Read Tedim Chin PAIKHIATNA 30 Bible Online

PAIKHIATNA 30 - Tedim Chin bible

PAIKHIATNA 30

¹“Nangmah in paknamtui hal nading biakna tau khat, singkha sing tawh na bawl ding hi.

²A dung pi khat le alang, a vai zong pi khat le alang mah hi ding hi. A kikim sikli nei hi ding a, a sanna pi thum hi ding hi. A kite a tak tawh sakhat hi ding hi.

³Nangmah in kham citak tawh a tung le a pang kimkot le a kite na zut ding a, a kimkotah kham tawh a geihual na bawl ding hi.

⁴Tua biakna tau a dingin kham kual nih na bawl ding hi. A geihual nuai a kigal sai a pang tuakah tuate na bawl ding a, a puak nading zawlte a khum nading hi ding uh hi.

⁵Nangmah in singkha sing tawh a zawlte na bawl ding a, kham tawh tuate na zut ding hi.

⁶Nangmah tawh ka kituah nading mun, thuciamna tunga a om hehpihna tokhom mai, thuciamna singkuang kiangah a om dalna puan mai-ah biakna tau na koih ding hi.

⁷Aaron in tua tungah a namtui paknamtui hal ding hi. Amah in zingsang simin meivakte a puah ciangin hal ding hi.

⁸Aaron in nitakin zong meivakte a koih ciangin tuate hal ding a, na khang tawntungun TOPA’ mai-ah a namtui hi tawntung ding hi.

⁹Tua tungah a siangtho lo paknamtui hitaleh, meihal biakna hitaleh, an tawh biakna hitaleh na pia kei ding hi. Tua tungah tuibuah na sung kei ding hi.

¹⁰Aaron in kilem nadingin khialhna hanga biakna si a kite tungah kum khatin khatvei zut ding hi. Amah in na khang tawntungun kum khatin khatvei kilemna bawl ding hi. Tua pen TOPA’ tungah a siangtho pen ahi hi,” a ci hi.

¹¹TOPA in Moses kiangah,

¹²“Israel mite a phazah na sim ciangin amau’ lakah gimna a tun loh nadingin, a milip in a kitatkhiatna uh TOPA’ tungah pia ding uh hi.

¹³Mi simna-ah a kihel mi peuhmah in biakinn shekel tawh kituakin shekel lang (shekel khatah gerah sawmnih om hi), TOPA’ tungah biakna-in pia ding hi.

¹⁴Mi simna-ah a kihel, kum sawmnih panin a tungsiah peuhmah in TOPA’ tungah biakna pia ding hi.

¹⁵Note a’ ding kilemna bawl nadingin TOPA biakna na piak uh ciangin a haute in shekel lang sangin a tamzaw pia lo ding a, a zawngte in a tawmzaw pia lo ding hi.

¹⁶Nomau a dingin kilemna bawl nading, TOPA’ mai-ah Israel mite ka phawkna a hisak dingin Israel mite tung panin kilemna sum na la ding a, kikhopna buk nasep nadingin na zang ding hi,” a ci hi.

¹⁷TOPA in Moses kiangah,

¹⁸“Kisil nadingin sumngo kuang khat, le a ngak nading zong sumngo mah tawh bawl in. Nangmah in kikhopna buk le biakna tau kikalah na koih ding a, tua sungah tui na koih ding hi.

¹⁹Aaron le a tapate in a khut uh le a khe uh tua tui tawh sil ding uh hi.

²⁰Kikhopna bukah amaute a pai ciang uh ahi a, TOPA’ tungah mei tawh kihal biakna hal dingin biakna tau nai-ah a pai ciang uh ahi zongin, amaute a sih loh nadingun amaute tui tawh kisil ding uh hi.

²¹A sih khak loh nadingun a khut uh le a khe uh sil ding uh hi. Tua pen na khang tawntungun amaute tung a kipanin amau’ suanlekhakte tungah ngeina kip khat hi ding hi,” a ci hi.

²²Tua tham loin, TOPA in Moses kiangah,

²³“A hoihpen a namtui nate la in. Myrrh paknamtui shekel zanga le a namtui thaksing tuazah lang, shekel zanih le sawmnga a gik, le a khum a namtui paknamtui zanih le sawmnga,

²⁴biakinn shekel tawh kituakin thaksing nam khat zanga, le oliv thau bung khat,

²⁵nangmah in paknamtui bawlte’ bawl mah bangin a siangtho sathau nilh dingin hihte na gawm ding a, tua pen a siangtho sathau nilh hi ding hi.

²⁶Nangmah in tua tawh kikhopna buk le thuciamna singkuang,

²⁷sabuai le a nazat khempeuh, meivakkhuam le a nazatte le paknamtui biakna tau,

²⁸meihal biakna tau a nazat khempeuh tawh, kuang le a ngakna na zut ding hi.

²⁹Tuate a siangtho pen ahih theih nadingin na siangthosak ding a, tuate a lawng peuhmah a siangtho suak ding hi.

³⁰Amaute in keima tungah siampi na hong sep theih nadingun Aaron le a tapate nangmah in sathau nilhin amaute na siangthosak ding hi.

³¹Nangmah in Israel mite kiangah, ‘Hih pen na khang tawntungun a siangtho keima sathau nilh hi ding hi.

³²Mi mawkmawkte’ pumpi tungah tua sathau kisung lo ding a, tua bangin a kigawm sathau dang na bawl kei ding uh hi. Tua pen a siangtho hi a, note a dingin a siangtho hi ding hi.

³³Tua tawh a kibangin a bawl mi peuhmah ahi a, a pualam mi khatpeuh tuate a nilhsak mi peuhmah ahi zongin ama mite’ kiang panin kikhenkhia ding hi, TOPA in ci hi,’ ci in,” a ci hi.

³⁴TOPA in Moses kiangah, “A namtui nate, stakte, onikha, le galbanum, paknamtui citak tawh a namtui nate (a tamna a kikim ciatin) la inla,

³⁵paknamtui bawlte’ hih bangin ci sawhin a nin baang lo, biakna paknamtui bawl in.

³⁶Nangmah in kimkhat a neu mahmahin na satnen ding a, nang tawh ka kituah nading kikhopna buk sunga thuciamna mai-ah pawlkhat na koih ding hi. Tua pen nangma a dingin a siangtho pen hi ding hi.

³⁷A kigawmpih ngei teng tawh na bawl ding paknamtui pen note a dingin na bawl kei ding uh hi. Tua pen note a dingin TOPA’ tungah a siangtho hi ding hi.

³⁸Tua tawh a kibangin paknamtui a bawl mi peuhmah ama mite’ kiang panin kikhenkhia ding hi,” a ci hi.