Read Tedim Chin JOB 18 Bible Online

JOB 18 - Tedim Chin bible

JOB 18

¹Tua ciangin Shuah gammi Bildad in dawng a,

²“Job aw, khawl hun nei thei lo ding na hi hiam? Hong khawl phot lecin, thu kong gen thei ding uh hi.

³Bang hangin bawng bang lelin kote hong ngaihsun a, mihaipi-in kote hong seh na hi hiam?

⁴Na hehna tawh nangmah a kigimsak bek na hi hi. Nangma hangin leitung kinusia ding a, mualte a kinkhia dingin ngaihsun na hi hiam?

⁵“Migilo pa’ meivak kisumit ding a, cikmah hunin kuangkik nawn lo ding hi.

⁶Ama buk sungah a meivak mit ding a, ama inn sungah khua a mial ding hi.

⁷A khe kip ngei a, ahi zongin tu-in a khe bai ta hi. Amah in a ngaihsut khialhna a puklawh hi.

⁸Thangsiahna ngen sungah amah bungbu tuk a, gum sungah amah kia hi.

⁹Thangah a khetulin awk a, thangkhau in amah gakcip hi.

¹⁰Amah siahna-in leilakah khauzak kitung a, a pai nading lampi-ah thang kisiah hi.

¹¹Lauhuaina in amah pang a, a kalsuanna khempeuh a sulzuih hi.

¹²A hauh ngei hangin tu-in gilkial ta a, siatna in a su dingin amah ngak gige hi.

¹³A kihtakhuai natna in a pum khempeuh tuam a, a khut le a khete muatsakmang khinta hi.

¹⁴Lungmuang takin a omna a inn panin amah kikaikhia a, Sihna Kumpipa kiangah amah kitunpih hi.

¹⁵Ahih hangin zatui tawh ama inn a kisiansuah khit ciangin tua inn-ah a ut peuhpeuh teng thei pah ding hi.

¹⁶Lei sunga ama zungte keu-in, a tunga a hiangte a si ta hi.

¹⁷Inn le gamah ama minthanna beita a, kuamah in amah phawkkha nawn lo hi.

¹⁸A nungtate’ gam panin amah kihawlkhia ding a, khuavakna mun panin khuamialna-ah kihawlkhia ding hi.

¹⁹Amah in suanlekhak nei lo a, ama tennasa munah ama gui a zom ding om lo hi.

²⁰Nisuahna pan nitumna dong ama thuakna a za peuhmah kigaihin a ling uh hi.

²¹Migilote, Pasian a ngaihsun lote a thutawpna uh tu-a bang ahi hi,” a ci hi.