Read Tedim Chin JOB 20 Bible Online

JOB 20 - Tedim Chin bible

JOB 20

¹Tua ciangin Naamah gammi Zofar in dawng a,

²“Job aw, ka heh nong suaksak a, ka ki-ipzo nawn kei hi.

³Na thugente khempeuh kei nong simmawhna kampau vive hi a, ahi zongin kong dawnna ding ka thei hi.

⁴Tanglai pek a kipan, leitung mi a om cil a kipanin,

⁵migilote’ nopsak hun a tom mahmahna thu, Pasian a don lote’ lungdam hun a tom mahmahna thu thei lo na hi hiam?

⁶Migilo pa lian mahmahin vantung a banto zongin, lian mahmahin a lutang in meii lak a banto zongin,

⁷leivui them bangin maimang veve lel ding hi. Amah a thei ngei mite in, ‘Amah koi-ah omta ahi hiam?’ ci-in lamdangsa ding uh hi.

⁸Amah pen zan a mangmat bang, mumaang bangin maimang ding a, cikmah hunin kimukik ngei nawn lo ding hi.

⁹Ama tenna ngei mun panin amah maimang ding a,

¹⁰mizawngte’ na a suhsakte, a tate in lohsak ding uh hi.

¹¹A pumpi moi suahin a thatang a hat mahmah hangin a sawt loin leivui a suakpak ding ahi hi.

¹²“Ama kam sungah gitlohna lim sa mahmahin, namtui mahmah sa-in, a leii tawh lop melmel a,

¹³amah in muammuam nuamin siakhia nuam lo a, lim sa mahmahin a dangtawng denna-in a neih hangin,

¹⁴a gil sung a tun ciangin a kha mahmah an suakin, gu a kha mahmahte zahin kha deidai hi.

¹⁵Migilo pa in a guksa nate luakhia kik a, a gil sung nangawn panin Pasian in a lakkhiatsak hi.

¹⁶Migilo pa’ nekte pen gu tawh kibang a, gul guneite’ tuk bangin amah a sisak hi.

¹⁷Amah in bawngnawi le khuaizu gun tui bangin a luang mukha lo ding hi.

¹⁸Amah in a nasep thamante nusia ding a, a hauhna khempeuh zangkha man lo ding hi.

¹⁹Bang hang hiam cih leh amah in mizawngte bawlsia-in don lo a, midangte’ inn lamsate sutin a tang hi.

²⁰“A huaihamna bei ngei lo a, a duh khempeuh siit nei lo hi.

²¹Amah in a nek ciangin a khamval cih om ngei lo a, tu-in a hauhna khempeuh a beimang khinta ahi hi.

²²A cihtheih pen hun laitakin lungkhamna lianpen a tuak hi.

²³Amah in a duhduh ne mai hen! Pasian in hehna tawh amah gim pia ngawn ding hi.

²⁴Amah in namsau pelhin a taina-ah sumngo thal in kaptuk ding hi.

²⁵Thaltang khat in ama pumpi pailet a, a te-dildel thaltang mukah si taak keuhkeuh a, ama tungah a kihtakhuai hong tung hi.

²⁶A kholsa khempeuh kisusia a, mihing’ tawh loh meikuang in amah le a innkuan khempeuh a kangtum hi.

²⁷Vantungte in hih mipa’ mawhna pholak uh a, leitung in ama langah teci a pang hi.

²⁸Pasian’ hehna hangin ama hauhna khempeuh a kisusiamang ding ahi hi.

²⁹“Migilote’ ngah dingin Pasian in a piak gimna migilote’ ngah pen tu-a bang ahi hi,” a ci hi.