Read Tedim Chin PAIKHIATNA 28 Bible Online

PAIKHIATNA 28 - Tedim Chin bible

PAIKHIATNA 28

¹“Tua ciangin keima tungah siampi na a sem dingin Israel mite lak panin na sanggampa Aaron le a tapate Nadab le Abihu, Eleazar le Ithamar, nangma kiangah la in.

²Minthanna le hoihna tawh a kidim nadingin na sanggampa Aaron a’ ding biakna puan siangtho na bawl ding hi.

³Keima siampi nasepna-ah amah a ap theih nadingun amaute in Aaron’ puante a bawl nading, hih theihna lungsim ka guatsa, siamna a nei mite khempeuh tungah gen in.

⁴Amaute’ bawl ding puante: Awmdal khat, siampipuan khat, puantualpi khat, sikli nei-a a gial puantungsilh khat, dialpi khat le kawnggak khat ahi hi. Keima tungah siampi na a sem ding na sanggampa Aaron le ama tapate a dingin amaute in biakna puan siangthote bawl ding uh hi.

⁵Amaute in kham, a dum, a dupsan, a ausan khaute le a kopin a kikhuk tawh a kigan puan hoihte sang ding uh hi.

⁶“Amaute in siampipuan pen, kham, a dum, a dupsan, a ausan tuumul khaute le a kopin a kikhuk a kigan puan hoihte tawh bawl ding uh a, hoihtakin a kibawl hi ding hi.

⁷A kizop khawm theih nadingin a mong nihte-ah a kimat liangkaihna puan nih nei ding hi.

⁸Amah a gak dingin hoihtakin a kigan tua tunga puan om pen, kham, a dum, a dupsan, a ausan tuumul khaute le a kopin a kikhuk puan hoihte tawh kibawlin, a sepna zia le a nate a kibang hi ding hi.

⁹Nangmah in onik suang nih la-in tuate’ tungah Israel tapate’ min na gelh ding a,

¹⁰amau’ suahna tawh kizui-in amau’ min gukte suang khat tungah gelhin, a omlai gukte’ min a suang dang khat tungah na gelh ding hi.

¹¹Kizepna a bawlpa in min gelhna a bawl bangin Israel tapa sawm le nihte’ minte suang nihte tungah na gelh ding hi. Tuate pen kham a zepna tawh na um ding hi.

¹²Israel tapate phawkna suang dingin siampipuan’ liangkaih puan tungah tua suang nihte na bulh ding hi. Aaron in ama liangko nihte tungah phawkphawk dingin TOPA’ mai-ah amaute’ min pua ding hi.

¹³Kham tawh kibawl a kiphut kizepna le

¹⁴khau bangin a kihual, kham citak khainiang nih na bawl ding a, a kihual khainiangte pen a kiphutte’ tungah na bulh ding hi.

¹⁵“Hoihtakin a kibawl thukhenna awmdal khat na bawl ding hi. Siampipuan a kibawl bangmahin na bawl ding hi. Kham, a dum, a dupsan, a ausan tuumul khaute le a kopin a kikhuk puan hoih tawh na bawl ding hi.

¹⁶A ning kikimin thuap nih hi ding a, a dung letmat kua, a vai letmat kua mah hi ding hi.

¹⁷Tua sungah suang gual li-in na bulh ding hi. Sardis suang, topaz suang, le karbankal suang gual khat pen a gual masa hi ding hi.

¹⁸A gual nihna-ah emerald suang, sapfaia suang, le diamond suang hi ding hi.

¹⁹A gual thumna-ah jakinth suang, agate suang, le amethyst suang hi ding hi.

²⁰A gual lina-ah beryl suang, onik suang, le jasper suang hi ding a, kham tawh zepna sungah tuate kibulh ding hi.

²¹Israel tapate’ min tawh kituakin amaute’ min a omna suang sawm le nih om ding hi. Tuate pen minam sawm le nihte a dingin amau’ min ciat kigelhin, min gelhna tawh kibang ding hi.

²²Awmdal a dingin khau tawh a kibang, a kihual kham citak khainiang na bawl ding hi.

²³Awmdal a dingin kham kual nih na bawl ding a, awmdal mongah tua kualte na bulh ding hi.

²⁴Awmdal mong a kual nihte sungah kham khau nihte na khum ding hi.

²⁵Khau mong nihte zepna tawh na zom ding a, siampipuan’ liangkaih puan mai lamah tua bangin na zom ding hi.

²⁶Kham kual nih na bawl ding a, awmdal mong nih, siampipuan tawh a kizom a sunglamah na bulh ding hi.

²⁷Kham kual nih na bawl ding a, siampipuan liangkaih nihte’ nuai a mailam, hoihtakin a kigan siampi puankhau a kizopna tung sanah na bulh ding hi.

²⁸Hoihtakin a kigan siampipuan’ khau tungah a om theih nading le siampipuan tung panin awmdal a kol theih loh nadingin amaute in siampipuan’ kualah khaudum khatin a kual tawh gakkhawm ding uh hi.

²⁹“Tua ahih ciangin TOPA’ mai-ah phawk tawntung nadingin amaute a paipih dingin siangtho munah amah a pai ciangin, Aaron in ama lungtang tunga om thukhenna awmdal sungah Israel tapate’ min pua ding hi.

³⁰Thukhenna awmdal sungah Urim le Thummim na koih ding a, TOPA’ mai-ah a pai ciangin Aaron’ lungtang tungah tuate om ding hi. Tua bangin Aaron in ama lungtang tungah Israel mite’ thukhenna TOPA’ mai-ah pua tawntung ding hi.

³¹“Siampi puantualpi, puan dum bek tawh na bawl ding hi.

³²Puan ngawng bangin a kikeek loh nadingin a ngawng kimkotah a kigan tawh a kizim, lutang thawl a vang nei ding hi.

³³A mongah a dum, a dupsan, a ausan khaute tawh a kizem mang kawlsing gah bawlin, a mong kiimah amaute’ kikalah kham siklong bawlin,

³⁴puantualpi mong kimkotah kham long le mang kawlsing gah, kham long le mang kawlsing gah cih bangin na kihelhsak ding hi.

³⁵Aaron in biakna na a sep ciangin tua puan silh ding a, amah a sih khak loh nadingin TOPA’ mai a siangtho munah a tum ciang le a pusuah ciangin a gingte kiza ding hi.

³⁶“Nangmah in kham citak tawh a peek khat na bawl ding a, min gelhna a kibawlte mah bangin tua tungah, ‘TOPA a’ ding siangtho,’ ci-in na gelh ding hi.

³⁷Tua pen, khaudum khat tawh dialpi tungah na gak ding a, dialpi mai lamah om ding hi.

³⁸Tua pen Aaron’ taltangah om ding a, Israel mite in letsong siangtho a piakna uh ahi, a siangtho biakpiakna-ah mawhna a om peuhmah Aaron in ama tungah pua ding hi. TOPA’ mai-ah amaute a kisan’ theih nadingin ama taltang tungah tua a peek om tawntung ding hi.

³⁹“A puantungsilh ding pen khau hoih tawh siik li nei, a gialin na gan ding hi. Khau hoih tawh dialpi khat na bawl ding a, phim tawh kikhui-in a kizem kawnggak khat na bawl ding hi.

⁴⁰“Aaron’ tapate a dingin puantungsilhte, kawnggakte, le lukhute na bawl ding a, minthanna le hoihna tawh a kidim nadingin tuate na bawl ding hi.

⁴¹Amaute in keima tungah siampi na a sep theih nadingun na sanggampa Aaron le a tapate na silhsak ding a, amaute sathau nilhin, nasem dingin kipsakin, na siangthosak ding hi.

⁴²A ci guakin a omna uh a tuam dingin amau a dingin puan hoihte tawh pheituamte na bawlsak ding a, tuate in kawng panin phei ciang ban ding hi.

⁴³Kikhopna bukah amaute a pai ciang uh ahi a, siangtho munah nasem dingin biakna tau nai-ah a pai ciang uh ahi zongin, Aaron le ama tapate in tuate a silh ding uh hi. Tua hikeileh amaute in amau tung mahah mawhna a kisuan tawm suakin si ding uh hi. Hih pen amah le ama khit ciangin a suanlekhakte a dingin a om tawntung ngeina kip khat hi ding hi.