Read Tedim Chin PAIKHIATNA 38 Bible Online

PAIKHIATNA 38 - Tedim Chin bible

PAIKHIATNA 38

¹Amah in meihal biakna tau zong singkha sing tawh bawl a, a dung pi sagih le alang, a vai pi sagih le alang mah ahi hi. A ning kikim a, a sanna pi li le alang ahi hi.

²Amah in tua tau a dingin a kiu lite-ah a kite a bawl hi. A kite, a tau tawh sakhat hi a, sumngo tawh a zut hi.

³Biakna tau nazat khempeuh, beelte, kawbiate, kuangte, sikkate le vutluahna peekte a bawl hi. A nazat khempeuh sumngo tawh a bawl hi.

⁴Biakna tau a dingin a zawl nuai-ah, a kimciang a ban suk, a vang simsiam, sumngo siklen khat a bawl hi.

⁵A zawlte a len dingin sumngo siklen kiu lite’ tunga ding a kual li a sung hi.

⁶Singkha sing tawh a zawlte bawl a, sumngo tawh tuate a zut hi.

⁷A puak nadingin biakna tau pangte a om a kualte sungah a zawlte khum a, singpekte tawh biakna tau a kuakin a bawl hi.

⁸Amah in kikhopna buk kongkhakah na a sem numeite’ limlangte panin sumngo tawh kisilna kuang le a ngakna a bawl hi.

⁹Amah in buktual a bawl hi. Leitaw lampang buktual a puan kikhaite pen a kopin a kikhuk a kigan puan hoih hi a, pi za le pi sawmnga a sau hi.

¹⁰A khuampite sawmnih hi a, a bullente zong sawmnih mah ahi hi. Sumngo tawh kibawl a, ahih hangin a vankhainate le a gaknate ngun ahi hi.

¹¹Leilu lampang a ding zong tua bangmah ahi hi.

¹²Nitumna lampang a dingin puan kikhai sukte pi sawmsagih le pi nga hi a, a khuampite sawm hi-in, a bullente sawm mah hi a, a vankhainate le a gaknate ngun ahi hi.

¹³A mailam, nisuahna lama dingin pi sawmsagih le pi nga mah ahi hi.

¹⁴Kongpi pang khat-a ding puan kikhai sukte pen pi sawmnih le nih le alang hi a, khuampi thum le bullen thum tawh ahi hi.

¹⁵A pang langkhat ading zong tua bangmah ahi hi. Buktual kongpi hih lam le hua lamah khuampi thum le bullen thum tawh a puan khaisukte pi sawmnih le nih le alang ahi hi.

¹⁶Buktual kimkota puan kikhai sukte khempeuh pen a kopin a kikhuk a kigan puan hoih ahi hi.

¹⁷Khuampite a’ ding a bullente pen sumngo hi a, ahih hangin a vankhainate le a gaknate ngun ahi hi. A khuamluzepnate a kizutna zong ngun hi a, buktual a khuamte khempeuh ngun kibawl gakna tawh kigak hi.

¹⁸Buktual kongpi puankhai pen a dum, a dupsan, a ausan khaute le a kopin a kikhuk a kigan puan hoihte phim tawh kikhui-in a kizem ahi hi. Buktual a kikhai sukte tawh kizui-in pi sawmthum sau-in, a vailam pi sagih le alang sang hi.

¹⁹A khuampite li hi a, a bullen lite sumngo hi a, a vankhainate ngun hi a, a khuamluzepnate le a gaknate a kizutna ngun mah ahi hi.

²⁰Biakbuk le buktual kimkota ding khetphimte khempeuh sumngo ahi hi.

²¹Hihte pen siampi Aaron’ tapa Ithamar’ vaihawmna nuai-ah Levi mite’ sep ding TOPA’ omna ahi biakbuk-a dingin Moses’ thupiakna tawh a kisim van malte ahi hi.

²²Judah minam Hur’ tapa ahi Uri’ tapa Bezalel in TOPA in Moses a thupiak khempeuh a bawl hi.

²³A khut siam, a geel siam, a dum, a dupsan, a ausan khaute le a kopin a kikhuk a kigan puan hoihte a zem, Dan minam, Ahisamak’ tapa Oholiab in zong amah a huh hi.

²⁴Nasep nadinga a kizang kham khempeuh, biakbuk lamna-a a kizang, a kipia khamte, biakinn shekel-in talen sawmnih le kua le shekel zasagih sawmthum ahi hi.

²⁵Mi simna sungah a kihel mihonte tung panin a kingah ngunte, biakinn shekel-in talen zakhat le shekel tulkhat zasagih sawmsagih le nga ahi hi.

²⁶Mi khat ciangin beka khat (biakinn shekel-in shekel lang) pai pia a, a pia mi, kum sawmnih a pha panin a tungsiah mi kisimna a a kisim peuhmah tul zaguk le tulthum le zanga le sawmnga ahi hi.

²⁷Ngun talen za khatte pen biakbuk khuam bullente le dalna puan khuam bullente dingin sun’ ding ahi hi. Talen za khatte bullen zakhat, bullen khat ciangin talen khat ahi hi.

²⁸Amah in shekel tulkhat zasagih sawmsagih le nga pen khuampi tunga vankhai nadingin bawl a, a khuamluzepnate zutin tuate a’ ding gakna a bawl hi.

²⁹A kipia sumngo khempeuh, talen sawmsagih le shekel tulnih le zali ahi hi.

³⁰Amah in tua tawh kikhopna buk kongkhakte a dingin khuam bullente, sumngo biakna tau le a sumngo siklen le biaknatau nazat khempeuh,

³¹buktual kimkota khuam bullente, buktual kongpi khuam bullente, biakbuk khetphimte khempeuh le buktual kimkota khetphim khempeuh a bawl hi.