Read Tedim Chin JOB 12 Bible Online

JOB 12 - Tedim Chin bible

JOB 12

¹Tua ciangin Job in dawng a,

²“Note pen theihna kicing na kisa mah uh a, pilna a nei na kisa mah uh hi.

³Ahi zongin note zah mahin kei zong thu ka thei a, midangte sangin na theihzawk uh bang om tuan ahi hiam?

⁴Ka lawmte nangawn in tu-in kei hong nuihsan uh a, kei dikin paubaang lo napi hong nuihsan uh hi. Ahi zongin Pasian in ka thungetna a hong piak hun om hi.

⁵Note in lungkhamna bangmah na nei kei uh a, kei na hong ciamnuih bawl gawpgawp uh hi. A puk dektak mipa na satgawp uh hi.

⁶Guta mite nuamtakin om hithiat uh a, Pasian a simmawhte nuamtakin nungta uh hi.

⁷“Ahi zongin gamsate va dong un, hong hilh ding uh hi. Vasate va dong un, hong hilh ding uh hi.

⁸Leitung ganhingte va dong un, hong hilh ding uh hi. Tui sung ngasate zong va dong un, hong hilh ding uh hi.

⁹Pasian’ khut in amaute a bawlna thu a vekpi-un thei kim uh hi lo ahi hiam?

¹⁰A piansaksate’ nuntakna Pasian mah in a uk ahi hi. Mihing khempeuhte’ nuntakna ama khut sungah om hi.

¹¹Leii in an a ciap mah bangin, bil in ngai thei hi lo ahi hiam?

¹²“Khanghamte in pilna nei a, nuntak saute in thu theitel uh hi.

¹³Pasian in pilna le vang nei a, amah thukipin thu a theitel hi.

¹⁴Pasian in phelkek leh kuamah in lamkik zo lo a, Pasian in thongah mi koih leh kuamah in suaktasak zo lo hi.

¹⁵Pasian in guah khaktan leh leitung keugaw a, tui a khah ciangin tui hong khang hi.

¹⁶“Pasian thahatin gualzo tawntung a, mi khemte le khemna a thuakte Pasian’ ukna nuai-ah a om uh ahi hi.

¹⁷Amah in mipilte’ pilna susia-in, makaite pen mihai bangin gamtasak hi.

¹⁸Amah in kumpite zakiasak a, thongah a khia hi.

¹⁹Siampite mihai suaksak a, mi vangliante lawnthal hi.

²⁰Amah in mi’ muante a pau thei loin bawl a, khanghamte’ pilna a paihkhiatsak hi.

²¹Amah in mi vangliante mindaisak a, mi thupite’ kihihsakna a beisak hi.

²²Amah in khuamial sung panin thuthukte kalkhia a, a kithei zo lo thute kitelsak hi.

²³Amah in minamte thahatsakin liansak a, ahi zongin amah in tuate zogawpin susia hi.

²⁴Amah in minam makaite a pilna uh paihkhiatsak a, lampi om lohna gamlakah vakvaisak hi.

²⁵Khuamial lakah amaute in mialzawt uh a, zukham bangin amaute hoihoi uh hi.