Read Tedim Chin PAIKHIATNA 33 Bible Online

PAIKHIATNA 33 - Tedim Chin bible

PAIKHIATNA 33

¹TOPA in Moses kiangah, “Hih mun nusia un; Abraham, Isaac, le Jakob tungah, ‘Na suanlekhakte uh tungah ka pia ding hi,’ ci-a ka ciam leitangah nangmah le Egypt leitang panin na paikhiatpih toh mite tawh hih lai panin paito un.

²Note’ mai-ah vantungmi khat ka sawl ding a, Kanaan mite, Amor mite, Hit mite, Perez mite, Hiv mite, le Jebus mite ka hawlkhia ding hi.

³Bawngnawi le khuaizu a luanna leitangah paito un. Ahi zongin note hong sisak kha ding ka hih ciangin note’ lakah kei kong paito kei ding hi. Bang hang hiam cih leh note mi lungkhauh na hi uh hi,” a ci hi.

⁴Mite in hih thusiate a zak uh ciangin amaute thuum uh a, kuamah kizem lo uh hi.

⁵Bang hang hiam cih leh TOPA in Moses kiangah, “Israel mite’ tungah hih bangin gen in: ‘Note mi lungkhauh na hi uh hi. Note’ lakah tomno khat sung hong paito leng, note kong beisak ding hi. Tua ahih ciangin note kong bawl nading ka theih nadingin note’ tung panin na kizepnate uh suahkhia un,’ ci in,” ci-in gen khinzo hi.

⁶Tua ahih ciangin Israel mite in Horeb Mual pan a kipanin amau’ kizepnate suahkhia uh hi.

⁷Israel mite in giahphual a sat simin Moses in puanbuk la-in giahphual panin a gamla pekah lam thei zel hi. Amah in tua pen kikhopna buk, ci hi. TOPA’ tungah thu a dong nuam mi peuhmah giahphual pualama om kikhopna bukah paikhia uh hi.

⁸Puanbukah Moses a pai peuhpeuh ciangin mi khempeuh ding to-in, a milipin a puanbuk kong ciat uhah ding uh a, puanbuk sungah a tum khit mateng Moses’ nung en uh hi.

⁹Puanbukah Moses a tum ciangin meii khuam hong kum sukin puanbuk kongkhakah ding a, TOPA in Moses hopih hi.

¹⁰Puanbuk kongkhakah meii khuam a ding a muh uh ciangin a milipin a puanbuk kong ciat uhah mi khempeuh dingto-in kun uh hi.

¹¹Tua bangin, mi khat in a lawmpa a hopih bangin maitang kituahin TOPA in Moses hopih zel hi. Giahphual ah Moses a ciahkik ciangin, Nun’ tapa, ama nasem tangval Joshua, puanbukah omlai hi.

¹²Moses in TOPA’ kiangah, “Thei in; nangmah in keima kiangah, ‘Hih mite paipihto in,’ nong ci hi. Ahih hangin kei tawh nong sawlkhop ding mi kei nong theisak nai kei hi. Ahi zongin nangmah in, ‘Na minin nang kong thei a, ka mai-ah maipha zong na mu khin hi,’ nong ci khin hi.

¹³Tua ahih ciangin tu-in nang tungah kong thum hi; na muhna-ah maipha ka ngah leh keimah in nang hong thei-in, na muhna-ah maipha ka ngah theih nadingin tu-in nangma geelnate kei hong lak in. Hih minam pen nangma mite ahihna zong ngaihsun in,” a ci hi.

¹⁴TOPA in Moses kiangah, “Nang tawh kong pai ding a, lungsim tawlngakna hun nang kong pia ding hi,” a ci hi.

¹⁵Moses in ama kiangah, “Nang nong paipih kei ding leh, hih lai panin kote hong paikhiatosak kei in.

¹⁶Bang hang hiam cih leh keimah le nangma mite in nangma muhna-ah maipha ka ngahna uh bang ci-in kithei ding ahi hiam? Leitung a om mi khempeuh tungah keimah le nangma mite ka tungnunna uh pen kote tawh nang nong paikhopna hi lo ahi hiam?” a ci hi.

¹⁷TOPA in Moses kiangah, “Nangma gensa hih thu mahmah keimah in ka hih ding hi. Bang hang hiam cih leh ka muhna-ah nang in maipha na ngahzo a, na minin nang kong thei hi,” a ci hi.

¹⁸Moses in, “Kong thum hi; na vangliatna kei hong lak in,” a ci hi.

¹⁹Amah in, “Keima hoihna khempeuh na mai-ah ka paisak ding a, na mai-ah keima min, ‘TOPA’ cihna ka pulak ding hi. Ka diknopna mite tungah ka dik ding a, ka hehpihnop mite ka hehpih ding hi.

²⁰Ahih hangin nangmah in ka maitang na mu thei kei ding hi. Bang hang hiam cih leh mi in kei hong mu leh tuami nungta lo ding hi,” a ci hi.

²¹Tua banah TOPA in, “En in; suang tungah na din nading keima kiangah mun khat om hi.

²²Keima minthanna vang a pai laitakin suanghawm sungah nang kong koih ding a, kei ka paikhiat mateng ka khut tawh nang kong hum ding hi.

²³Tua ciangin keimah in ka khut ka lakhia ding hi. Nangmah in ka nung na mu ding a, ahih hangin ka maitang na mu kei ding hi,” a ci hi.