Read Tedim Chin JOB 22 Bible Online

JOB 22 - Tedim Chin bible

JOB 22

¹Tua ciangin Teman khuami Elifaz in dawng a,

²“Mipil pente i cih nangawn, ama a’ ding cih lohbuang, Pasian a dingin a kimanna om lo hi.

³Na gamtat hoihna in Pasian’ phattuamna ding bangmah piangsak lo a, na hoihna in Pasian hoihsak tuan lo hi.

⁴Nangmah in Pasian na zahtakna hangin amah in nang hong taii-in hong ze-et hi lo hi.

⁵Na mawhna a tamna hang, na gitlohna a liatna hang hizaw hi.

⁶Na sanggampa’ leiba tangin a silh ding sitsak loin a puan teng na laksak hi.

⁷A dangtakte tui na pia nuam kei a, a gilkialte an na pia nuam kei hi.

⁸Na vangliatna le na za liatna zangin, gam khempeuh na la khin hi.

⁹Meigongte a huh nuam lo ciang bek hi loin, mi tagahte bawlsia-in a neihsa uh na sut hi.

¹⁰Tua ahih manin na kimkotah thang hong kisiah a, thakhatthu-in launa in nang hong buaisak hi.

¹¹Khuavak kimlai khuamial hong suak vatin khua na mu thei kei a, tuikhang in nang hong tuumcip hi.

¹²“Van a sangpen dawnah Pasian a om hi a, a sang mahmah a om aksite hong suk et lai hi.

¹³Ahi zongin nangmah in, ‘Pasian in bang thei ding ahi hiam? Meii in Pasian tuamcip hi. Eite’ thu bangci-in khenthei ding ahi hiam?’ na ci hi.

¹⁴Van khumzangah Pasian a paikawmin meii pailetin Pasian in hong musuk thei lo ding hi, ci-in na ngaihsun hi.

¹⁵“Migilote’ gamtat ngeite mah gamtat ding ngaihsun na hi hiam?

¹⁶Amau’ hun tung lopi-in tuikhang in amaute taai hi.

¹⁷Hih mite pen Pasian a nial, Pasian in bangmah a cih thei lo dingin a ki-um mite ahi uh hi.

¹⁸Tua hitaseleh amaute a daupaisak Pasian hi a, migilote’ ngaihsutna pen keima ngaihsutna tawh kigamla mahmah hi.

¹⁹Migilote tungah gim kipia a muh uh ciangin mihoihte nuam a, paubaanna a nei lo mite in a nuihsan uh hi.

²⁰Bang hang hiam cih leh migilote’ neih khempeuh kisuksiatsak gawp a, a omlai sunte nangawn mei in a kangtum hi.

²¹“Job aw, tu-in Pasian tawh kilem inla, amah galbawl nawn kei in. Tua hileh amah in nang thupha hong pia ding hi.

²²Ama hong hilhnate zui inla, ama thute ciamteh in.

²³Lungsim tak tawh Vanglianpa lamah kihei inla, na innsung pan gamtatsia beisak inla,

²⁴na kham neihte leivui bang lelin ngaihsunin, na Ofir khamte suang bang lelin ngaihsunin,

²⁵Vanglian Pasian pen na kham le na ngun hisak lecin,

²⁶Pasian muanin na nei tawntung ding a, na lungdamna bulpi amah ahihlam na thei ding hi.

²⁷Thu na nget ciangin na ngetna hong pia ding a, nangma thuciamnate na tungsak ding hi.

²⁸Na hih khempeuh na tangtun ding a, na maa hong vang ding hi.

²⁹Pasian in mi kiphasakte niamkhiat a, mi niamte a hon hi.

³⁰Nang a mawhbaang lo, a gamtat man na hih nakleh nang hong hon ding hi,” a ci hi.