Read Tedim Chin PAIKHIATNA 37 Bible Online

PAIKHIATNA 37 - Tedim Chin bible

PAIKHIATNA 37

¹Bezalel in singkha sing tawh singkuang bawl a, a dung pi thum le letmat kua, a vai pi nih le letmat thum, a sanna pi nih le letmat thum mah ahi hi.

²Kham citak tawh a sung le a pua zutin, a kimkotah kham geihual khat a bawl hi.

³A kiu lite a dingin kham kual li, a pang khatah kual nih, a pang langkhat a dingin kual nih mah a sung hi.

⁴Singkha singzawlte zong bawl a, kham tawh tuate zutin,

⁵singkuang puak nadingin singkuang panga kualte sungah a zawlte a khum hi.

⁶Kham citak tawh hehpihna tokhom khat bawl a, a dung pi thum le letmat kua, a vai pi nih le letmat thum ahi hi.

⁷Amah in sek tawh a kiseek kham tawh kherub nih, hehpihna tokhom mong tuakah a bawl hi.

⁸Kherub khat mong khatah, kherub khat a mong langkhatah om a, a mong nihte-ah hehpihna tokhom tawh sakhatin kherub-te a bawl hi.

⁹Kherub-te in a khate uh tua tokhom tungah zalin, amau’ khate tawh hehpihna tokhom liimsun uh a, amaute khatlekhat kimaingat uh hi. Hehpihna tokhom lamah kherub-te’ mai a nga hi.

¹⁰Amah in singkha sing tawh sabuai zong bawl a, a dung pi thum, a vai pi khat le alang, a sanna pi nih le letmat thum ahi hi.

¹¹Kham citak tawh zut a, a kimkotah kham tawh a geihual khat a bawl hi.

¹²Khut peek cia a pha zawl khat a kimkotah bawl a, a zawl kimkotah kham geihual khat a bawl hi.

¹³Tua sabuai a dingin kham kual li sungin, a kiu li, a khe lite-ah a kualte a gak hi.

¹⁴Sabuai puak nading zawlte a len dingin a zawl gei-ah a kualte om hi.

¹⁵Sabuai puak nadingin singkha singzawlte bawl a, kham tawh tuate a zut hi.

¹⁶Amah in sabuai tunga om ding beellekuangte, paknamtui a dingin kuangdaite le pakante, tui buah nadingin kuang-ukte le thawl gongbakte, kham citak tawh a bawl hi.

¹⁷Amah in kham citak tawh meivakkhuam zong a bawl hi. Meivakkhuam a bul le a kungte pen a kiseek nate tawh kibawl hi. A haite, a nunte, le a paakte, meivakkhuam tawh sakhat ahi hi.

¹⁸A pangte panin hiang guk meengkhia a, a pang khatah meivakkhuam hiang thum omin, a pang langkhatah meivakkhuam hiang thum mah a om hi.

¹⁹Hiang khat tungah a nun le a pak a om, almond gah tawh a kibang hai thum, le adang hiang khat ciat tungah a nun le a pak a om, almond gah tawh a kibang hai thum mah kibawl hi. Tua ahih ciangin meivakkhuam panin a hiang gukte a meengkhia ahi hi.

²⁰A meivakkhuam tung mahmahah a nun le a pak tawh a om, almond gah bangin a kibawl hai li omin,

²¹meivakkhuam panin hiang guk a kopte’ bulah tua tawh sakhat ahi nun khat om hi.

²²Amau’ nunte le a hiangte pen tua tawh sakhat hi a, a buppi-in kham citak a kiseek sakhat ahi hi.

²³A meivak sagihte le a taitehte le a kuangte kham citak a bawl ahi hi.

²⁴Amah in kham citak tawi sawmnih le tawi khat a gik tawh tua meivakkhuam le a nazatte khempeuh a bawl hi.

²⁵Amah in singkha sing tawh paknamtui biakna tau bawl a, a dung pi khat le alang, a vai pi khat le alang mah ahi hi. Tua pen a ning kikim a, a sanna pi thum hi a, a kite pen tua biakna tau tawh sakhat ahi hi.

²⁶Amah in a tungzang, a kimkota a pangte le a kite kham citak tawh a zut hi. A kimkotah kham geihual khat

²⁷le a puak nading zawlte a len dingin a pang tuak a geihual nuai takah kham kual nih a bawl hi.

²⁸Amah in singkha sing tawh a zawlte bawlin, kham tawh tuate a zut hi.

²⁹Amah in paknamtui bawlte’ gawm bangin a siangtho nilh sathau le a siangtho a namtui paknamtui zong a bawl hi.