Read Tedim Chin PAIKHIATNA 24 Bible Online

PAIKHIATNA 24 - Tedim Chin bible

PAIKHIATNA 24

¹Tua ciangin TOPA in Moses kiangah, “Nang le Aaron, Nadab, Abihu le Israel upate sung pan sawmsagih tawh keima kiangah hong paito unla, a gamla panin kunin hong bia un.

²TOPA’ nai-ah Moses bek hong pai ding hi. A dangte a nai-ah hong pai lo ding a, mihonte in mual ciang dong hong neh lo ding uh hi,” a ci hi.

³Moses hong pai-in TOPA’ thugente khempeuh le biakna ngeinate khempeuh mite kiangah a gen hi. Mi khempeuh in aw kikhatin dawng uh a, “TOPA’ gensa thute khempeuh ka hih ding uh hi,” a ci uh hi.

⁴Moses in TOPA’ thugente khempeuh a gelh hi. Zingsangin amah tho baih a, mual bulah biakna tau khat lamin, Israel minam sawm le nihte tawh kituakin khuam sawm le nih a phut hi.

⁵Amah in Israel mi tangvalte sawlin, tuate in meihal biakna le thunuama biakna bawngtalte TOPA’ tungah pia uh hi.

⁶Moses in a sisan kimkhat la-in, kuangte sungah koih a, sisan kimkhat biakna tau tungah a theh hi.

⁷Tua ciangin amah in thuciamna laibu la-in, mite’ zakin tua laibu a sim hi. Amaute in, “TOPA’ gensa khempeuh kote in ka hih ding uh a, kote ka thumang ding uh hi,” a ci uh hi.

⁸Tua ciangin Moses in sisan la-in mite’ tungah theh a, “Hih thute khempeuh tawh kizui-in TOPA in note tawh a bawlsa thuciamna sisan en un,” a ci hi.

⁹Tua ciangin Moses le Aaron, Nadab, Abihu le Israel upate sung pan sawmsagih paito uh a,

¹⁰amaute in Israel Pasian mu uh hi. Ama khe nuai-ah a sianthona van mel tawh a kibang, sapfaia suangmanpha tawh a kibawl suangphahpek bangpian om hi.

¹¹Amah in Israel mi makaite gimna ngahsak lo hi. Amaute in Pasian mu uh a, tua ciangin an ne-in tui dawn uh hi.

¹²TOPA in Moses kiangah, “Keima kiang mualtungah hong paito inla, tua lai-ah ngak in. Amaute a kihilh nadingin keima gelhsa, thukham le thupiakna tawh, suangpek nang tungah kong pia ding hi,” a ci hi.

¹³Tua ahih ciangin ama nasempa Joshua tawh Moses kithawi uh a, Pasian’ mual tungah paito uh hi.

¹⁴Amah in upate kiangah, “Note’ kiangah kong paikik matengun hih lai-ah kote hong ngak un. En un, note tawh Aaron le Hur om hi. Thu nei peuhpeuh amaute’ kiangah paisak un,” a ci hi.

¹⁵Tua ciangin mualtungah Moses paito a, meii in mual a tuam hi.

¹⁶TOPA’ minthanna vang pen Sinai Mual tungah kinga a, meii in ni guk sung tua mual a tuam hi. A ni sagih ni-in amah in meii lak panin Moses a sam hi.

¹⁷Tu-in TOPA’ vangliatna vang pen Israel mite’ muhna-ah mualvum dawn a kangtum meikuang tawh kibang hi.

¹⁸Meii sungah Moses tum a, mualtungah paito hi. Moses sun sawmli le zan sawmli sung mualtungah a om hi.