Read Tedim Chin JOB 14 Bible Online

JOB 14 - Tedim Chin bible

JOB 14

¹“Mihingte a nuntak hun tom mahmah a, lungkhamna tawh kidim hi.

²Amaute paak bangin khangin keu pak uh a, niliim bangin pai hanhanin, mangthang uh hi.

³Pasian aw, tua bang lel mi kei hong en a, thukhenna a thuak dingin na mai-ah hong sam na hi hiam?

⁴Mihing banga a ninte sung panin a siang hong piang lo ding hi.

⁵A nuntak tan ding kisehkhol a, a nuntak kha phazah ding kiciangtan khin hi. Nangmah in na ciangtan khin a, kikheel thei nawn lo hi.

⁶Amah en loin tuaci omsak mai inla, a nuntak haksapi mah zomzomsak hoh in.

⁷“A kiphuk khinsa singkung nangawn in lametna nei buang a, a bul sel kikin nungtakik thei hi.

⁸Lei sungah a zungte teek a, a bulsum a si zongin,

⁹guahtui ngahin, singkungno-in hong selkik hi.

¹⁰Ahi zongin mi si a, amah maimang pah hi. Amah a beina tungta a, koi-ah om nawn ahi hiam?

¹¹“Gun tuite le tuipi tuite a kan’ hun om thei ding hi.

¹²Ahi zongin vanpi a omlaiteng, misite thokik ngei lo ding a, a ihmutna panun khanglo ngei lo, gamtang ngei lo ding uh hi.

¹³“Hih gimna tawh ka kipelh theih nadingin nong phawk loh nading mun misite’ gam sungah kei hong busak in. Mi a si khinsate hingkik thei lo ahih manin a hingin hong omsak peuh lecin tua lai-ah ka ut hi. Na hehna a dam ciangin hong phawkkik peuh lecin tua lai-ah ka ngak nuam hi.

¹⁵Tua khit ciangin kei na hong sam ding a, ke’n kong dawng ding hi. Nangma bawlsa ahi keimah na hong lunggulh ding hi.

¹⁶Tua hun ciangin ka kalsuanna khempeuh nong en ding a, ahi zongin ka khialhnate nong sulzuih nawn kei ding hi.

¹⁷Ka khialhnate hong maisakin, nong paihkhiatsak ding a, ka mawhna khempeuh nong phiatkhiatsak ding hi. Tu-a bangin a piang thei hileh ka ut mahmah hi.

¹⁸“Ahi zongin a taktakin, mualte a puk ding hun suangkeente nangawn a cip ding hun hong tung ding hi.

¹⁹Tui in suangte nawtkhia-in, guahtui in lei a nawtkhiat bangin nangmah in mihingte’ lametna na beisak hi.

²⁰Nangmah in mi khat zogawpin na hawlkhia a, na sa mahmah ahih manin a si dingin a ha a li hi.

²¹Amah a pahtawi dingin a tapate hong pai taleh zong amah gimlua ahih manin bangmah phawkzo nawn lo a, a tapate mindai taleh zong bangmah phawkzo nawn lo hi.

²²A pumpi sunga a natnate le a lungsim gimnate bek a phawkzo lai hi,” a ci hi.