Read Tedim Chin JOB 16 Bible Online

JOB 16 - Tedim Chin bible

JOB 16

¹Tua ciangin Job in dawng a,

²“Tua bang thute ka zaza khin a, no’ hehnepna pen gimna ding bek ahi hi.

³Khawl hun nei loin gengen lai ding na hi uh hiam? Na gen ding uh omom lai ahi hiam?

⁴Note le keimah a kikhek thei hi lehang, note’ gen khempeuh kei zong ka gen thei ding hi. Note ka lu hong peisanin thu tampi tak mah ka hong gen thei ding hi.

⁵Ahi zongin keimah in note hong tua cih loin, thuhoih mahmah tawh note hong hehnemin, note hehnepna ding thu ka gen ding hi.

⁶Thu gengen taleng ka natna nuamtuam lo a, pau kei taleng zong, phatuam tuan lo hi.

⁷Pasian aw, kei nong paatsak ngingei a, ka innkuan khempeuh na sisakmang khin hi.

⁸Kei na hong mancip a, keima gal na suak hi. Ka vun guak le ka guh guak bekin ka om a, keima mawhna a kilatna-in mite in a ngaihsun uh hi.

⁹“Pasian in a hehna tawh hong balnen ngingei a, a ha hong gawisanin hong heh et hi.

¹⁰Mite in kei hong zahko uh a, ka paang a beeng dingin hong kikhawmtuah uh hi.

¹¹Pasian in migilote’ khut sungah kei hong pia hi.

¹²Kei nuamtakin a om kimlai, Pasian in ka gawlin hong manin, hong balgawpin hong sugawp hi. Pasian in a muitum dingin kei hong suang a,

¹³ka kimkot panin a thaltangte tawh hong kap hi. Tua thaltangte in kei hong kha-in hong liamsak a, tua bang nangawnah kei hong hehpih lo hi.

¹⁴Amah in hong hehpih hetloin kei hong liamsak thuahthuah a, galkap a heh pa bangin kei hong hihgawp hi.

¹⁵“Kei thumin puanhampi ka silh a, guallelin leivui lakah ka om hi.

¹⁶Ka kahkahna-in ka mai khempeuh san gawp a, ka mitkhute bawkgawpin khua ka mu thei kei hi.

¹⁷Ahi zongin ngongtatna themkhat zong ka zang kei a, Pasian tungah ka thungetna pen lungsim takpi tawh ahi hi.

¹⁸“Leitung aw, a man loin kei hong kibawlna seelcip kei in! Thuman deihin ka kikona ka awging daicipsak kei in.

¹⁹Kei a dingin a ding ding, a hong panpih ding mi khat vantungah om hi.

²⁰Pasian in ka khitui luanna hong mu-in ka thungetna hong za leh ka ut hi.

²¹Mi khat in a lawmpa a’ ding a thumsak mah bangin mi khatpeuh in Pasian’ kiangah kei a dingin hong thuumsak leh ka ut hi.

²²Bang hang hiam cih leh ka hun nai mahmah ta a, ka lehzuih nawn loh ding lampi zui-in a pai ka hita hi.