Read Tedim Chin JOB 2 Bible Online

JOB 2 - Tedim Chin bible

JOB 2

¹Ni khat ni-in TOPA’ omna-ah vantung mite hong paikik uh a, Satan zong amaute lakah hong kihelin TOPA’ omna mahah hong pai hi.

²Tua ciangin TOPA in Satan kiangah, “Koi lai panin hong pai na hi hiam?” a ci hi. Satan in TOPA dawngin, “Leitung khempeuh a lu pan a taw dong vak kawikawi-in ka va phehlehna mun panin kong pai hi,” a ci hi.

³Tua ciangin TOPA in Satan kiangah, “Ka nasem Job na phawk hiam? A paubaang lo, a thutang, Pasian zahtakin gamtat hoih lo a peel, amah tawh a kibang midang leitungah om lo hi. Thu om lopi-in amah susia dingin kei nong kam pausak a, ahi zongin ama hoihna bangmah hem tuan lo hi,” a ci hi.

⁴Tua ciangin Satan in TOPA dawngin, “Vun bek in vun mah leizo bek, ci-in paunak a om mah bangin mi khat in ama nuntakna a hutna-in a neih khempeuh pia ngam ding hi.

⁵Tu-in na khut zan inla, ama sa le a guh suksak lecin nangma maitang mahah pel loin nang hong samsia ding hi,” a ci hi.

⁶Tua ciangin TOPA in Satan kiangah, “En in, na khut sungah amah kong ap hi; ahi zongin amah sisak kei in,” a ci hi.

⁷Tua ahih ciangin TOPA’ omna panin Satan paikhia a, Job a khetul pan a luzang dongin a kihhuai meima a veisak hi.

⁸Tua ciangin Job in beel kitam themkhat la-in tua tawh kikhuatin vut lakah a tu hi.

⁹Tua ciangin a zi in, “Na upna khiam tuan lo ding na hi hiam? Pasian samsia inla sisuk mai in,” a ci hi.

¹⁰Ahih hangin amah in a zi kiangah, “Numei haite’ kampau bangin na pau hi. Pasian’ tung panin a hoih sang ihih ciangin siatna zong sang lo ding ihi hiam?” a ci hi. Hih thu khempeuhah a kampau nangawnin Job khial lo hi.

¹¹Job’ lawmte thum, Teman khuami Elifaz, Shuah gammi Bildad, le Naamah gammi Zofar-te in Job in a thuak gimna thu teng a zak uh ciangin a inn ciat panun amah a hehnem ding le a hanthawn dingin kituahin hong paikhawm uh hi.

¹²Amaute in a gamla sim mun panin Job a muh tungun amah thei pah lo uh hi. Tua ciangin amaute a gingin kapkhia uh a, a puan uh balkekin a lu tung uh a tukik dingin leivui lawnto uh hi.

¹³Tua ciangin leilakah sun sagih le zan sagih sung amah tawh tukhawm uh a, ama thuakna a nasiat mahmah lamtak mu uh ahih manin kuamah in kam khat beek a paupih ngam kei uh hi.