Read Tedim Chin JOB 1 Bible Online

JOB 1 - Tedim Chin bible

JOB 1

¹Uz gamah Job kici min nei mi khat a om hi. Tua mipa a paubaang lo, a thutang, Pasian a zahtak mi khat hi a, amah in gamtat hoih lo peuhmah peel hi.

²Amah in tapa sagih le tanu thum nei hi.

³Amah in tuu tulsagih, kalaoh tulthum, bawngtal kap zanga, lapi zanga le nasem tampi tak a nei hi. Tua ahih manin nisuahna gam sungah Job a haupen khat ahi hi.

⁴Ama tapate in inn khat panin inn khatah a ban banin pawi bawlin pai kawikawi uh a, tua pawi a siim dingin a sanggam numei thumte uh zong a sam kawikawi uh hi.

⁵Tua banga a pawi bawl uh gual khat a kikhit ciangin Job in a tapate samin amaute siansuah a, zingsangin tho baihin a ta phazah tawh kizui-in meihal biakna a pia hi; bang hang hiam cih leh Job in, “Ka tate khialin, a lungsim sung uhah Pasian samsia khathei ding uh hi,” a ci hi. Tu-a bangin Job in hih tawntung hi.

⁶Ni khat ni-in TOPA’ omna-ah vantung mite hong pai uh a, tuate lakah Satan zong hong kihel hi.

⁷TOPA in Satan kiangah, “Koi pana hong pai na hi hiam?” a ci hi. Satan in TOPA dawngin, “Leitung khempeuh a lu pan a taw dong vak kawikawi-in ka va phehlehna mun panin ka hong pai hi,” a ci hi.

⁸Tua ciangin TOPA in Satan kiangah, “Ka nasem Job na phawkkha hiam? A paubaang lo, a thutang, Pasian zahtakin gamtat hoih lo a peel amah tawh a kibang midang leitungah na mu kei ding hi,” a ci hi.

⁹Tua ciangin Satan in TOPA dawngin, “Job in Pasian hong mawk zahtak ahi hiam?

¹⁰Amah le a innkuan le a neihsate khempeuh na hutna-in a kimkotah daai khan hi lo na hi hiam? Ama hihna khempeuhah thupha na pia a, genzawh lohin ama neihsa pung hi.

¹¹Ahi zongin na khut zanin ama neihsa khempeuh suksak lecin na maitang mahmahah nang hong samsia pah ding hi,” a ci hi.

¹²Tua ciangin TOPA in Satan kiangah, “En in, ama neihsa khempeuh na khut sungah kong ap hi; ahi zongin amah taktak ahihleh na su kei ding hi,” a ci hi. Tua ciangin TOPA’ omna panin Satan a paikhia hi.

¹³Ni khat, a tapate le a tanute in a u pen uh inn-ah an ne zu ne-in om uh hi.

¹⁴Kamtai khat Job kiangah hong tungin, “Bawngtalte in lo kho-in, tuate gei-ah late gamta uh hi.

¹⁵Tua laitakin Seba mite hong pai-in ganhingte hong sut a, namsau tawh gancingte thatkhin uh hi. Hih thu a hong zasak thei dingin kei bek kong suakta hi,” a ci hi.

¹⁶Amah in a thugen a khit ma-in kamtai dang khat hong tungin, “Vantung panin keek hong kia a, tuute le tuucingte kha-in kangtum uh hi. Hih thu nang kiangah a hong ko thei dingin kei bek kong suakta hi,” a ci hi.

¹⁷Tua pa in a thugen a khit ma-in kamtai dang khat hong tung leuleu-in, “Khaldea mite hon thum in kalaohte hong sut a, namsau tawh kalaoh tung tuangte khempeuh that hi. Hih thu nang kiangah a hong ko thei dingin kei bek kong suakta hi,” a ci hi.

¹⁸Amah in a thugen a khit ma-in kamtai dang khat hong tung leuleu a, “Na tapate le na tanute a u pen uh inn-ah an ne zu ne-in om uh hi.

¹⁹Tua laitakin sehnel gam panin huihpi pingpei hong nungin a inn mutpai-in na tate denglum hi. Nang kiangah hih thu a hong ko thei dingin kei bek kong suakta hi,” a ci hi.

²⁰Hih thu a zak ciangin Job dahlua-in a puan balkek a, a sam met khia-in leilakah bok sukin Pasian a bia hi.

²¹Tua ciangin amah in, “Ka nu sung panin guaktangin ka suak a, guaktang mahin ka ciahkik ding hi. TOPA in hong pia a, TOPA mah in hong lakik hi. TOPA’ min kiphat ta hen,” a ci hi.

²²Hih thu khempeuhah Job khial lo a, Pasian zong mawhsak lo hi.