Read Tedim Chin JOB 11 Bible Online

JOB 11 - Tedim Chin bible

JOB 11

¹Tua ciangin Naamah gammi Zofar in dawng a,

²“Kampau hih zahta hong kidawng lo ding sa a, kam tam pauna hangin thumanin hong kiseh dingin ngaihsun na hi hiam?

³Job aw, na thugente hong dawng thei lo dingin hong ngaihsun na hi hiam? Na simmawh kampaute hong kidawng mawh dingin ngaihsun na hi hiam?

⁴Nangma thugente a man na sa kha a, Pasian’ muhna-ah a siangtho dingin na kingaihsun kha hi.

⁵Pasian in na thugente hong dawngkik le ut mahmah ing!

⁶Pilna nam tampi a omna thu, mihing’ theih zawh loh thuthuk, a omna thu hong gen ding hi. Na mawhna zahin Pasian in gim hong piak lohna thei in.

⁷“Pasian’ thuthuk thei khinzo ding na hi hiam? Vanglianpa’ hih theihna thei khinzo ding na hi hiam?

⁸Vantung sangin Pasian sangzaw a, ahi zongin tua vantung nangawn na banzo kei hi. Pasian in leinuai thu thei a, ahi zongin nangmah in tua thu na thei kei hi.

⁹Pasian’ liatna pen leitung sangin golzaw a, tuipi sangin zaizaw hi.

¹⁰Pasian in nang hong manin thu hong sit leh amah a khaktan ding kua om ahi hiam?

¹¹Pasian in mi hoih lote thei takpi hi. Mawhna a muh ciangin thudon lo ding ahi hiam?

¹²Gamlak a om late mihing suak ngei ding a, mihaite pil ngei ding ahi hiam?

¹³“Job aw, na lungsim a hoihin bawl inla, Pasian’ lamah kihei in.

¹⁴Khialhna na bawl khak leh paaikhia inla, na inn sungah gitlohna omsak kei in.

¹⁵Tua hileh kisuanna om loin na khuadak ngam ding a, na lung nuamin launa na nei kei ding hi.

¹⁶Na lungkhamnate veng ding a, tuikhang pak bangin na phawk nawn kei ding hi.

¹⁷Tua ciangin na nuntakna, sun sangin taangzaw ding a, nuntak lungzin’ pen hun, sun sangin taangzaw ding hi.

¹⁸Lungnuam tak le lametna nei-in na om ding a, Pasian in nang hong hu-in, tawldamna hong pia ding hi.

¹⁹Kuamah kihtak nei loin nuamtakin na om ding a, mi tampi in nangma maipha hong zong ding uh hi.

²⁰Ahih hangin migilote ahihleh cimawhin khuadak ding uh a, suahtakna ding lampi mu lo ding uh hi. Amau’ ngah ding ahihleh sihna bek ahi hi,” a ci hi.