Read Tedim Chin JOB 13 Bible Online

JOB 13 - Tedim Chin bible

JOB 13

¹“Na gen uh thu khempeuh ka muhsa vive hi a, ka bil-in ka zakzaksa, ka theihtheihsa thu ahi hi.

²Note’ theih khempeuh, kei zong ka thei hi. Note khempeuh sangin ka neuzaw tuan het kei hi.

³Ahi zongin note tawh kam a kinial hi loin, Pasian tawh a kinial ka hi hi. Pasian tawh hih ka thu ka kinial nuam hi.

⁴Note in na haina uh zuauthu tawh na melh uh a, kuamah a damsak zo lo zato siam-a kinei mite tawh na kibang uh hi.

⁵Pau hetloin om hi le-uhcin, mipil mah hong kisazaw ding hi.

⁶“Tu-in ka thugen hong ngai unla, ka gen laitakin limtak ngai un.

⁷Pasian’ min dingin thuman lo genin, ama a dingin zuauthu gensak ding na hi uh hiam?

⁸Pasian angvan ding a, ama a’ ding gensak ding na hi uh hiam?

⁹Pasian in limtakin note hong entel leh note’ sungah hoihna mu ding ahi hiam? Mihingte na khem bangun Pasian a khem thei dingin kingaihsun na hi uh hiam?

¹⁰A simthamin angvanna na zat uhleh amah in note hong taii taktak ding hi.

¹¹Ama vangliatna in note hong lausak ding a, note tungah amah kihtakna hong tung ding hi lo ahi hiam?

¹²Na thugente uh vutkhu bang hi lel a, na siksante uh leivui bang hi lel hi.

¹³Pau kei unla, kei, thu hong gensak dih un; a piang peuhpeuh a piang hi mai hen.

¹⁴“Ka nuntakna pia ngamin, ka nuntakna ka ap ngam hi.

¹⁵Pasian in kei hong that mah taleh zong, phamawh ka sa kei hi. Ahi zongin ama mai-ah ka thu ka gen veve ding hi.

¹⁶Pasian’ mai-ah migilote pai ngam lo uh ahih manin, ka hanna pen ka gualzawhna hi ding hi.

¹⁷Ka thugente limtak ngai unla, ka lahtelnate na za un.

¹⁸Ka thu a gen dingin a baihsa-in ka om a, thu ka zawh ding lamtak teltakin ka thei hi.

¹⁹“Pasian aw, keimah hong mawhsak ding na hi hiam? Nong mawhsak leh pau hetloin a si dingin ka kiging hi.

²⁰Thu nih ka hong ngen hi, ka hong nget hong pia in. Tua ciangin nang tungah bangmah kong im kei ding hi.

²¹Kei tungah gim hong pia nawn kei inla, hih bang launa hong thuaksak nawn kei in.

²²Pasian aw, hong hopih masa in, kong dawng ding hi. Kei, thu hong gensak inla, nangmah in hong dawng in.

²³Ka mawhna ka khialhna bangzah pha ahi hiam? Ka mawh ka khialhna teng hong theisak in.

²⁴“Bang hangin kei hong peel a, gal bangin hong ngaihsun na hi hiam?

²⁵Bang hangin keimah lausak ding hanciam na hi hiam? Kei, singteh bang lel hi lo ka hi hiam? Anvai themkhat galin do ding na hi hiam?

²⁶“Nangmah in kei tungah thusiapi nong zong a, ka neulai huna ka gamtatna nangawn tawh nong mawhsak hi.

²⁷Nangmah in ka khe sikkol nong bulh a, ka kalsuanna khempeuh le ka khekhap nangawn na entel hi.

²⁸Tua huhau-in singmuat bangin ka puk a, nget in a nek puan bangin ka zan-gawp hi.