi.

⁵TOPA in Moses kiangah, “Israel upate pawlkhat samin mite’ mai-ah pai in. Nail na satna ciangkhut na khutin tawi-in pai in.

⁶En in, Horeb-a suangpi-ah nangma mai-ah ka ding ding hi. Nang in suangpi na sat ding a, mite in tui a dawn theih nadingin tua suang sung panin tui hong phulkhia ding hi,” a ci hi. Israel upate’ muhna-ah tua bangmahin Moses gamta hi.

⁷Israel mite’ mawhzonna le amaute in TOPA ze-etin, “Eite’ lakah TOPA a om mah ahi hiam?” a cihna hangun, tua mun pen Massah le Meribah, ci-in min kiphuak hi.

⁸Tua ciangin Amalek mite hong pai-in Israel mite tawh Refidim-ah kido uh hi.

⁹Moses in Joshua kiangah, “Eite a dingin mi teel inla, pai-in Amalek mite tawh kido in. Zing ciangin, Pasian in ka tawi dingin a hong sawl ciangkhut tawi-in mual dawnah ka ding ding hi,” a ci hi.

¹⁰Tua ahih ciangin Moses in ama tungah a gen bangin Joshua gamta a, Amalek mite tawh kido uh hi. Moses, Aaron, le Hur-te mual dawnah paito uh hi.

¹¹Moses in a khut a sansak lai teng Israel mite in neh a, a khut a niamsak ciangin Amalek mite in neh hi.

¹²Ahih hangin Moses a khut kham hi. Tua ahih ciangin amaute in suangtum khat la-in ama nuai-ah koih uh a, tua suang tungah amah tu a, Aaron le Hur in a pang khat tuak panin ama khutte len uh hi. Tua ahih ciangin nitum mateng ama khutte kip hi.

¹³Joshua in Amalek le ama mite namsau tawh vatmai hi.

¹⁴TOPA in Moses kiangah, “Keimah in mun khempeuh panin Amalek mite ka phiat siangtho nading thu phawk nadingin hih thu laibu sung khatah gelh inla, Joshua kiangah hih thu gen kik in,” a ci hi.

¹⁵Moses in biakna tau khat lamin a min dingin, “TOPA, keima zawhna lim ahi hi,” ci-in phuak a,

¹⁶“TOPA’ dial sang tawi un! TOPA in a khang khangin Amalek mite do ding hi,” a ci hi.