Read Tedim Chin JOB 10 Bible Online

JOB 10 - Tedim Chin bible

JOB 10

¹“Ka nuntakna ka cimtak mahmah ta hi. Ka dahna thu ka ut utin ka gen ding a, ka lungkham manin ka paupau ding hi.

²Pasian kiangah hih bangin ka ci ding hi: Kei hong mawhsak kei in. Kei nong langpanna thu hong gen in.

³Na khut tawh na sepsate simmawh bawlin, migilote’ vai panpihin, hih bangin nong netniamna ah bang phattuamna ngah na hi hiam?

⁴Mihing bang lelin gamta na hi hiam?

⁵Na nuntak hun tan kote’ nuntak tan bang lelin ngaihsun na hi hiam?

⁶Bang hangin ka mawhna hong sulzuihin, ka khialhna khempeuh hong kantel na hi hiam?

⁷Ka mawh lohna na thei a, nang kiang panin kei hong hon ding a om lohna na theihsa mah ahi hi.

⁸“Nangma khut tawh kei hong lomin na hong piangsak a, tu-in nangma khut mah in kei hong lehsuksiat hi.

⁹Leivui pana kei nong bawlna hong phawkkik in. Leivui mahin hong dengvui kik takpi ding na hi hiam?

¹⁰Kei ka pian nadingin ka pa’ tungah tha na guan a, ka nu’ sungah kei nong khangsak hi.

¹¹Guh le thaguite tawh ka pumpi ding nong bawl a, sazang le vun tawh tua guhte nong tuamsak hi.

¹²Kei, nuntakna hong pia-in, nong it tawntung a, nangma hong kepna hangin kei ka nungta hi.

¹³Ahi zongin a beisa hun sung khempeuhah kei a’ ding thusim khat na neihna tu-in ka theita hi.

¹⁴Ka khialhkhaknate hong ensim niloh na hih manin ka mawhnate hong maisak nuam lo na hi hi.

¹⁵Ka khialh phetin gim nong pia pah a, ka gamtat hoih ciangin zong nong pakta tuan kei hi. Mindaina le maizumna tawh kei ka kidim hi.

¹⁶Mavanna khatpeuh neisun leng zong, humpinelkai bangin ka siatna ding na zong a, kei’ gimtheih nadingin nalamdang tuamtuam nangawn na bawl liang hi.

¹⁷Kei a hong langpang dingin teci na nei tawntung a, keima tungah na hehna hong khang semsem a, kei nong sukna ding thuthak na mu tawntung hi.

¹⁸“Pasian aw, bang hangin ka nu’ sung panin kei hong piangsak peuhmah na hi hiam? Kuama hong muh ma-in a si hizaw hoh leng!

¹⁹Ka nu’ sung pan hankhuk zuat pah ding pen mihing a pian loh zah mahin a hoih ahi hi.

²⁰Keima nuntakna bei dektak ta hi lo ahi hiam? Hong hici omsak hoh in! Ka hun neih laisun teng nuam takin hong zangsak in.

²¹Kei a pai baihta ding ka hi a, a hong ciahkik ngei ding ka hi kei hi - khuamial, lungzinna gam,

²²khuavak nangawn khuamial ahihna gam, khuamial gam, lungzinna gam, lungkhamna gam, a zuan ta ding ka hi hi,” a ci hi.