Read Tedim Chin JOB 19 Bible Online

JOB 19 - Tedim Chin bible

JOB 19

¹Tua ciangin Job in dawng a,

²“Bang tanvei thu genin hong gimsak ding na hi hiam?

³Kei nong simmawh niloh a, tua banga na gamtatna-ah maizumna mel na nei thei kei hi.

⁴A khial takpi hi taleng zong nang’ lainatna ding bang om ahi hiam?

⁵Keimah sangin a hoihzaw-in nang na kingaihsun a, ka thuak gimnate pen keima mawhna hangin na ngaihsun hi.

⁶Hih thu hong piangsak pa Pasian ahihlam mu thei lo na hi hiam? Kei hong mat nadingin amah in thang hong siah hi.

⁷Keimah hong ngongbawlna ka nialnial hangin kuamah in hong don kei hi. Thuman ka deih hangin hong kipia kei hi.

⁸Pasian in ka lampi khaktan a, ka paisuakzo kei hi. Amah in ka pai nading lampi khua mialcipsak hi.

⁹Amah in ka hauhna khempeuh hong lakkhiatsak a, ka min hoih kimlai hong siasak hi.

¹⁰Amah in ka pumpi khempeuh hong satgawp hi. Ka nopsakna teng hong zunglot sakin, vulgawpin a si dingin kei a hong nusia hi.

¹¹Keima tungah Pasian’ hehna hong sogawp a, ama gal lian penin kei a hong ngaihsun hi.

¹²Amah in keimah a sim dingin a galkapte hong sawl a, a galkapte in dum to-in ka buk hong umcih uh hi.

¹³“Pasian in ka sanggamte hong taisansak a, kei hong theisate kiangah khualmi ka suak hi.

¹⁴Ka behte le ka lawmte beimang khinta uh hi.

¹⁵Ka inn-ah a hong tung ngei keima zinte in hong mangngilh ta a, ka na a sem numeite in khualmi bangin hong bawl uh a, amaute’ mai-ah midangpi khat ka suak hi.

¹⁶Ka nasemte khatpeuh ka sap ciangin hong dawng nuam lo uh a, hong huhna ding uh ka thum ciang nangawnin hong thudon lo uh hi.

¹⁷Ka zi nangawn in ka gimnam thuak zo lo a, ka sanggamte mahmah in zong hong naih nuam lo uh hi.

¹⁸Naupang melmawl nangawn in kei hong simmawh uh a, kei hong muh uh ciangin hong nuihsan uh hi.

¹⁹Ka lawm it pente nangawn in kei hong muhdah et uh a, ka it pente nangawn in kei hong langbawl uh hi.

²⁰Ka guh tungah ka vun kol dihdiahin om a, a nungta liailiai bekin kei a om ka hi hi.

²¹Hong hehpih un! Hong hehpih un! Keima lawmte hi lo na hi uh hiam? Pasian in kei hong satpai ta hi.

²²Pasian’ hong bawlsiat bangin bang hangin no zong kei hong bawlsia ding na hi uh hiam? Nong gimsakna uh kicing ta hoh hi lo ahi hiam?

²³“Ka thugente khempeuh mi khatpeuh in ciamteh hen la, laibu khat sungah a khum hileh ut mahmah ing!

²⁴Tua ahih kei leh zong, ka thugente khempeuh sikkhu khat tawh suang tungah kikhen hen la, a mang ngei nawn lo dingin a kigelh hileh ut ing!

²⁵“Ahi zongin a tawpna-ah kei hong panpih ding a nungta tawntung khat vantungah a omna thu ka thei hi.

²⁶Natna in ka vun a nektum khit hangin, hih ka pumpi mahmah tawh Pasian ka mu ding hi.

²⁷Keima mit teekteek tawh amah ka mu ding a, amah in kei hong khualmi et lo ding hi. “Ka lungsim hanna a bei hi.

²⁸Bang hang hiam cih leh, ‘Amah bangci gimsak thei ding ihi hiam?’ na ci uh hi. Kei nong suktheih nadingun paulap khatpeuh na zong uh hi.

²⁹Ahi zongin tu-in namsau kihta un. Tua namsau in a mawhte tungah Pasian’ hehna hong sem ding hi. Tua ciangin thukhen ding khat a omlam na thei ding uh hi,” a ci hi.