Read Tedim Chin PAIKHIATNA 35 Bible Online

PAIKHIATNA 35 - Tedim Chin bible

PAIKHIATNA 35

¹Moses in Israel mihonpi khempeuh khawmin amaute kiangah, “Hihte pen note’ hih ding TOPA’ hong thupiak ahi hi.

²Ni guk sungin nasep kiman ding a, ahih hangin a ni sagih ni-in thupi-a tawlngakna Sabbath siangtho TOPA’ tungah na nei ding uh hi. Tua ni-in na khat peuhpeuh a sem peuhmah kithat ding hi.

³Sabbath ni-in na tenna khempeuh uhah mei na cih kei ding uh hi,” a ci hi.

⁴Moses in Israel mihonpite khempeuh tungah, “TOPA’ hong thupiak hih bang ahi hi:

⁵Note in TOPA’ tungah biakna na pia ding uh hi. A pia nuam peuhmah in TOPA’ tungah biakna paipih un. Tuate in: Kham, ngun le sumngo,

⁶a dum, a dupsan, a ausan khaute le a kopin a kikhuk puan hoihte, keelmul,

⁷a kisansak tuutal vunte le savunte; singkha sing,

⁸meivak a’ ding sathau, nilh sathau le a paknamtui dingin a namtui nate,

⁹siampipuan le awmdalah bulh dingin onik suang le suang dangte ahi hi.

¹⁰“Note’ lak panin siamna a nei mi peuhmah hong paisak unla, TOPA’ thupiaksa khempeuh bawlsak un. Tua a bawl dingte pen biakbuk,

¹¹a puanbuk le a khuhna, a vankhainate le a khuampeekte, a zawlte, a khuampite, a bullente;

¹²singkuang a zawlte tawh, hehpihna tokhom le kongkhak dalna puan;

¹³sabuai a zawlte le a nazatte khempeuh tawh, Ompihna Anlum;

¹⁴khuavak dingin meivakkhuam zong, a nazatte le a meivakte tawh, meivak dingin sathau;

¹⁵paknamtui biakna tau, a zawlte tawh, nilh sathau le a namtui paknamtui le biakbuk kongah kongkhak a’ ding puankhai;

¹⁶meihal biakna tau, a sumngo siklen, a zawlte, a nazatte khempeuh, kuang le a ngakna tawh;

¹⁷buktual a a puankhaite, a khuampite le a bullente tawh, tual kongpi a’ ding puankhai;

¹⁸biakbuk khetphimte le huang khetphimte, le a khaute;

¹⁹siangtho munah zat dingin limtakin a kigan puante, amau’ siampi nasep nadingin siampi Aaron a’ ding puan siangtho le ama tapate’ puante ahi hi,” a ci hi.

²⁰Tua ciangin Israel mihonpi khempeuh Moses’ omna panin paikhia uh hi.

²¹Piak nopna lungsim a nei mi peuhmah hong pai tawm uh a, kikhopna buk le a nasep nading khempeuh le puan siangthote a zat dingin TOPA a’ ding a piakte uh hong puak uh hi.

²²Tua ahih ciangin numei, pasal hong pai uh hi. Piak nopna lungsim a neite khempeuh in tukkilhte, bilbahte, min gelhna zungbuhte, le banbulhte ahi kham tawh a kibawl na namkim hong paipih uh a, a milip in TOPA’ tungah kham tawh piakna ap uh hi.

²³A dum, a dupsan, a ausan khaute, puan hoih, keelmul, a kisansak tuutal vunte, ahih kei leh savun hoihte ahi zongin a nei mi peuhmah in tuate hong paipih uh hi.

²⁴Ngun ahi a, sumngo ahi zongin a pia thei peuhmah in TOPA’ tungah tua nate paipih uh a, nasep nadinga kimang thei ding singkha sing a nei mi peuhmah in zong hong paipih hi.

²⁵A hih thei numei khempeuh in a khut uh tawh khau khuk uh a, amau’ khuksa a dum, a dupsan, a ausan khaute le a kopin a kikhuk khaute hong paipih uh hi.

²⁶Hih theih siamna a nei numei khempeuh in zong keelmul khuk uh hi.

²⁷Makaite in siampipuan le awmdal a bulh dingin onik suang le suang dangte,

²⁸meivak ding, nilh sathau ding, le paknamtui dingin a namtui nate le sathau hong paipih uh hi.

²⁹TOPA in Moses tunga a thupiaksa nasep nadingin na khat peuhpeuh a pia nuam numei pasal Israel mi khempeuh in utthu-a biakna-in TOPA’ tungah hong paipih uh hi.

³⁰Moses in Israel mite kiangah, “Thei un; TOPA in a minin Judah minam, Hur’ tapa Uri, Uri’ tapa Bezalel sam khin hi.

³¹Lim hoihte a geel ding; kham, ngun, sumngo tawh na a bawl ding; siamna nam khempeuh nasep nading, bulh ding suang seekna, le singzep nasep a sem dingin amah in vangliatna, siamna, pilna, theihna, le khutsiam nasep khempeuh tawh amah kidimsak hi.

³⁴TOPA in amah le Dan minam Ahisamak’ tapa Oholiab tungah midangte hilh siamna pia khin hi.

³⁵Amah in khutsiam nasep, geelsiam nasep; a dum, a dupsan, a ausan khaute le a kopin a kikhuk puanzep siam nasep; siamgat siamna, le geelsiam nasep ahi zongin nasep namkim a sem dingin amaute tungah siamna a guan hi.