Read Tedim Chin JOB 23 Bible Online

JOB 23 - Tedim Chin bible

JOB 23

¹Tua ciangin Job in dawng a,

²“Tu laitakin Pasian’ tungah a phun lo, a heh loin ka om thei kei a, thum loin ka om thei kei hi.

³Amah ka zon dan ding thei-in, ama kiang ka tunna ding zia a thei hi leng,

⁴a mai-ah ka thu ka gen ding a, kei ka dikna thu a kicingin ka gen ding hi.

⁵Ama hong gen ding thute le kei a hong dawnna ding thute ka thei nuam hi.

⁶Pasian in a thaneih khempeuh tawh keima langkhatah hong pang ding ahi hiam? Hong langpan lo ding a, ka thugen hong ngai ding hi.

⁷Kei a thuman ka hi a, Pasian kiangah ka gen ding hi. Kuama phelzawh nawn loh dingin kei’ dikna a genkhia ding hi.

⁸“Ahi zongin Nisuahna lam ka zong a, Pasian ka mu kei hi. Nitumna lam ka zong a, amah ka mu thei tuan kei hi.

⁹Leilu lam ka zon hangin amah ka mu thei kei a, Leitaw lam ka zon hangin zong amah ka mu thei tuan kei hi.

¹⁰Ahi zongin Pasian in ka kalsuanna khempeuh thei a, kei hong ze-et leh ka sianthona a mu ding hi.

¹¹Ama hong lamlahna citakin ka zui cinten a, lam ka pial ngei kei hi.

¹²Pasian’ thupiakna bangin ka gamta ngitnget a, keima utna zui loin ama deihna ka zui hi.

¹³“Amah kikheel ngei lo a, kuamah in amah nial zo lo hi. Ama hih nopte kuamah in khaktan zo lo hi.

¹⁴Tua ahih manin kei a dingin a geelsate tungsak ding hi. Amah in hih bangin geelna tampi tak a nei ahi hi.

¹⁵Tua hi a, ama omna-ah kei ka lau mahmah a, ka ngaihsut khak ciangin amah ka kihta hi.

¹⁶Vanglian Pasian in ka lungsim hanna hong mangsak hi.

¹⁷Khuamial in ka mit a mialsak hangin keima kihtak pen khuamial hi lo a, Pasian ahi hi.