Read Tedim Chin PAIKHIATNA 39 Bible Online

PAIKHIATNA 39 - Tedim Chin bible

PAIKHIATNA 39

¹TOPA in Moses a thupiaksa bangin, siangtho munah nasep nadingin amaute in a dum, a dupsan, a ausan khaute tawh limtakin a kigan puan a bawl uh hi. Amaute in Aaron a dingin biakna puan siangtho a bawl uh hi.

²Amaute in siampipuan pen kham, a dum, a dupsan, a ausan tuumul khaute le a kopin a kikhuk a kigan puan hoihte tawh a bawl uh hi.

³Hoihtakin a kigeel, a dum, a dupsan, a ausan tuumul khaute le a kopin a kikhuk a kigan puan hoihte-ah zat dingin kham peek kiseekin khau-in kizen hi.

⁴Amaute in siampipuan a dingin liangkaih puan bawl uh a, a mong nih tegel ah zom uh hi.

⁵TOPA in Moses a thupiaksa bangin, amah a gak dingin hoihtakin a kigan tua tunga puan om pen kham, a dum, a dupsan, a ausan tuumul khaute le a kopin a kikhuk a kigan puan hoihte tawh kibawlin, a nate le a sepna zia a kibang ahi hi.

⁶Israel tapate a phazah tawh kizui-in, onik suangte kitat a, kham tawh a kizepna sungah a minte kigelhin, min gelh siamte’ gelh bangin kibawl hi.

⁷TOPA in Moses a thupiaksa bangin Israel tapate phawkna suang dingin siampipuan’ liangkaih puan tungah a bulh uh hi.

⁸Amaute in kham, a dum, a dupsan, a ausan tuumul khaute le a kopin a kikhuk a kigan puan hoihte tawh, siampipuan a kibawl puan bangin hoihtakin awmdal a bawl uh hi.

⁹Tua awmdal a ning kikim a, thuap nihin kibawl a, a kikhep ciangin a dung letmat kua, a vai letmat kua mah a pha hi.

¹⁰Amaute in tua sungah suang gual li bulh uh a, Sardis suang, topaz suang, le karbankal suang gual khat pen a gual masa ahi hi.

¹¹A gual nihna-ah emerald suang, sapfaia suang, le diamond suang ahi hi.

¹²A gual thumna-ah jakinth suang, agate suang, le amethyst suang ahi hi.

¹³A gual lina-ah beryl suang, onik suang, le jasper suang ahi hi. Kham tawh zepna sungah tua suangte khempeuh kikoih hi.

¹⁴Israel tapate a phazah tawh kituakin amaute’ min a kigelhna suang sawm le nih om hi. Tua min gelhnate pen minam sawm le nih a huamin a kigelh ahi hi.

¹⁵Amaute in awmdal tungah khau tawh a kibang, a kihual kham citak khainiang a bawl uh hi.

¹⁶Kham tawh a kibawl zepna nih le kham kual nih bawl uh a, awmdal mong nihte-ah kham kual nihte a koih uh hi.

¹⁷Amaute in awmdal mongte-ah a om kual nihte pen kham khau nihte tawh a khih uh hi.

¹⁸Amaute in zepna nihte tungah khau mong nihte zom uh a, tua bangin amaute in siampipuan’ liangkaih puan tung a mai lamah a bulh uh hi.

¹⁹Tua ciangin amaute in kham kual nih bawl uh a, siampipuan tawh a kizom a sunglam nawl, awmdal mong nihte-ah a bulh uh hi.

²⁰Amaute in kham kual nih bawl uh a, siampipuan’ liangkaih puan nihte’ nuai a mailam, hoihtakin a kigan siampipuante’ puankhau a kizopna tung takah a bulh uh hi.

²¹TOPA in Moses a thupiaksa bangin, hoihtakin a kigan siampipuan khau tungah a om theih nading le siampipuan tung panin awmdal a kol theih loh nadingin amaute in siampipuan’ kualte-ah khau dum khatin a kualte tawh awmdal a gak uh hi.

²²Amaute in khau dum bek tawh a kigan siampi puantualpi zong a bawl uh hi.

²³A kikeek loh nadingin puantualpi ngawng pen puan ngawng vang bangin a ngawng kimkotah a zimna om hi.

²⁴Puantualpi mongte-ah amaute in a dum, a dupsan, a ausan tuumul khaute le a kopin a kikhuk a kigan puan hoih tawh mang kawlsing gahte a bawl uh hi.

²⁵TOPA in Moses a thupiaksa bangin, amaute in kham citak siklongte zong bawl uh a, puantualpi mong kimkot tunga mang kawlsing gahte’ kikalah siklongte a koih uh hi.

²⁶Biak nasep nadinga puantualpi mong kimkot tungah siklong khat, mang kawlsing gah khat, siklong khat, mang kawlsing gah khat, cih bangin kihelh hi.

²⁷TOPA in Moses a thupiaksa bangin, amaute in Aaron le a tapate a dingin khau hoih tawh a kigan puantungsilhte

²⁸le khau hoih tawh a kigan dialpi le khau hoih tawh a kigan lukhute, a kopin a kikhuk a kigan puan hoihte tawh a kibawl pheituam hoihte,

²⁹le a kopin a kikhuk a kigan puan hoihte tawh a kibawl puan kawnggak le phim tawh kikhui-in a kizem a dum, a dupsan, a ausan tuumul puante zong a bawl uh hi.

³⁰Amaute in kham citak tawh a siangtho kizepna peek khat bawl uh a, min gelhna a kibawl mah bangin tua tungah thu gelhin, “TOPA’ tungah siangtho,” ci uh hi.

³¹TOPA in Moses a thupiaksa bangin, amaute in a tunga dialpi tungah a gak dingin tua tungah khau dum khat a vawh uh hi.

³²Tua bangin kikhopna buk ahi biakbuk nasep khempeuh kiman hi. TOPA in Moses a thupiaksa khempeuh bangin Israel mite in sem khin uh hi. Tua ahih ciangin amaute man khin uh hi.

³³Amaute in biakbuk, a puanbuk le a nazat khempeuh, a vankhainate, khuampeekte, a zawlte, a khuampite le a bullente;

³⁴a kisansak tuutal vunte le savun dangte tawh a kibawl khuhna le kong puankhai dalna puan;

³⁵thuciamna singkuang, a zawlte le hehpihna tokhom tawh;

³⁶sabuai le a nazat khempeuhte le Ompihna Anlum;

³⁷kham citak meivakkhuam le meivak a kibulhsa tawh a meivakte le a nazatte khempeuh le meivak a ding sathau;

³⁸kham biakna tau, nilh sathau le a namtui paknamtui le puanbuk kongkhak-a ding kongpuankhai;

³⁹sumngo biakna tau le a sumngo siklen, a zawlte le a nazat khempeuh; kisilna kuang le a ngakna;

⁴⁰buktual a puan kikhaite, a khuampite, a bullente le buktual kongpi-a ding kongpuankhai, a khaute le a khetphimte; le kikhopna buk ahi biakbuk nasepna-ah a nazat khempeuh;

⁴¹siampi nasep nadingin siangtho mun a zat ding hoihtakin a kibawl puante, siampi Aaron a’ ding biakna puan siangthote le ama tapate’ puante, Moses kiangah a paipih uh hi.

⁴²TOPA in Moses a thupiaksa khempeuh tawh kituakin Israel mite in nasep khempeuh hih uh hi.

⁴³Moses in nasep khempeuh vel a, amaute in TOPA’ thupiaksa bangin a bawl khitna a mu hi. Tua ciangin Moses in amaute thupha a pia hi.