Read Tedim Chin JOB 17 Bible Online

JOB 17 - Tedim Chin bible

JOB 17

¹“Ka bei ding hun nai kuan ta a, hu ka sangzo nawn kei hi. Kei a dingin hankhuk cih loh bangmah dang om nawn lo hi.

²Ka heina khempeuhah mite in hong zahko uh a, amau’ hong phinna in hong lungzingsak hi.

³Pasian aw, kei hong hu in. Ka thugente hong panpih ding kuamah dang om lo hi.

⁴Nangmah in amaute thuman a mu lo dingin bawl na hih manin amaute a gualzo-in na bawl kei ding hi.

⁵Paunak-ah, sum ngahnop manin mi khat in a lawmte a heek leh, ama tate in tua gitlohna thaman thuak hi, kici hi.

⁶Tu-in amaute in kei tungah hih paunak hong bulh uh a, mite in hih thu za-in kei hong cilphih uh hi.

⁷Ka dahna hangin ka mit mial a, ka khut ka khete ciangkang bang ta hi.

⁸Mihoihin a kineite in lamdang hong sa uh a, migiloin kei hong seh uh hi.

⁹Mite’ zahtaka a kinei mite in amau’ ngaihsutna uh man mahmah sa semsem uh hi.

¹⁰Ahi zongin amaute khempeuh hong pai-in ka mai-ah hong ding le-uh amaute’ lakah mipil khat zong ka mu kei ding hi.

¹¹“Ka hun beita hi. Ka geelna teng maimang a, ka lametna teng beita hi.

¹²Ka lawmte in, khuamial kimlai, sun khuavak, ci uh hi. Khuavak hong nai ta hi, ci-in gen uh a, ahi zongin khuamial sung mahah kei ka omlai veve hi.

¹³Kei’ lamet ding misite’ gam bek omlai a, tua khuamial sungah lumin ka ihmu ding hi.

¹⁴Hankhuk sung pen ka pa hi, ka ci ding a, kei hong ne thante pen ka nu le ka sanggam numeite, ka ci ding hi.

¹⁵Kei’ lamet ding tua lai-ah bang om ahi hiam? Tua lai-ah ka lamet ding bang nong muhsak uh hiam?

¹⁶Misite’ gam Leinuai-ah ka pai ciangin nopsakna in kei hong zui lo ding hi,” a ci hi.