Read Tedim Chin PAIKHIATNA 31 Bible Online

PAIKHIATNA 31 - Tedim Chin bible

PAIKHIATNA 31

¹TOPA in Moses kiangah,

²“Thei in; Judah minam Hur’ tapa ahi Uri’ tapa Bezalel a minin ka sam khin hi.

³Lim hoihte a geel ding; kham, ngun, sumngo tawh na a bawl ding; siamna nam khempeuhah nasep nading; bulh ding suangte seekna le singzep nasep a sem dingin vangliatna, siamna, pilna, theihna, le khutsiam nasep khempeuh tawh amah ka kidimsak hi.

⁶En in, amah tawh, Dan minam, Ahisamak’ tapa Oholiab ka seh khinzo hi. Amaute in nang kong thupiak khempeuh a bawl theih nadingun a hih thei mi khempeuh tungah siamna ka pia khinzo hi.

⁷Amau’ sep dingte hih bang ahi hi: Kikhopna buk, le thuciamna singkuang le a tunga om hehpihna tokhom le buk sung na khempeuh,

⁸sabuai le a nazatte le a siangtho meivakkhuam le a nazatte khempeuh, paknamtui biakna tau,

⁹le meihal biakna tau a nazatte khempeuh tawh, kuang le a ngakna,

¹⁰le amau’ siampi nasep nadingin siampi Aaron’ puan siangthote le ama tapate’ puante ahi, hoihtakin a kigan puante,

¹¹le siangtho mun a dingin nilh sathau le a namtui paknamtui ahi hi. Ka thupiakte khempeuh tawh kituakin nangmah in na bawl ding hi,” a ci hi.

¹²TOPA in Moses kiangah,

¹³“Israel mite tungah hih bangin gen in: ‘Keima Sabbath ni-in note na tawlnga ding uh hi. Bang hang hiam cih leh hih pen TOPA ahi keimah in note a hong siangthosak ka hihna na theih nadingun na khang tawntungun keimah le note’ kikalah lim khat hi ding hi.

¹⁴Sabbath ni-in note na tawlnga ding uh hi. Bang hang hiam cih leh note a dingin a siangtho ahi hi. Tua ni-in a tawlnga lo mi peuhmah kithat ding a, tua ni-in na a sem mi peuhmah ama mite’ kiang panin kikhenkhia ding hi.

¹⁵Ni guk sungin nasep kizo ding hi. Ahih hangin a ni sagih ni pen a thupi-a tawlngakna Sabbath ni hi a, TOPA’ tungah siangtho hi. Sabbath ni-in nasep khat peuhpeuh a sem mi peuhmah kithat ding hi.

¹⁶Tua ahih ciangin a tawntung thuciamna-in amau’ khang tawntungin Sabbath tangin, Israel mite in Sabbath kem ding uh hi.

¹⁷Ni guk sung teng TOPA in van le lei bawlin, a ni sagih ni-in amah tawlnga a, a tha dimsakkik hi. Keimah le Israel mite’ kikalah hih Sabbath ni pen lim khat hi tawntung ding hi, ci hi,’ ci in,” a ci hi.

¹⁸Sinai Mual tungah thugenna a man khit ciangin Pasian’ khut tawh a kigelh suangpek ahi thuciamna suangpek nihte, amah in Moses a pia hi.