Read Tedim Chin JOB 15 Bible Online

JOB 15 - Tedim Chin bible

JOB 15

¹Tua ciangin Teman khuami Elifaz in Job dawng a,

²“Job aw, mawk paupau kei in! Nang’ pau bangin mipilte pau ngei lo a,

³bangmah-a kimang lo kampaute pau lo a, phattuamna om lo dingpi-in thu seello uh hi.

⁴Ahi zongin nangmah in Pasian zahtakna na beisak a, ama mai-ah thugenna ding na khaktan hi.

⁵Tu-in na mawhna thu na kam pan hong gingkhia a, ngian zangin na kampau tawh na mawhna na seel hi.

⁶Na mawhna thu kei’ hong gen kisam lo a, na pauna khempeuh in na mawhna hong langsakta hi.

⁷“Mihing a a piang lakah a masa pen kisa na hi hiam? Pasian in mualte a bawl lai-in a piang khin kisa na hi hiam?

⁸Pasian’ vaihawmnate a za simin kingaihsun na hiam? Nang bek in pilna khempeuh a nei-in kingaihsun na hi hiam?

⁹Ko’ theih loh thu bang thei tuan na hi hiam? Ko’ muh loh thu bang mu tuan na hi hiam?

¹⁰Na pa’ pianma a a piang puteek samkangte’ tung panin kote in ka pilnate uh a ngah ka hi uh hi.

¹¹“Pasian in nang hong hehnem hi; bang hangin nialnial na hi hiam? Kam khum kam nem tawh Pasian’ tangin nang tungah thu kong gen uh hi.

¹²Ahih hangin na lung khauhin kote nong heh et hi.

¹³Pasian’ tungah a heh na hi a, amah a simmawh na hi hi.

¹⁴“Mihing a a piang peuhmah paubaang hetloin siangtho taktak zo ding ahi hiam? Pasian’ tungah a thumanzo kua om ding ahi hiam?

¹⁵Pasian in a siangtho vantung mite nangawn muang lo ahihleh, ei mawhnei mite bang hangin hong muang mah ding ahi hiam?

¹⁶Mihing in tui i dawn bangin siatna i dawndawn a, mihing pen siahuai-in bangmah i man kei hi.

¹⁷“Job aw, ka thutheihte na ngai in.

¹⁸Amaute tung bekah gam kipia ahih manin, amaute a pialkhiatpih ding gamdang mi tawh a kihel lo, a pu a pate un bangmah im loin thu a hilh suksuk uh mipilte’ thugente kong gen ding hi. Tua a gen uh thute in:

²⁰“Mi a nengniam migilo pa in a khan tawntungin lungkhamna thuak ding hi.

²¹Launa ding awging a bilah za ngitnget ding a, lungmuangin a om laitakin gutate in buluh ding hi.

²²Lungzinna pan suahtakna ding lametna om lo a, amah a that dingin mun khatah namsau in ngak khinkhian a,

²³amah a ne dingin musanete in a ngak uh hi. A mailam thu lungzinhuai ahihna thei hi.

²⁴A thahat kumpi khat bangin lungkhamna le lungzinna in amah a hihgawp dingin a ngak khikhe hi.

²⁵“Pasian langpangin a khuttum a lahsan, Vanglianpa a dem mipa in hih bang thute a thuak hi.

²⁶Bang hang hiam cih leh amah in khauhtakin Pasian langpangin, a lum sahpi tawh a lehdo hi.

²⁷“A thatang muanhuai-in a pumpi a liat hangin

²⁸ama tenna khuapi sia-in, ama inn kinusia ding a, a sawt loin ninbulomtang suak ding hi.

²⁹Amah sauvei hau lo ding a, a neihsate kip lo ding hi. Ama liim nangawn maimang ding a,

³⁰khuamial panin suakta lo ding hi. Amah pen a hiangte mei in a kattumsak, a paakte huih in a letkhiatsak, singkung tawh kibang ding hi.

³¹Amah in gitlohna suanin nei ahih manin, gitlohna bek mah ngahkik ding hi.

³²A hun a tun ma-in amah bei ding a, singhiang bangin keu-in hingkik nawn lo ding hi.

³³A min ma-in a gahte a pulh leenggui bang ding a, a paakte a pulhmang khin oliv kung bang ding hi.

³⁴Bang hang hiam cih leh Pasian a ngaihsun lote mi cimang suak a, sumgolh tawh a kilam innte mei in kangtum hi.

³⁵Mihingte in siatna ding bek ngaihsunin sem uh a, mi khem ding bekbek ngaihsun niloh uh hi,” a ci hi.