Read Tedim Chin PAIKHIATNA 34 Bible Online

PAIKHIATNA 34 - Tedim Chin bible

PAIKHIATNA 34

¹TOPA in Moses kiangah, “A masa tawh a kibangin suangpek nih sui in. Na sukkhap a masa suangpeekte sunga om thute tuate tungah ka gelh kik ding hi.

²Kithawi-in Sinai Mual tungah zingsangin hong paito inla, mual dawn tua munah keima kiangah hong kilak in.

³Nang tawh kuamah hong paito khawmsak kei inla, mualtung tengah kuamah omsak kei in. Tua mual mai-ah tuuhon ahi a, bawnghon ahi zongin gamtasak kei in,” a ci hi.

⁴Tua ahih ciangin Moses in a masa bangin suangpek nih a sui hi. Zingsang ciangin amah tho baihin, TOPA in amah a thupiaksa bangin Sinai Mual tungah paito a, a khut sungah suangpek nih a tawi hi.

⁵Meii sungah TOPA kum sukin tua lai-ah Moses tawh ding a, TOPA in ama min a pulak hi.

⁶Ama mai-ah TOPA pai-in, “TOPA, TOPA, hehpihna nei-in a dik Pasian; lungduai-in itna kip le thutakna tawh a dim;

⁷mi tul tampite a dingin itna kip a nei; mawhna, thu palsatna le khialhna maisakin; ahih hangin bangbang hitaleh mawhna a khahkhong ngei lo; pate’ mawhna tate’ tung le tute’ tung, khang thum khang lina dongin a thukpa,” ci-in a pulak hi.

⁸Moses in leilak lamah a lu kunin a bia hi.

⁹Amah in, “Tu-in na muhna-ah maipha ka muh leh, TOPA aw, kong thum hi; lungkhauh mite ka hita uh zongin kote’ kiangah TOPA hong pai in. Kote’ mawhna le kote’ khialhna hong maisak inla, nangma mi dingin kote hong sang in,” a ci hi.

¹⁰TOPA in Moses kiangah, “En in, keimah in thuciamna khat ka bawl hi. Nangma mi khempeuh’ muhna-ah, leitung khempeuh hitaleh minam khatpeuh sungah hitaleh cikmahin tua bang a kibawl ngei lo na lamdangte ka bawl ding a, note’ lakah a om mite khempeuh in TOPA’ nasepna mu ding uh hi. Bang hang hiam cih leh note’ tungah kong bawl ding na pen a kihtakhuai thu ahi hi.

¹¹“Tuni-a kong thupiak zui in. En in, na mai-ah Amor mite, Kanaan mite, Hit mite, Perez mite, Hiv mite, le Jebus mite ka hawlkhia ding hi.

¹²Na paina leitangah a teng mite tawh thuciamna bawlkha kei inla, tua pen note a dingin thangzak a suahkhak loh nadingin nangmahmah kidawm in.

¹³Nangmah in amau’ biakna taute phelin, amau’ biakna khuamte kuaitanin, amau’ Asherah milimte na phukpai ding hi.

¹⁴”(Pasian dang na bia kei ding hi. Bang hang hiam cih leh TOPA, ama min Aam a hi pa pen a aam Pasian ahi hi.)

¹⁵Nangmah in tua leitangah a teng mite tawh thuciamna bawlkha kei in. Amaute in amau’ pasian-te tawh paktatna bawlin amau’ pasian-te’ tungah biakna pia-in, khatpeuh in note hong sap ciangin, note in ama biakpiakna na ne kha ding uh a,

¹⁶note in amau’ tanute na tapate uh a dingin la-in, amau’ pasian-te tawh paktatna a bawl a tanute in amau’ pasian-te tawh na tapate uh paktatsak kha ding uh hi.

¹⁷“A kisung pasian-te note a dingin bawlin na bia kei ding uh hi.

¹⁸“Silngo sawh loh anlum pawi na bawl ding uh hi. Abib kha, a kisehsa hun sungteng, nang kong thupiak mah bangin ni sagih sung silngo sawh loh anlum na ne ding uh hi. Bang hang hiam cih leh Abib kha sungin Egypt panin note na paikhia uh hi.

¹⁹“Mihing le ganhing tacil a pa khempeuh keima-a’ ahi hi.

²⁰La a tacilte tuuno khat tawh na tanh ding uh hi. Na tat kei uhleh a ngawng na kuaitan ding uh hi. Na tapa cilte khempeuh uh na tanh ding uh hi. Keima mai-ah a guakin kuamah hong kilak lo ding hi.

²¹“Ni guk sung na na sem ding uh a, ahi zongin a ni sagih ni-in na tawlnga ding uh hi. Lokhawh hun le anlak hun sungin zong na tawlnga ding uh hi.

²²“Nipikalte’ pawi, mangbuh a tung masa pawi, le kum bei ciangin an kaihkhop pawi na bawl ding uh hi.

²³“Pasal khempeuh Israel Pasian, TOPA Pasian’ mai-ah kum khatin thumvei kilak ding uh hi.

²⁴Bang hang hiam cih leh note’ mai-ah minam dangte ka hawlkhia ding a, na gamgite uh nomau a dingin ka keek ding hi. TOPA na Pasian uh’ mai-ah kum khatin thumvei a kilak dingin na paitoh sungun na leitang uh mi khat peuhpeuh in a hong deihgawh khak ding lunghihmawhna om lo ding hi.

²⁵“Note in silngo tawh keimah biakpiakna si na pia khawm kei ding uh a, Paisan Pawi biakpiakna zong zingsang dong na omsak kei ding uh hi.

²⁶“Note in na anpalte uh lakah a tung masa pen TOPA na Pasian uh’ inn-ah na paipih ding uh hi. “Note in keelno a pi’ nawizu tawh na huan kei ding uh hi,” a ci hi.

²⁷TOPA in Moses kiangah, “Hih thute gelh in. Hih thute tawh kizui-in nang le Israel tawh thuciamna khat ka bawlzo hi,” a ci hi.

²⁸Tua lai-ah sun sawmli le zan sawmli sung TOPA tawh Moses om a, tua hun sungteng anletui a ne kei hi. Amah in suangpek tungah thuciamna kammalte ahi thupiak sawmte a gelh hi.

²⁹A khut sungah thuciamna suangpek nih tawh Sinai Mual tung panin Moses hong paisuk ciangin, Pasian tawh amah kiho khin ahih manin a maitang vun a taan lamtak Moses in thei lo hi.

³⁰Aaron le Israel mite khempeuh in Moses a muh ciangin, a maitang vun na taang a, ama mai-ah a pai ding uh amaute lau uh hi.

³¹Ahih hangin amaute kiangah Moses pai hi. Aaron le mihon makaite khempeuh ama kiangah hong paikik uh a, Moses in amaute hopih hi.

³²Tua khit ciangin Israel mi khempeuh a nai-ah hong pai uh a, TOPA in Sinai Mual-ah ama tunga a gen khempeuh thupiakna-in amaute tungah a pia hi.

³³Moses in amaute tawh thugen a man khit ciangin, amah in a maitangah kiliahna puan khat a koih hi.

³⁴Ahih hangin TOPA tawh a kiho dingin ama mai-ah Moses a tum peuhpeuh ciangin, amah a pusuah kik mateng a kiliahna puan la khia hi. Amah hong paikhia-in ama tungah a kipia thute Israel mite kiangah a gen ciangin,

³⁵Israel mite in Moses’ maitang vun a taang mu uh hi. Amah tawh a kiho dingin a pai matengin Moses in kiliahna puan tawh a maitang a khuh kik hi.